ପୁରୀ ଅଫିସ,୧୧।୧୦: ଦଶହରା, ଦୀପାବଳି, ବଡ଼ ଏକାଦଶୀ ଓ କାର୍ତ୍ତିକପୂର୍ଣ୍ଣିମାରେ ଶ୍ରୀମନ୍ଦିରରେ ସର୍ବସାଧାରଣ ଦର୍ଶନ ବନ୍ଦ ରହିବ। ଏଥିସହ ପୂର୍ବଭଳି ସବୁ ରବିବାର ମଧ୍ୟ ଦର୍ଶନ ବନ୍ଦ ରହିବ। ତେବେ ୨୦ ତାରିଖ କୁମାରପୂର୍ଣ୍ଣିମାରେ ଶ୍ରୀମନ୍ଦିରରେ ସର୍ବସାଧାରଣ ଦର୍ଶନ ହେବ। ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୧୮ତାରିଖରେ ପୁରୀ ଆସି ପରିକ୍ରମା ଯୋଜନାରେ ପ୍ରକଳ୍ପ କାର୍ଯ୍ୟର ଶୁଭାରମ୍ଭ କରିବେ। ସୋମବାର ନୀଳାଦ୍ରି ଭକ୍ତ ନିବାସରେ ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷନ୍ କୁମାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଛତିଶା ନିଯୋଗ ବୈଠକରେ ଏହି ନିଷ୍ପତ୍ତି ନିଆଯାଇଛି।
ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି, କରୋନା ସଂକ୍ରମଣ ଯୋଗୁ ଚଳିତବର୍ଷ ରାଜ୍ୟ ସରକାରଙ୍କ ହବିଷିଆଳି ଯୋଜନା ବନ୍ଦ ରହିବ। ହବିଷିଆଳିଙ୍କ ପାଇଁ କୌଣସି ବ୍ୟବସ୍ଥା ହେବ ନାହିଁ। ତେଣୁ କାର୍ତ୍ତିକ ବ୍ରତ ଓ ଧର୍ମମାସ ପାଳନ ପାଇଁ ହବିଷିଆଳି ପୁରୀ ନ ଆସିବାକୁ ପରାମର୍ଶ ଦିଆଯାଇଛି। ମାତ୍ର କେହି ମହାପ୍ରଭୁଙ୍କ ଦର୍ଶନ କରିବାକୁ ଚାହିଁଲେ ଆସିପାରିବେ। କାର୍ତ୍ତିକ ମାସରେ କରୋନା ସଂକ୍ରମଣ ବ୍ୟାପିବା ଆଶଙ୍କା ଥିବାରୁ ଏଥର କୌଣସି ବ୍ୟବସ୍ଥା ହେବ ନାହିଁ। ମାତ୍ର ମହାପ୍ରସାଦ ସେବନ ଓ ବିକ୍ରି ଲାଗି ସ୍ବତନ୍ତ୍ର ବ୍ୟବସ୍ଥା କରାଯିବ। ସେହିଭଳି ଶ୍ରୀମନ୍ଦିର ପ୍ରଶାସନର କର୍ମଚାରୀ, ଅଧିକାରୀ କିମ୍ବା ସେବାୟତ ଯେ କେହି ପାରମ୍ପରିକ ବେଶ ପୋଷାକରେ ଭିତରକାଠ ଆଗକୁ ବା ଗର୍ଭଗୃହକୁ ଯାଇପାରିବେ। କୁମାରପୂର୍ଣ୍ଣିମା ପରଠାରୁ ସେବାୟତମାନେ ପାରମ୍ପରିକ ବେଶ ପୋଷାକରେ ପୋଖରିଆ ଭିତରକୁ ଯିବେ। ସେହିପରି ଦୀପାବଳି ପରଦିନଠାରୁ ପୋଖରିଆ ଭିତରକୁ ଗଲେ ପାରମ୍ପରିକ ବେଶ ପୋଷାକରେ ଯିବାକୁ ବାଧ୍ୟ। ପ୍ରଥମ ପର୍ଯ୍ୟାୟରେ ଏହି ନିଷ୍ପତ୍ତିକୁ କାର୍ଯ୍ୟକାରୀ କରାଯିବା ପରେ ଦ୍ୱିତୀୟ ପର୍ଯ୍ୟାୟରେ ଅନ୍ୟ କିଛି ନିଷ୍ପତ୍ତି ନିଆଯିବ।
