ତିହିଡ଼ି,୧୪ା୬(କାଳନ୍ଦୀ ବେହେରା): ଭଦ୍ରକ ଜିଲା ଧୂଷୁରୀ କେବଳ ଏକ ସ୍ଥାନର ନାମ ନୁହେଁ, ଏହା ଏକ ଗର୍ବ ଓ ଗୌରବର ମାଟି। ସ୍ବାଧୀନତା ସଂଗ୍ରାମୀଙ୍କ ତ୍ୟାଗ, ବହୁ ଜନପ୍ରତିନିଧି ଓ ବିଶିଷ୍ଟ ବ୍ୟକ୍ତିତ୍ୱଙ୍କ ଜନ୍ମଭୂମି ଭାବେ ଧୂଷୁରୀର ଏକ ସ୍ବତନ୍ତ୍ର ପରିଚୟ ରହିଛି। ଭଦ୍ରକ-ଆରଡ଼ି ମୁଖ୍ୟ ସଡ଼କ ଉପରେ ଅବସ୍ଥିତ ଏହି ଜନବହୁଳ ଅଞ୍ଚଳ ଦୀର୍ଘଦିନ ଧରି ବ୍ୟବସାୟ, ଶିକ୍ଷା ଓ ଯାତାୟାତର କେନ୍ଦ୍ରବିନ୍ଦୁ ହୋଇ ରହିଆସିଛି।
କିନ୍ତୁ ଦୁଃଖ ଓ ପରିତାପର ବିଷୟ ହେଉଛି, ଧୂଷୁରୀ ବଜାରର ବର୍ତ୍ତମାନ ସ୍ଥିତି ଦିନକୁ ଦିନ ଜଟିଳ ହେବାରେ ଲାଗିଛି। ବଜାରର ରାସ୍ତା ସଂପ୍ରସାରଣ ହୋଇ ନ ଥିବା ବେଳେ ଦୋକାନ, ଯାନବାହନ ଓ ଲୋକଙ୍କ ସଂଖ୍ୟା ବହୁଗୁଣ ବୃଦ୍ଧି ପାଇଛି। କେତେକ ବ୍ୟବସାୟୀ ରାସ୍ତା ଉପରକୁ ଦୋକାନ ବଢ଼ାଇ ଦେଇଥିବାରୁ ଯାତାୟାତ ପାଇଁ ସ୍ଥାନ ଆହୁରି ସଂକୁଚିତ ହୋଇପଡ଼ିଛି। ଫଳରେ ସକାଳରୁ ସନ୍ଧ୍ୟା ପର୍ଯ୍ୟନ୍ତ ଟ୍ରାଫିକ୍ ସମସ୍ୟା ଲାଗି ରହୁଛି।
ବିଶେଷକରି ସ୍କୁଲ, କଲେଜ ଓ ଅଫିସ ସମୟରେ ଜାମ୍ ଚରମ ସୀମାରେ ପହଞ୍ଚୁଛି। ଜରୁରୀ ସେବା ଯଥା ଆମ୍ବୁଲାନ୍ସ ଓ ଅଗ୍ନିଶମ ଗାଡ଼ି ଚଳାଚଳ କରିବାରେ ମଧ୍ୟ ସମସ୍ୟା ସୃଷ୍ଟି ହେଉଛି। ପୂର୍ବରୁ ମଧ୍ୟ ଧୂଷୁରୀ ଅଞ୍ଚଳରେ ଜନସାଧାରଣ ବିଭିନ୍ନ ମୌଳିକ ସୁବିଧା ପାଇଁ ଆନ୍ଦୋଳନ କରିଥିବା ନଜିର ରହିଛି।
ଏବେ ସାଧାରଣ ଲୋକଙ୍କ ମଧ୍ୟରେ ଏକ ସ୍ବର ଜୋର ଧରିଛି। ଧୂଷୁରୀ ବଜାରର ତୁରନ୍ତ ରାସ୍ତା ସଂପ୍ରସାରଣ କରାଯାଉ ଓ ବଜାରକୁ ଏକ ନୂତନ ରୂପ ଦିଆଯାଉ। ଯୋଜନାବଦ୍ଧ ପାର୍କିଂ ବ୍ୟବସ୍ଥା, ଅତିକ୍ରମଣ ଉଚ୍ଛେଦ, ଫୁଟ୍ପାଥ ନିର୍ମାଣ ଏବଂ ଟ୍ରାଫିକ ପରିଚାଳନାର ସ୍ଥାୟୀ ବ୍ୟବସ୍ଥା କରାଗଲେ ଏହି ସମସ୍ୟାର ସମାଧାନ ସମ୍ଭବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଉଛି।
ଧୂଷୁରୀ ଭଳି ଏକ ଐତିହାସିକ ଓ ଜନବହୁଳ ଅଞ୍ଚଳ ଆଜି ବିକାଶର ଅପେକ୍ଷାରେ ରହିଛି। ପ୍ରଶାସନ, ଜନପ୍ରତିନିଧି ଓ ସ୍ଥାନୀୟ ଲୋକଙ୍କ ମିଳିତ ପ୍ରୟାସରେ ଧୂଷୁରୀ ବଜାରକୁ ଏକ ଆଧୁନିକ ଓ ସୁନ୍ଦର ବାଣିଜ୍ୟିକ କେନ୍ଦ୍ରରେ ପରିଣତ କରାଯାଇପାରିବ। ଏବେ ଦେଖିବାକୁ ବାକି ରହିଲା, ଲୋକଙ୍କ ଏହି ଦାବି ଉପରେ ପ୍ରଶାସନ କେବେ ପଦକ୍ଷେପ ନେଉଛି।
