ଦିଗପହଣ୍ଡି,୧୧।୬(ଅଶେଷ ନାଥ ମିଶ୍ର): ପବିତ୍ର ଦେବସ୍ନାନ ପୂର୍ଣ୍ଣିମା ଅବସରରେ ବୁଧବାର ଦିଗପହଣ୍ଡି ରାଜବାଟି ପରିସରରେ ଥିବା ଶ୍ରୀଜଗନ୍ନାଥ ମନ୍ଦିରରେ ବିଜେ ଶ୍ରୀଜଗନ୍ନାଥ, ଶ୍ରୀବଳଭଦ୍ରଙ୍କ ସମେତ ସାନଦାଣ୍ଡ ସାହି ସ୍ଥିତ ଶ୍ରୀ ଦଧିବାମନ ଜଗନ୍ନାଥ , ରାଣିସାହି ଛକରେ ବିଜେ ଶ୍ରୀପତିତପାବନ ଜଗନ୍ନାଥ ଏବଂ ଅଞ୍ଚଳ କଲୋନୀ ସ୍ଥିତ ଶ୍ରୀଜଗନ୍ନାଥଙ୍କ ମନ୍ଦିରରେ ସମସ୍ତ ନୀତିକାନ୍ତି ଅନୁଷ୍ଠିତ ହୋଇଥିଲା। ରାଜବାଟିି ପରିସରରେ ଥିବା ଶ୍ରୀଜଗନ୍ନାଥ ମନ୍ଦିର ପରିସରରେ ଥିବା ମହାପ୍ରଭୁଙ୍କ ସ୍ନାନ ମଣ୍ଡପକୁ ପ୍ରଥମେ ଅଭିମନ୍ତ୍ରିତ ଜଳରେ ସଂସ୍କାର କରାଯିବା ପରେ ଚତୁର୍ଦ୍ଧାମୂର୍ତ୍ତିଙ୍କୁ ପହୁଣ୍ଡିଆ ମାନେ ବିଜେ କରାଇଥିଲେ। ଏହାପରେ ମଣ୍ଡପ ଉପରେ ଅବକାଶ ନୀତି ଓ ଦିବ୍ୟ ସ୍ନାନ ଯଥାବିଧି ସମାପନ ହେବା ପରେ ରାଜ ପୁରୋହିତ ଦେବୀପ୍ରସାଦ ରଥ ପୂର୍ବ ପ୍ରଚଳିତ ପରମ୍ପରା ପ୍ରକାରେ ଶ୍ରୀଜୀଉଙ୍କ ପୂଜାର୍ଚ୍ଚନା କରିଥିଲେ। ଶ୍ରୀ ଜଗନ୍ନାଥ,ଶ୍ରୀବଳଭଦ୍ର , ଦେବୀ ସୁଭଦ୍ରାଙ୍କ ଏହି ଦିବ୍ୟସ୍ନାନ ଓ ଗଜାନନ ବେଶ ଦେଖିବା ପାଇଁ ସହର ତଥା ଆଖପାଖ ଗ୍ରାମାଞ୍ଚଳର ବହୁ ଶ୍ରଦ୍ଧାଳୁଙ୍କ ସମାଗମ ହୋଇଥିଲା।
