ଧାମନଗର,୨୬।୧୦ (ସ୍ବ.ପ୍ର./ଡି.ଏନ.ଏ.): ଧାମନଗର ନିର୍ବାଚନମଣ୍ଡଳୀ ଭାଜପା କର୍ମୀଙ୍କ ଦଳ ଛାଡ଼ିବା ପ୍ରସଙ୍ଗ ତଥା ବିଜେଡିରେ ଭାଜପାର କର୍ମୀ, ସମର୍ଥକଙ୍କ ଯୋଗଦାନ ଘଟଣାକୁ ଖଣ୍ଡନ କରିଛି ଭାଜପା। ଭାଜପା ଧାମନଗର ବ୍ଲକ ଶହୀଦନଗରଠାରେ ସୋମବାର ଅପରାହ୍ନରେ ଏକ ଖବରଦାତା ସମ୍ମିଳନୀ ମାଧ୍ୟମରେ ଏଭଳି ପ୍ରତିକ୍ରିୟା ରଖିବା ସହ ଏହା ଜନସାଧାରଣଙ୍କୁ ବିଭ୍ରାନ୍ତ କରିବା ପାଇଁ ବିଜେଡିର ହୀନ ଚକ୍ରାନ୍ତ ବୋଲି ଅଭିଯୋଗ କରିଛି। ଗତ ଦୁଇଦିନ ଧରି ବିଜେଡି ପକ୍ଷରୁ ମିଶ୍ରଣ ପର୍ବ କରାଯାଇ ବିଭିନ୍ନ ଗଣମାଧ୍ୟମରେ କୁହାଯାଇଛି ଯେ, ଧାମନଗର ବ୍ଲକର କଟସାହି ଏବଂ ଖପରପଦା ପଞ୍ଚାୟତର ବହୁସଂଖ୍ୟକ ଭାଜପା କର୍ମୀ ସେମାନଙ୍କ ଦଳକୁ ଛାଡ଼ି ବିଜେଡିରେ ସାମିଲ ହୋଇଛନ୍ତି। ଏହି ଘଟଣା ଉପରେ କଟସାହି, ଖପରପଦା ଭାଜପା ପକ୍ଷରୁ ଏହି ଖବରଦାତା ସମ୍ମିଳନୀରେ ଜିଲା ମିଡିଆ ସେଲ୍ର ଅଧ୍ୟକ୍ଷ ବୈକୁଣ୍ଠ ନାଥ ସାହୁଙ୍କ ପୌରୋହିତ୍ୟରେ ଦଳର ନେତୃମଣ୍ଡଳୀ ଉପସ୍ଥିତ ରହି କହିଛନ୍ତି, ବିଜେଡି ମିଶ୍ରଣ ପର୍ବ ନାମରେ ଯେଉଁ କାର୍ଯ୍ୟକ୍ରମ କରୁଛି ସେଥିରେ କେହି ଜଣେ ବି ଭାଜପା କର୍ମୀ ଯୋଗ ଦେଇନାହାନ୍ତି। ଅପରପକ୍ଷେ ଉପରିସ୍ଥ ନେତାମାନଙ୍କ ନିକଟରେ ବ୍ୟକ୍ତିଗତ ପ୍ରତିଷ୍ଠା ଓ ପତିଆରାକୁ ସୁଦୃଢ଼ କରିବା ଲାଗି କେତେଜଣ ବିଜେଡି ନେତା ସେମାନଙ୍କ ସମର୍ଥକଙ୍କୁ ନେଇ ରାଜ୍ୟସ୍ତରୀୟ ନେତାଙ୍କ ଆଗରେ ଏମାନେ ଭାଜପାର ବୋଲି ପରିଚୟ ଦେଇ ମିଶ୍ରଣର ମିଛ ନାଟକ କରୁଛନ୍ତି। ଧାମନଗର ଉପନିର୍ବାଚନ ପରିପ୍ରେକ୍ଷୀରେ ଲୋକଙ୍କୁ ବିଭ୍ରାନ୍ତି କରିବା ଭଳି ମନ୍ଦ ରାଜନୈତିକ ଉଦ୍ଦେଶ୍ୟ ରଖି ଶାସକ ଦଳ ଯେଉଁ ଚାଲ ଖେଳୁଛି ତାହା ସଫଳ ହେବ ନାହିଁ। ଅସୁରାଳି ଜୋନ୍ ପ୍ରଭାରୀ ଉଦୟ ନାରାୟଣ ମଲ୍ଲିକ, ଯୁବ ଆଇନଜୀବୀ ରମାକାନ୍ତ ସାହୁ, ଭାଜପା ନେତା ସରୋଜ କୁଅଁର, ପୂର୍ବତନ ସରପଞ୍ଚ ଗୟାଧର ନାୟକ, ମଣ୍ଡଳ ସାଧାରଣ ସମ୍ପାଦକ ଗଣେଶ ଦାଶ, ପ୍ରତାପ ପାଣିଗ୍ରାହୀ, ଜନାର୍ଦ୍ଦନ ହାଜରା, ଦେବାଶିଷ ନାୟକ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।
