ପୁଣେ,୨୩।୩: ଇଂଲଣ୍ଡ ବିପକ୍ଷ ପ୍ରଥମ ଦିନିକିଆରେ ଗବ୍ବର ତଥା ଶିଖର ଧଓ୍ବନଙ୍କ ଧୂଆଁଧାର ବ୍ୟାଟିଂ ଦେଖିବାକୁ ମିଳିପାରେ ବୋଲି ଆଶା କରାଯାଉଥିଲା। ଶେଷରେ ତାହା ହିଁ ହୋଇଛି। ଶତକ ମାରିବାରୁ ବଞ୍ଚିତ ହୋଇଥିଲେ ହେଁ ଧଓ୍ବନ ବିଦେଶୀ ବୋଲରଙ୍କୁ ଅଡ଼ୁଆରେ ପକାଇଦେଇଥିଲେ। ମ୍ୟାଚ୍ରେ ସେ ୯୮ରନ୍ କରିଥିବା ବେଳେ ଇଂଲଣ୍ଡ ବିପକ୍ଷରେ ଏହା ତାଙ୍କର ସର୍ବଶ୍ରେଷ୍ଠ ସ୍କୋର।
ଟସ୍ ଜିତିବା ପରେ ଇଂଲଣ୍ଡ ପ୍ରଥମେ ବ୍ୟାଟିଂ କରିବା ଲାଗି ଭାରତକୁ ଆମନ୍ତ୍ରିତ କରିଥିଲା। ଧଓ୍ବନ ରୋହିତ ଶର୍ମାଙ୍କ ସହ ଓପନିଂ ପାଇଁ ଆସିଥିବା ବେଳେ ପ୍ରଥମ ଉଇକେଟ ପାଇଁ ୬୪ ରନ୍ର ଭାଗିଦାରୀ କରିଥିଲେ। ପରେ ରୋହିତ ୨୮ ରନ୍ କରି ଆଉଟ୍ ହୋଇଥିଲେ। ପରେ ଧଓ୍ବନ ୬୮ ବଲ୍ରେ ନିଜର ଅର୍ଦ୍ଧଶତକ ପୂରଣ କରିଥିବା ବେଳେ ୧୦୬ ବଲ୍ରେ ୧୧ ଚୌକା ଏବଂ ଦୁଇ ଛକା ସହାୟତାରେ ୯୮ ରନ୍ କରିଥିଲେ। ସେ ଅଧିନାୟକ ବିରାଟ କୋହଲିଙ୍କ ସହ ଦ୍ୱିତୀୟ ଉଇକେଟ ପାଇଁ ୧୦୫ ରନ୍ର ଭାଗିଦାରୀ ମଧ୍ୟ କରିଥିଲେ।
ତେବେ ୩୫ ବର୍ଷୀୟ ଏହି କ୍ରିକେଟର ଓପନର ଭାବେ ଦିନିକିଆରେ ୪୮ଥର ୫୦ରନ୍ରୁ ଅଧିକ ପାଳି ଖେଳିଛନ୍ତି। ପୂର୍ବରୁ ବିରେନ୍ଦ୍ର ସେହଓ୍ବାଗ ମଧ୍ୟ ଓପନର ଭାବେ ସମାନ ଥର ଏଭଳି କରିଥିଲେ। ଏହି ମାମଲାରେ ସର୍ବାଗ୍ରେ ରହିଛନ୍ତି ସଚିନ ତେନ୍ଦୁଲକର। ସେ ୧୨୦ ଥର ୫୦ରୁ ଅଧିକ ରନ୍ କରିଥିଲେ। ସେହିଭଳି ସୌରଭ ଗାଙ୍ଗୁଲୀ ୭୭ ଥର ଏବଂ ରୋହିତ ଶର୍ମା ୫୮ଥର ଏଭଳି କରିଛନ୍ତି। ଏବେ ଧଓ୍ବନ ପୁଣିଥରେ ଫର୍ମକୁ ଫେରି ଆଲୋଚକଙ୍କ ମୁହଁ ବନ୍ଦ କରିଛନ୍ତି।
