ମାଥିଲି, ୧୨ା୮(ସୁବାସ ଚନ୍ଦ୍ର ଖୁଡୁପିଆ): ମାଲକାନଗିରି ଜିଲା ମାଥିଲି ବ୍ଲକ ମହୁପଦର ପଞ୍ଚାୟତର ଆମ୍ବାଗୁଡା ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଜଣେ ଅବିବାହିତ ଯୁବକଙ୍କୁ କାଗଜପତ୍ରରେ ବିବାହିତ ଦର୍ଶାଇ ପରିବାର ନିୟନ୍ତ୍ରଣ ଅସ୍ତ୍ରୋପଚାର କରାଯାଇଛି। ଏହା ଜଣାପଡ଼ିବା ପରେ ଗ୍ରାମରେ ଉତ୍ତେଜନା ପ୍ରକାଶ ପାଇଛି। ସମ୍ପୃକ୍ତ ଯୁବକ ଜଣକ ହେଲେ ଗଙ୍ଗା ଦୁରୁଆ, ବୟସ ୨୬ ବର୍ଷ। ଆଦିବାସୀ ସମ୍ପ୍ରଦାୟର ମୂକ ଯୁବକ ଗଙ୍ଗାଙ୍କୁ ଭତ୍ତା ମିଳିବ ବୋଲି ପ୍ରଲୋଭିତକରି ନିକଟରେ ଆଶାକର୍ମୀ ତାଙ୍କୁ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ତେବେ ଏଠାରେ ତାଙ୍କୁ ପରିବାର ନିୟନ୍ତ୍ରଣ ଅସ୍ତ୍ରୋପଚାର କରି ଛାଡ଼ି ଦିଆଯାଇଥିଲା। ସ୍ବାସ୍ଥ୍ୟକେନ୍ଦ୍ରରେ ଏପରି ହୋଇଥିବା ଗଙ୍ଗାଙ୍କ ମାଆ ଚମ୍ପା ଜାଣିବା ପରେ ସେ ଗ୍ରାମ ଲୋକଙ୍କୁ ଏ ବିଷୟରେ ଜଣାଇଥିଲେ। ଗ୍ରାମବାସୀ ମଧ୍ୟ ଏହାକୁ ତୀବ୍ର ବିରୋଧ କରିଥିଲେ।
ଖବରରୁ ଜଣାପଡିଛି, ଗତ ୩ରେ ମାଥିଲି ସବ୍ଡିଭିଜନ ମେଡିକାଲରେ ପୁରୁଷ ବନ୍ଧ୍ୟାକରଣ ଅସ୍ତ୍ରୋପଚାର କରାଯାଇଥିଲା। ଏଥିରେ ମହୁପଦର ଅଞ୍ଚଳରୁ ୨ ଜଣଙ୍କୁ ଅସ୍ତ୍ରୋପଚାର କରିବାକୁ ଆଶାକର୍ମୀ ଆଣିଥିଲେ। ସେମାନଙ୍କ ମଧ୍ୟରେ ଗଙ୍ଗା ଥିଲେ। ସାଧାରଣତଃ ଜନ୍ମରୁ ମୂକ ପାଲଟିଥିବା ଗଙ୍ଗା ମାନସିକ ଓ ଶାରୀରିକ ସ୍ତରରେ ଥିଲେ ଅସୁସ୍ଥ। ଦିବ୍ୟାଙ୍ଗ ଭତ୍ତା ମିଳିବ ବୋଲି କହି ଆଶାକର୍ମୀ ଜଣକ ତାଙ୍କୁ ଏବଂ ତାଙ୍କ ମାଆଙ୍କୁ ମାଥିଲି ଆଣିଥିଲେ। ଗଙ୍ଗାଙ୍କୁ ସ୍ବାସ୍ଥ୍ୟକେନ୍ଦ୍ର ନେଇ ବିବାହିତ ବୋଲି କହି ତାଙ୍କର ଅସ୍ତ୍ରୋପଚାର କରାଇଥିଲେ। ଘରକୁ ଆସିବା ପରେ ଚମ୍ପା ଏକଥା ଜାଣିବାକୁ ପାଇ ଆଶାକର୍ମୀ ଜଣକ ଅନ୍ୟାୟ ଭାବେ ପୁଅକୁ ନେଇ ଅସ୍ତ୍ରୋପଚାର କରିଥିବା ଅଭିଯୋଗ ଉଠାଇଥିଲେ। ଘଟଣା ଜାଣିବା ପରେ କଂଗ୍ରେସ ନେତା ଶରତ ଚନ୍ଦ୍ର ବୁରୁଦା ଆମ୍ବଗୁଡା ଗ୍ରାମକୁ ଯାଇ ଏହାର ସତ୍ୟତା ଅନୁଧ୍ୟାନକରି ଶୁକ୍ରବାର ମାଲକାନଗିରି ଜିଲାପାଳ ବିଶାଲ ସିଂଙ୍କୁ ଭେଟି ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଦାବିପତ୍ର ଦେଇଛନ୍ତି। ଏ ସମ୍ପର୍କରେ ମାଲକାନଗିରି ସିଡିଏମ୍ଓ ଡା. ପ୍ରଫୁଲ୍ଲ ନନ୍ଦଙ୍କୁ ପଚାରିବାରୁ ସେ କହିଲେ, ଏହି ଖବର ଜଣାପଡିବା ପରେ ଘଟଣା ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଛି। ଗତ ୩ ତାରିଖରେ ଗଙ୍ଗାଙ୍କ ପ୍ରତି ହୋଇଥିବା ଅନ୍ୟାୟର ବିଭାଗୀୟ ତଦନ୍ତ କରାଯିବ। ଯିଏ ଦୋଷୀ ସାବ୍ୟସ୍ତ ହେବେ ତାଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଡିଏମ୍ଓ ନନ୍ଦ କହିଛନ୍ତି।
