ବରଗଡ଼,୯।୧(ପ୍ରେମାନନ୍ଦ ଖମାରୀ):ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ଗତ ୩ତାରିଖ ଶେଷ ହୋଇଛି। ଇତିମଧ୍ୟରେ ଉଦ୍ଯାପନୀକୁ ୪ଦିନ ବିତି ଯାଇଛି। ମହୋତ୍ସବ ସରିଛି ସତ, ହେଲେ ଗତ ଧନୁଯାତ୍ରାକୁ ନେଇ ଏବେ ସାଧାରଣରେ ଚର୍ଚ୍ଚା ଥମି ନାହିଁ। ଚା ଖଟିଠାରୁ ଆରମ୍ଭ କରି ବରଗଡ଼ ସହରର ବିଭିନ୍ନ ସ୍ଥାନରେ କଂସ ଏବଂ ଅନ୍ୟ କଳାକାରଙ୍କ ଅଭିନୟଠାରୁ ଆରମ୍ଭ କରି ସାଜସଜ୍ଜା, ବିଭିନ୍ନ କମିଟିର ଦକ୍ଷତାକୁ ନେଇ ନାନାଦି ଆଲୋଚନା, ପର୍ଯ୍ୟାଲୋଚନା ଚାଲିଛି। ମହୋତ୍ସବ ଚାଲିଥିବା ବେଳେ ଯେଉଁ ସହର ସାଜସଜ୍ଜାରେ ଝଲସି ଉଠିଥିଲା, ଧନୁଯାତ୍ରା ସରିବା ପରେ ସେଠାକାର ସହରବାସୀଙ୍କୁ ଏବେ ପ୍ରଦୂଷଣ ଚିନ୍ତା ଘାରିଛି। ସହରର ବିଭିନ୍ନ ସ୍ଥାନରେ କୁଢ଼କୁଢ଼ ମଇଳା ଆବର୍ଜନା ଏବେ ସୁଦ୍ଧା ପଡ଼ି ରହିଛି। ଧନୁଯାତ୍ରା ମହୋତ୍ସବ ଆୟୋଜନ ପାଇଁ ସିଂହଭାଗ ଆୟ ଯୋଗାଉଥିବା ସ୍ଥାନୀୟ ଜର୍ଜ ହାଇସ୍କୁଲ ପଡ଼ିଆର ସାମ୍ପ୍ରତିକ ଅବସ୍ଥା ସ୍ଥାନୀୟ ସଚେତନ ନାଗରିକଙ୍କୁ ବ୍ୟଥିତ କରିଛି। ପ୍ଲାଷ୍ଟିକ ଆବର୍ଜନା ସହିତ ଅନ୍ୟ ଆବର୍ଜନା ବସ୍ତୁ ସେଠାରେ ପଡ଼ି ରହିଥିବାବେଳେ ସେଗୁଡ଼ିକୁ ଅନ୍ୟତ୍ର ସ୍ଥାନାନ୍ତରଣ କରିବା ବଦଳରେ ସେଠାରେ ପୋଡ଼ି ଦିଆଯାଉଛି। ଶୁକ୍ରବାର ଏଭଳି କରାଯିବା ପରେ ଅଞ୍ଚଳ ଧୂଆଁମୟ ହୋଇଥିଲା। ଏହାକୁ ଦେଖି ସହରକୁ ପ୍ରଦୂଷଣମୁକ୍ତ କରିବା ପରିବର୍ତ୍ତେ ସହରବାସୀଙ୍କୁ ପ୍ରଦୂଷଣ ମୁହଁକୁ ଠେଲି ଦିଆଯାଉଛି ବୋଲି ସଚେତନ ନାଗରିକ ମହଲରେ ମତପ୍ରକାଶ ପାଇଛି।
