ଦିଗପହଣ୍ଡି,୧୯|୬(ଅଶେଷ ନାଥ ମିଶ୍ର) ଗଞ୍ଜାମ ଜିଲା ଦିଗପହଣ୍ଡି ବ୍ଲକ କାର୍ଯ୍ୟାଳୟରସହକାରୀ ଯନ୍ତ୍ରୀ ଇଂ. ସୁଶାନ୍ତ କୁମାର ଚୌଧୁରୀ ଙ୍କ ପ୍ରାୟ ୭ ମାସ ହେଲା ଜଗନ୍ନାଥ ପ୍ରସାଦ ବ୍ଲକ କାର୍ଯ୍ୟାଳୟ କୁ ବଦଳି ହେଲା ପରେ ମଧ୍ୟ ଅଦ୍ୟାବଧି ୬ ପଞ୍ଚାୟତ ଅଧିନ ବିଭିନ୍ନ ଗ୍ରାମରେ କରାଯାଇଥିବା ଉନ୍ନୟନ ମୂଳକ କାର୍ଯ୍ୟ ଗୁଡ଼ିକର ବିଲ୍ ମଞ୍ଜୁରୀ ପାଇଁ ସେ ଦସ୍ତଖତ କରୁନଥିବା କାରଣରୁ କାମ କରିଥିବା ଲୋକେ ହଇରାଣ ହେଉଛନ୍ତି। ପୂର୍ବରୁ ସହକାରୀ ଯନ୍ତ୍ରୀ ଙ୍କୁ ଦିଗପହଣ୍ଡି ବ୍ଲକ ଅଧିନ ଭ୍ରମରପୁର, ଗୌଡ଼ଗାଁ,ଚୌଧୁରୀ ଟିକରପଡା, ବିଜୟ ଲକ୍ଷ୍ମୀନାରାୟଣପୁର, ଗୋକର୍ଣ୍ଣପୁର ଓ ବଡଡୁମ୍ବୁଳା ପ୍ରଭୃତି ୬ଟି ପଞ୍ଚାୟତ ଅଧିନ ଗାଁ ମାନଙ୍କର ବିଭିନ୍ନ ଉନ୍ନୟନ ମୂଳକ ପ୍ରକଳ୍ପ କାର୍ଯ୍ୟ ତଦାରଖ କରିବା ନିମନ୍ତେ ବିଡ଼ିଓ ଅନାମିକା ପାଣ୍ଡେ ଦାୟିତ୍ଵ ଦେଇଥିଲେ। ଏହି ସବୁ ପଞ୍ଚାୟତର ବିଭିନ୍ନ ଉନ୍ନୟନ ପ୍ରକଳ୍ପ କାର୍ଯ୍ୟ ଦୀର୍ଘଦିନ ହେଲା ସରିଥିଲେ ମଧ୍ୟ ଏଯାବତ୍ ବିଲ୍ ମଞ୍ଜୁରୀ ହୋଇନାହିଁ।ପ୍ରକଳ୍ପ ନିର୍ମାଣ ଦାୟିତ୍ବ ନେଇ ଖର୍ଚ୍ଚ କରିଥିବା ଲୋକଙ୍କୁ ପ୍ରାୟ ୭ ମାସ ହେଲା ପ୍ରାପ୍ୟ ଅର୍ଥରାଶି ମିଳିପାରିନାହିଁ। ଫଳରେ ନୂତନ ପ୍ରକଳ୍ପ ନିର୍ମାଣ କାର୍ଯ୍ୟ ନିମନ୍ତେ ଅନ୍ୟ କେହି ଆଗ୍ରହ ପ୍ରକାଶ କରୁନଥିବା କାରଣରୁ ସମ୍ପୃକ୍ତ ପଞ୍ଚାୟତ ଅଞ୍ଚଳରେ ଉନ୍ନୟନ କାର୍ଯ୍ୟ ଠପ୍ ହୋଇଯାଇଛି। ଉକ୍ତ ସହକାରୀ ଯନ୍ତ୍ରୀ ଦିଗପହଣ୍ଡି ବ୍ଲକ କାର୍ଯ୍ୟାଳୟରୁ ରିଲିଭ୍ ହୋଇ ଜଗନ୍ନାଥ ପ୍ରସାଦ ବ୍ଲକ କାର୍ଯ୍ୟାଳୟରେ ଜଏନିଂ ରିପୋର୍ଟ ପ୍ରଦାନ କରି କାର୍ଯ୍ୟଭାର ଗ୍ରହଣ କରିସାରିଥିଲେ ମଧ୍ୟ ସେ ପୂର୍ବରୁ ଦାୟିତ୍ୱରେ ଥିବା ଦିଗପହଣ୍ଡି ବ୍ଲକ ୬ ପଞ୍ଚାୟତର ଉନ୍ନୟନ କାର୍ଯ୍ୟ କରିଥିବା ଲୋକଙ୍କ ବିଲ୍ ମଞ୍ଜୁର ନଥି ରେ ଦସ୍ତଖତ କରୁନଥିବା କାରଣରୁ ସେମାନେ ହଟହଟାର ସମ୍ମୁଖୀନ ହୋଇଛନ୍ତି। ଏନେଇ ବିଡ଼ିଓ ଙ୍କୁ ପଚାରିବାରୁ ସହକାରୀ ଯନ୍ତ୍ରୀ ଜଣକ ସମସ୍ତ ଉନ୍ନୟନ ପ୍ରକଳ୍ପ କାର୍ଯ୍ୟର ବିଲ୍ ନକରିବା ପର୍ଯ୍ୟନ୍ତ ତାଙ୍କ ଏଲପିସି ଜଗନ୍ନାଥ ପ୍ରସାଦ ବ୍ଲକ କାର୍ଯ୍ୟାଳୟକୁ ପଠାଯିବ ନାହିଁ ବୋଲି କହିଛନ୍ତି।
