ଦିଗପହଣ୍ଡି,୧୭।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସରକାରୀ ଲାଇସେନ୍ସ ପ୍ରାପ୍ତ ଦେଶୀମଦ ଭାଟି ଭିତରକୁ ଜବରଦସ୍ତ ପ୍ରବେଶ କରି ଉପସ୍ଥିତ କର୍ମଚାରୀଙ୍କୁ ଭୟଭୀତ କରି ବଟି ମାଗିବା ସହ ଧମକ ଦେବା ଅଭିଯୋଗରେ ଏକ ନିର୍ଦ୍ଦିଷ୍ଟ ବୈଦ୍ୟୁତିକ ଚ୍ୟାନେଲର ଖବରଦାତାଙ୍କ ନାଁରେ ପୋଲିସ ମାମଲା ନଂ.୨୧୧/୨୫ ଅନୁଯାୟୀ ମକଦ୍ଦମା ରୁଜୁ କରି ତଦନ୍ତ ଚଳାଇଛି। ସେ ହେଲେ ଜିତେନ୍ଦ୍ର ଗୌଡ଼।
ସୂଚନାନୁଯାୟୀ, ମଦଭାଟି କର୍ମଚାରୀ ଜି. ଶ୍ୟାମବାବୁ ରେଡ୍ଡୀ ସୋମବାର ମଧ୍ୟାହ୍ନରେ ନିମପଲ୍ଲି ଗ୍ରାମ ନିକଟ ମଦଭାଟିରେ କାମ କରୁଥିବା ବେଳେ ଜିତେନ୍ଦ୍ର ତାଙ୍କ ଅନ୍ୟଜଣେ ସହଯୋଗୀଙ୍କ ସହ ସେଠାକୁ ଯାଇ ନିଜକୁ ଖବରଦାତାର ପରିଚୟ ଦେଇ ମାସିକ ବଟି ଦେବାକୁ କହିଲେ। ସେ ତାଙ୍କୁ ଚିହ୍ନି ନ ଥିବା ସହ ବଦନାମ କରିଦେବା କହି ଆପତ୍ତି ଜନକ ଭାଷାରେ ଗାଳି ଗୁଲଜ କରିଥଲେ। ପ୍ରତିବାଦ କରିବାରୁ ତାଙ୍କୁ ଆକ୍ରମଣ କରିଥିଲେ। ଅନ୍ୟ କର୍ମଚାରୀ ମାନେ ଘଟଣାସ୍ଥଳକୁ ଦୌଡ଼ି ଆସିବାରୁ ଜିତେନ୍ଦ୍ର ଏବଂ ତାଙ୍କ ସାଙ୍ଗରେ ଥିବା ଅନ୍ୟ ଜଣେ ଯୁବକ ଲାଲ ରଙ୍ଗର ବାଇକ (ନଂ. ଓଡ଼ି୦୭ କ୍ୟୁ-୬୧୪୨) ଯୋଗେ ପଳାଇଥିଲେ ବୋଲି ଏତଲାରେ ଉଲ୍ଲେଖ ରହିଛି। ଅପରପକ୍ଷରେ ଜିତେନ୍ଦ୍ର ବେଆଇନ ମଦବ୍ୟବସାୟ ବିରୋଧରେ ଖବର ପ୍ରସାରଣ କରିବା ପରେ ମଦଭାଟିକୁ ଯାଇ କେତୋଟି ଗ୍ରାମପଞ୍ଚାୟତରେ ଆଉଟ୍୍ ଲେଟ୍ ରହିଛି ବୋଲି କହିଥିଲେ। ଏପରିକି ସେଠାରେ ଉପସ୍ଥିତ ଜି.ଶ୍ୟାମବାବୁ ରେଡ୍ଡୀ ଏବଂ ଭୀମ ରେଡ୍ଡୀଙ୍କୁ ପଚାରିବାରୁ ତୁ କଣ ଖବର ପ୍ରସାରଣ କରିବୁ ତୋ ଲେଖା ଆମେ ରାଇଟ କରି ଜୀବନରେ ମାରିଦେବୁ ବୋଲି ଧମକ ଦେଇଥିବା ନେଇ ସେ ପାଲଟା ଏତଲା ଦେଇଛନ୍ତି। ପୋଲିସ ଏତଲାକୁ ଭିତ୍ତିକରି ଥାନା ମାମଲା ନଂ.୨୧୨/୨୫ ଅନୁଯାୟୀ ମକଦ୍ଦମା ରୁଜୁ କରି ତଦନ୍ତ ଚଳାଇଛି।