ଧନୁଯାତ୍ରା ମହୋତ୍ସବ ଚାଲିଥିବା ସମୟରେ ସ୍ଥାନୀୟ ଜର୍ଜ ହାଇସ୍କୁଲ ପଡ଼ିଆ ମିନାବଜାର ପାଲଟିଥାଏ। ଏହି ପଡ଼ିଆକୁ ଟେଣ୍ଡର ମାଧ୍ୟମରେ ବିଭିନ୍ନ ଷ୍ଟଲ ଆଦି ଖୋଲିବା ପାଇଁ ବ୍ୟବସାୟୀଙ୍କୁ ଦିଆଯାଇଥାଏ। ମହୋତ୍ସବରେ ହେଉଥିବା ଖର୍ଚ୍ଚ ବାବଦକୁ ଏଠାରୁ ହି ସର୍ବାଧିକ ଆୟ ହୋଇଥାଏ ଏବଂ ସେହି ଆୟ ଟଙ୍କା ଧନୁଯାତ୍ରା ମହୋତ୍ସବ ଆୟୋଜନ ପାଇଁ ବେଶ ସହାୟକ ହୋଇଥାଏ। ତେବେ ପ୍ଲାଷ୍ଟିକ ବର୍ଜନ ପାଇଁ ପୌର ପ୍ରଶାସନ ବାରମ୍ବାର ଡାକବାଜି ଯନ୍ତ୍ରରେ ପ୍ରଚାର କରୁଛି। କିନ୍ତୁ ଏବେ ମିନାବଜାର ପଡ଼ିଆରେ ଯେଭଳିଭାବେ ଛିନ୍ନଛତ୍ର ହୋଇ ପ୍ଲାଷ୍ଟିକ ଆବର୍ଜନା ପଡ଼ିଥିବା ପରିଲକ୍ଷିତ ହୋଇଛି, ସେଥିରୁ ପୌର ପ୍ରଶାସନର ଦକ୍ଷତା ପଦାରେ ପଡ଼ି ଯାଇଛି। ସେହିପରି ସେଭଳି ଆବର୍ଜନାକୁ ଡମ୍ପିଂୟାର୍ଡକୁ ସ୍ଥାନାନ୍ତର କରିବା ବଦଳରେ ସେଠାରେ ହିଁ ତାକୁ ଜାଳିପୋଡ଼ି ଦେବା ଆହୁରି ଚର୍ଚ୍ଚାର ବିଷୟ ହୋଇଛି। ତେବେ କେବଳ ଧନୁଯାତ୍ରା ମହୋତ୍ସବ ନୁହେଁ, ଜିଲାସ୍ତରୀୟ ସ୍ବାଧୀନତା ଦିବସ, ସାଧାରଣତନ୍ତ୍ର ଦିବସଠାରୁ ଆରମ୍ଭ କରି ଅନ୍ୟ ବିଭିନ୍ନ ସରକାରୀ କାର୍ଯ୍ୟକ୍ରମର ବଡ଼ ଆୟୋଜନ ଜର୍ଜ ହାଇସ୍କୁଲ ପଡ଼ିଆରେ ହୋଇଥାଏ। ମାତ୍ର ଉକ୍ତ ପଡ଼ିଆର ବିକାଶ ଦିଗହରା ହୋଇ ପଡ଼ିଛି। ବର୍ଷବର୍ଷ ଧରି ପଡ଼ିଆ ଯେଭଳିକୁ ସେଭଳି ପଡ଼ି ରହିଛି। ପଡ଼ିଆର ବିକାଶ ପ୍ରତି ସମସ୍ତେ ଆଖି ବୁଜି ଦେଇଥିବା ଲୋକେ ଅଭିଯୋଗ କରିଛନ୍ତି। ଅନ୍ୟପଟେ ଧନୁଯାତ୍ରା ଭଳି ବିଭିନ୍ନ କାର୍ଯ୍ୟକ୍ରମ ସରିବା ପରେ ପଡ଼ିଆଟି ସେଭଳି ପ୍ରଦୂଷିତ ହୋଇ ରହିବା ସହରବାସୀଙ୍କୁ ଚକିତ କରି ପକାଇଛି। ଏଥିପ୍ରତି ସ୍ଥାନୀୟ ଜନ ପ୍ରତିନିଧି ଏବଂ ପ୍ରଶାସନିକ ଅଧିକାରୀମାନେ ଦୃଷ୍ଟି ଦେଇ ବିହିତ ପଦକ୍ଷେପ ନେବା ପାଇଁ ସାଧାରଣରେ ଦାବି ହୋଇଛି।
Dharitri – Odisha’s No.1 Odia Daily
