ବ୍ରହ୍ମପୁର ଅଫିସ,୨୯।୩: ବ୍ରହ୍ମପୁର ରେଳ ଷ୍ଟେଶନର ବିକାଶ, ରେଳ ଟର୍ମିନାଲ ନିର୍ମାଣ ଦାବିରେ ଓଡ଼ିଶା ଡେଭଲପ୍ମେଣ୍ଟ୍ ଫୋରମ୍ ପୂର୍ବତଟ ରେଲୱେ ଉପମହାପ୍ରବନ୍ଧକ ଅଶୋକ କୁମାର ମିଶ୍ର ଓ ସିପିଟିଏମ୍(ଚିଫ୍ ପାସେଞ୍ଜର ଟ୍ରାନ୍ସପ୍ରୋଟେକ୍ଶନ ମ୍ୟାନେଜର) ଜେ.ପି. ମିଶ୍ରଙ୍କ ସହ ଭୁବନେଶ୍ୱର ରେଲୱେ କାର୍ଯ୍ୟାଳୟଠାରେ ଆଲୋଚନା କରିଛନ୍ତି। ଏଥିସହ ଫୋରମ୍ ପକ୍ଷରୁ ଉପ ମହାପ୍ରବନ୍ଧକଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ଦାବିଗୁଡିକ ମଧ୍ୟରେ ବ୍ରହ୍ମପୁର ନିକଟବର୍ତ୍ତୀ ଜଗନ୍ନାଥପୁର କିମ୍ବା ସୋରଳରେ ରହଣି ଓ ଛାଡିବା ପାଇଁ ଟର୍ମିନାଲ ନିର୍ମାଣ, ୫ ଓ ୬ନଂ ପ୍ଲାଟଫର୍ମର ନିର୍ମାଣ, ଗରିବ ରଥ ଓ ସବୁ ଟ୍ରେନ୍ ରହଣିକୁ ସୁନିଶ୍ଚିତ କରିବା, ପ୍ରତି ପ୍ଲାଟଫର୍ମରେ ଲିଫ୍ଟ ଓ ଡିସ୍ପ୍ଲେ ବୋର୍ଡ, ଆଲୋକୀକରଣ, ପାନୀୟ ଜଳ ଓ ଖାଦ୍ୟ ବ୍ୟବସ୍ଥା ସହ ପ୍ଲାଟଫର୍ମ ଏବଂ ଷ୍ଟେଶନ ବାହାରେ ଶୌଚାଳୟ ସ୍ଥାପନ ପାଇଁ ଦାବି ହୋଇଛି।
ଆରମ୍ଭ ହୋଇଥିବା ମେମୁ ଟ୍ରେନ୍କୁ ଗୁଣପୁରକୁ ସମ୍ପ୍ରସାରିତ କରାଯିବାକୁ ଦାବି ହୋଇଥିଲା। ତତ୍ସହିତ ସ୍ବତନ୍ତ୍ର ମେମୁ ଟ୍ରେନ ଦ୍ୱାରା ବ୍ରହ୍ମପୁରଠାରୁ କଟକ, ଭୁବନେଶ୍ୱର, ପୁରୀ ଓ ବିଶାଖାପାଟଣାକୁ ସଂଯୋଗ କରିବା ପାଇଁ ଦାବି ହୋଇଛି। ଅନ୍ୟପଟେ ବ୍ରହ୍ମପୁର-ଭୁବନେଶ୍ୱର ଇଣ୍ଟରସିଟି ଟ୍ରେନ ସମୟ ସୀମା ସକାଳ ୬ଟା ୩୦ରୁ କରାଯିବାକୁ ଦାବି ହୋଇଥିଲା। ଏଥିସହ ବହୁ ପ୍ରତୀକ୍ଷିତ ବ୍ରହ୍ମପୁର-ସମ୍ବଲପୁର ଭାୟା ଫୁଲବାଣୀ, ଗୋପାଳପୁର-ରାୟଗଡା, ଗୋପାଳପୁର-ତାଳଚେର ଭାୟା ତାରାତାରିଣୀ-ବୁଗୁଡା, ଗୁଣପୁର-ରାୟଗଡା, ଜୟପୁର-ମାଲକାନଗିରି-ନବରଙ୍ଗପୁର ରେଳପଥର କାର୍ଯ୍ୟ ଶୀଘ୍ର ସାରିବା ପାଇଁ ଫୋରମ୍ ଦାବି କରିଥିଲା। ଏତଦ୍ ବ୍ୟତୀତ ଦକ୍ଷିଣ ଓଡ଼ିଶାର ଇଷ୍ଟଦେବୀ ତାରାତାରିଣୀ ସମେତ ଗଞ୍ଜାମର ବରପୁତ୍ର ଉପେନ୍ଦ୍ର ଭଞ୍ଜ, ମହାରାଜା କୃଷ୍ଣ ଚନ୍ଦ୍ର ଗଜପତି, ଚକରା ବିଶୋଇଙ୍କ ନାମରେ ଦୂରଗାମୀ ଟ୍ରେନଗୁଡିକର ନାମକରଣ କରିବା ପାଇଁ ଫୋରମ୍ ଦାବି କରିଛି। ଏ ନେଇ ପୂର୍ବତଟ ରେଲୱେ ଉପମହାପ୍ରବନ୍ଧକ ବ୍ରହ୍ମପୁର-ବିଶାଖାପାଟଣା ଇଣ୍ଟରସିଟିର ସମୟ ପରିବର୍ତ୍ତନ ସହ ବ୍ରହ୍ମପୁର-କଟକ ଓ ପୁରୀ ପାଇଁ ଟ୍ରେନ୍ ବ୍ୟବସ୍ଥା ଏବଂ ବ୍ରହ୍ମପୁର ଷ୍ଟେଶନରେ କିଛି ଟ୍ରେନର ରହଣିକୁ ସୁନିଶ୍ଚିତ କରିବା ପାଇଁ ପ୍ରତିଶୁ୍ରତି ଦେଇଥିଲେ। ଏହି ଦାବିପତ୍ର ପ୍ରଦାନ ସମୟରେ ଫୋରମ୍ ସମ୍ପାଦକ ଭି. ସୋମେଶ୍ୱର ରାଓ, ସହସମ୍ପାଦକ ମାନସ ରଞ୍ଜନ ପାତ୍ର, ବି. ଶଙ୍କର ପାତ୍ରଙ୍କ ସମେତ ପ୍ରବୀଣ ପଟ୍ଟନାୟକ ଓ ବିନୋଦ ସାବତ ପ୍ରମୁଖ ଉପସ୍ଥିତ ଥିଲେ।
