ନୂଆଦିଲ୍ଲୀ,୨୯।୧୨: ୨୦୨୫ ବର୍ଷର ଶେଷ ଭାଗରେ ବଲିଉଡ୍ ବକ୍ସ ଅଫିସ୍ରେ ଆଦିତ୍ୟ ଧରଙ୍କ ନିର୍ଦ୍ଦେଶିତ ସ୍ପାଏ-ଥ୍ରୀଲର ‘ଧୁରନ୍ଧର’ ନିଜର ଜୟଯାତ୍ରା ଜାରି ରଖିଛି। ରଣବୀର ସିଂ ଓ ଅକ୍ଷୟ ଖାନ୍ନାଙ୍କ ଅଭିନୀତ ଏହି ଫିଲ୍ମଟି ଡିସେମ୍ବର ୫ରେ ମୁକ୍ତିଲାଭ କରିବା ପରେ ବର୍ତ୍ତମାନ ସୁଦ୍ଧା ବିଶ୍ୱସ୍ତରରେ ୧,୦୬୪ କୋଟି ଟଙ୍କା ସଂଗ୍ରହ କରି ଅନେକ ରେକର୍ଡ ଭାଙ୍ଗିଛି। ଏହି ସଫଳତା ସତ୍ତ୍ୱେ, ବର୍ଷର ସବୁଠାରୁ ବଡ଼ ଗ୍ଲୋବାଲ୍ ହିଟ୍ ତୁଳନାରେ ଏହା ବହୁ ପଛରେ ରହିଛି। ଚାଇନିଜ୍ ଆନିମେସନ୍ ଫିଲ୍ମ ‘ନେ ଜା-୨’ (Ne Zha 2) ଚଳିତ ବର୍ଷ ବକ୍ସ ଅଫିସ୍ରେ ଏକ ବିରାଟ ଝଡ଼ ସୃଷ୍ଟି କରି ପ୍ରାୟ ୧୮,୦୦୦ କୋଟି ଟଙ୍କା (୨.୨ ବିଲିୟନ ଡଲାର) ବ୍ୟବସାୟ କରି ସମସ୍ତଙ୍କୁ ଚକିତ କରିଦେଇଛି।
‘ନେ ଜା-୨’ ମାତ୍ର ୮୦ ମିଲିୟନ ଡଲାର ବଜେଟ୍ରେ ନିର୍ମିତ ହୋଇଥିଲେ ମଧ୍ୟ ଏହା ହଲିଉଡ୍ର ବଡ଼ ବଡ଼ ଫିଲ୍ମକୁ ପଛରେ ପକାଇ ଦେଇଛି। ଏହି ଫିଲ୍ମଟି ‘ଇନସାଇଡ୍ ଆଉଟ୍-୨’ର ରେକର୍ଡ ଭାଙ୍ଗି ବିଶ୍ୱର ସର୍ବକାଳୀନ ଶ୍ରେଷ୍ଠ ଆନିମେଟେଡ୍ ଫିଲ୍ମର ମାନ୍ୟତା ପାଇଛି। ଏଥିସହ, ଅବତାର (୨୦୦୯) ଏବଂ ଆଭେଞ୍ଜର୍ସ: ଏଣ୍ଡଗେମ୍ ଭଳି ଚଳଚ୍ଚିତ୍ର ପରେ ଏହା ବିଶ୍ୱର ସର୍ବାଧିକ ରୋଜଗାରକାରୀ ଫିଲ୍ମ ତାଲିକାରେ ପଞ୍ଚମ ସ୍ଥାନରେ ପହଞ୍ଚିଛି। ବିଶେଷ କଥା ହେଉଛି, ଏହି ଫିଲ୍ମର ରୋଜଗାରର ଶିଂହଭାଗ କେବଳ ଚାଇନାର ୮୦,୦୦୦ ସ୍କ୍ରିନ୍ରୁ ଆସିଛି।
ଏହା ଚାଇନିଜ୍ ପୌରାଣିକ କଥାବସ୍ତୁ ଉପରେ ଆଧାରିତ ଏକ ଫାଣ୍ଟାସି ଆନିମେସନ୍ ଫ୍ରାଞ୍ଚାଇଜ୍। ଏଥିରେ ଏକ ଶକ୍ତିଶାଳୀ ତଥା ବିପଥଗାମୀ ବାଳକର କାହାଣୀ ପ୍ରଦର୍ଶିତ ହୋଇଛି, ଯିଏ ନିଜର ଭାଗ୍ୟକୁ ବଦଳାଇବା ପାଇଁ ସଂଘର୍ଷ କରେ। ଚଳିତ ବର୍ଷର ଶ୍ରେଷ୍ଠ ହିଟ୍ ତାଲିକାରେ ‘ନେ ଜା-୨’ ପଛକୁ ଜୁଟୋପିଆ-୨ ଏବଂ ଲିଲୋ ଏଣ୍ଡ ଷ୍ଟିଚ୍ ଭଳି ଆନିମେଟେଡ୍ ଫିଲ୍ମଗୁଡ଼ିକ ରହିଛି, ଯାହା ପ୍ରମାଣ କରୁଛି ଯେ ୨୦୨୫ରେ ଆନିମେସନ୍ ଶିଳ୍ପ ବକ୍ସ ଅଫିସ୍ରେ ନିଜର ଦବଦବା ବଜାୟ ରଖିଛି।
