ନୂଆଦିଲ୍ଲୀ,୨।୧୧ : ବିଭିନ୍ନ ବର୍ଗର ସିଭିଲ ସର୍ଭିସ୍ରେ ଦିବ୍ୟାଙ୍ଗଙ୍କୁ ସୁଯୋଗ ଦେବା ପ୍ରସଙ୍ଗରେ ଏହାର ଯାଞ୍ଚ୍ କରିବାକୁ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ବୁଧବାର ଏକ ମାମଲାର ଶୁଣାଣି ବେଳେ ଅଦାଲତ କେନ୍ଦ୍ର ସରକାରଙ୍କୁ କହିଛନ୍ତି ଯେ ଦିବ୍ୟାଙ୍ଗମାନଙ୍କୁ ସିଭିଲ ସର୍ଭିସରେ ବିଭିନ୍ନ ବର୍ଗରେ କିପରି ସୁଯୋଗ ଦିଆଯାଇପାରିବ ତାହାର ଜବାବ ଦିଅନ୍ତୁ।
ଏହି ମାମଲାର ଶୁଣାଣି ବେଳେ କୋର୍ଟ କହିଛନ୍ତି ଯେ ଏହି ପ୍ରସଙ୍ଗରେ ବ୍ୟବହାରିକତା ମଧ୍ୟ ଦେଖାଯିବା ଉଚିତ। ଜଷ୍ଟିସ ଏସ ଏ ନଜିର ଏବଂ ଭି ରାମାସୁବ୍ରମଣ୍ୟମ୍ୟଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଦିବ୍ୟାଙ୍ଗତା ପ୍ରତି ସହାନୁଭୂତି ଏକ କାରଣ ହୋଇଥିବାବେଳେ ନିଷ୍ପତ୍ତିର ବ୍ୟବହାରିକତାକୁ ମଧ୍ୟ ମନେ ରଖିବା ଜରୁରୀ ବୋଲି କହିଛନ୍ତି। ଅଦାଲତ କହିଛନ୍ତି ଯେ ଦିବ୍ୟାଙ୍ଗମାନେ ସମସ୍ତ ବର୍ଗରେ ଫିଟ ହୋଇପାରିବେ ନାହିଁ। ତେଣୁ ଏହାର ଯାଞ୍ଚ୍ କରାଯିବା ଉଚିତ। କାରଣ, ସହାନୁଭୂତି ହେଉଛି ଗୋଟିଏ ଦିଗ ଏବଂ ବ୍ୟବହାରିକତା ଅନ୍ୟ ଏକ ଭିନ୍ନ ଦିଗ।
ଏହି ସମୟରେ କୋର୍ଟ ଏକ ଘଟଣା ବିଷୟରେ ଉଲ୍ଲେଖ କରି କହିଛନ୍ତି ଯେ ଚେନ୍ନାଇରେ ଶତ ପ୍ରତିଶତ ଦୃଷ୍ଟିବାଧିତ ବ୍ୟକ୍ତିଙ୍କୁ ଜୁନିଅର ଡିଭିଜନରେ ସିଭିଲ ଜଜ ଭାବେ ନିଯୁକ୍ତି ଦିଆଯାଇଥିଲା। ପରେ ସେ ତାମିଲ ପତ୍ରିକାର ସମ୍ପାଦକ ଭାବରେ କାର୍ଯ୍ୟ କରିଥିଲେ।
କେନ୍ଦ୍ର ପକ୍ଷରୁ ଏହା କୁହାଯାଇଛି ଯେ ବିଭିନ୍ନ ବର୍ଗର ସିଭିଲ ସର୍ଭିସ୍ ଉପରେ ବିବ୍ୟାଙ୍ଗଙ୍କ ଭୂମିକା ଅନୁସନ୍ଧାନ କରାଯାଉଛି। ଏହି ସମୟରେ କେନ୍ଦ୍ର କୋର୍ଟରୁ ୮ ସପ୍ତାହ ସମୟ ମାଗିଥିଲେ। କୋର୍ଟ ଏହାକୁ ମଞ୍ଜୁରୀ ଦେଇଛନ୍ତି।
