ବାରାଣସୀ,୧୫।୨: ମହାକୁମ୍ଭରେ ସ୍ନାନ କରିବା ଲାଗି ନେପାଳରୁ ଆସିଥିବା ଏକ ଯାତ୍ରୀ ଭର୍ତ୍ତି ବସ୍ ଉତ୍ତର ପ୍ରଦେଶର ଗାଜିପୁର ବାରାଣସୀ ରାଜପଥରେ ଓଲଟି ପଡ଼ିଛି। ଦୁର୍ଘଟଣାରେ ବସ୍ରେ ଯାତ୍ରା କରୁଥିବା ଲୋକମାନେ ଗୁରୁତର ଆହତ ହୋଇଛନ୍ତି। ଏହା ଏତେ ଭୟଙ୍କର ଥିଲା ଯେ ଦୁର୍ଘଟଣାସ୍ଥଳ ଚିତ୍କାରରେ ଫାଟି ପଡ଼ିଥିଲା। ସ୍ଥାନୀୟ ଲୋକେ ଏବଂ ପୋଲିସ ସେଠାରେ ପହଞ୍ଚି ଉଦ୍ଧାର କାର୍ଯ୍ୟ ତ୍ୱରାନ୍ବିତ କରିଥିଲେ। ଏଥିରେ ମୋଟ ୨୫ ଜଣ ଗୁରୁତରଙ୍କୁ ନିକଟସ୍ଥ ମେଡିକାଲ କଲେଜକୁ ପଠାଯାଇଛି। ସେଠାରେ ଡାକ୍ତର ଜଣଙ୍କୁ ମୃତ ଘୋଷଣା କରିଥିବା ବେଳେ ଅନ୍ୟ ୨୪ ଜଣ ଆହତ ଚିକିତ୍ସାଧୀନ ଅଛନ୍ତି।
ଭୋର ସମୟରେ ମହାକୁମ୍ଭ ପାଇଁ ନେପାଳରୁ ଯାତ୍ରୀ ଭର୍ତ୍ତି ଏକ ବସ ଗାଜିପୁର ଜିଲାର ଗାଜିପୁର ବାରାଣସୀ ରାଜପଥର ସଦର କୋତୱାଲି ଅଞ୍ଚଳର ମିରନାପୁର ଗାଁ ନିକଟରେ ଯାଉଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ଏହାପରେ ସେଠାରେ ନିକଟସ୍ଥ ଗ୍ରାମବାସୀ ଏବଂ ପୋଲିସ ପ୍ରଶାସନର ସହାୟତାରେ ସମସ୍ତ ୨୫ ଆହତଙ୍କୁ ସରକାରୀ ମେଡିକାଲ କଲେଜକୁ ପଠାଯାଇଥିଲା। ହେଲେ ଜଣେ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ, ୨୪ ଜଣ ଯାତ୍ରୀ ଚିକିତ୍ସାଧୀନ ଅଛନ୍ତି। ସେମାନଙ୍କମଧ୍ୟରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ବୋଲି କୁହାଯାଉଛି। ଦୁର୍ଘଟଣାରେ ଜଣେ ଯାତ୍ରୀଙ୍କ ହାତ କଟିଯାଇଛି ଏବଂ ତାଙ୍କର ଅସ୍ତ୍ରୋପଚାର ଚାଲିଛି।
ସୂଚନାନୁଯାୟୀ, ନେପାଳର ବାରା ଜିଲ୍ଲାରୁ ପ୍ରାୟ ୪୨ ଜଣ ତୀର୍ଥଯାତ୍ରୀ ମହାକୁମ୍ଭରେ ସ୍ନାନ କରିବା ପାଇଁ ଗାଜିପୁର ଦେଇ ପ୍ରୟାଗରାଜ ଏବଂ ବାରାଣସୀକୁ ଏକ ବସ ଯୋଗେ ଯାତ୍ରା କରୁଥିଲେ। ଶନିବାର ସକାଳେ ବସ ଡ୍ରାଇଭର ପ୍ରଥମେ ଗୋଟିଏ ଗୁଟ୍ଖା ଚିରି ତାଙ୍କ ପାଟିରେ ପୁରାଇ ଥିଲେ। ଯାତ୍ରୀମାନେ ମନା କରିବା ସତ୍ତ୍ୱେ, ଡ୍ରାଇଭରଜଣଙ୍କ ଦ୍ୱିତୀୟ ପ୍ୟାକେଟଟିକୁ ମଧ୍ୟ ଷ୍ଟିଅରିଂ ଛାଡି ଖୋଲି ଦୁଇ ହାତରେ ପାଟିରେ ପକାଇଥିଲେ। ଏହି ସମୟରେ ବସ୍ଟି ବିକଟାଳ ଶବ୍ଦ କରି ଓଲଟି ପଡ଼ିଥିଲା। ପରେ ସେଠାରେ ଉତ୍ତେଜନା ପ୍ରକାଶ ପାଇଥିଲା। ଶବ୍ଦ ଶୁଣି ପାଖ ଗାଁ ଲୋକ ମଧ୍ୟ ଘଟଣାସ୍ଥଳରେ ପହଞ୍ଚି ସମସ୍ତ ଯାତ୍ରୀଙ୍କୁ ଉଦ୍ଧାର କରିବାରେ ଲାଗି ପଡ଼ିଥିଲେ।
ଏହା ପରେ କିଛି ଲୋକ ୧୧୨ କୁ ଫୋନ କରି ଏ ବିଷୟରେ ଜଣାଇଥିଲେ। ସୂଚନା ପାଇବା ପରେ ସ୍ଥାନୀୟ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ପୋଲିସ ସହାୟତାରେ ସମସ୍ତ ଆହତଙ୍କୁ ତୁରନ୍ତ ଜିଲା ଡାକ୍ତରଖାନାକୁ ପଠାଯାଇଥିଲା। ବସ ତଳେ ଫସି ରହିଥିବା ଜଣେ ଯାତ୍ରୀଙ୍କୁ ବହୁ କଷ୍ଟରେ ବସ୍ରୁ ବାହାର କରାଯାଇ ସରକାରୀ ମେଡିକାଲ କଲେଜକୁ ପଠାଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
