ମାଞ୍ଚେଷ୍ଟର,୨୨ା୮(ପି.ଟି.): ଇଟାଲୀର ଟେନିସ୍ ଖେଳାଳି ଜାନିକ ସିନର ଦୁଇ ଥର ଡୋପ ଟେଷ୍ଟରେ ବିଫଳ ହୋଇଥିଲେ ହେଁ ତାଙ୍କୁ ବାସନ୍ଦ କରାଯାଇ ନାହିଁ। ଏହାକୁ ନେଇ ସମଗ୍ର ବିଶ୍ୱର ଖେଳାଳି ମାନଙ୍କ ମଧ୍ୟରେ କଡା ପ୍ରତିକ୍ରିୟା ପ୍ରକାଶ ପାଇଛି। ଦୁଇଥର ଡୋପ ଟେଷ୍ଟରେ ବିଫଳ ହୋଇଥିଲେ ହେଁ ଆସନ୍ତା ସପ୍ତାହରୁ ଆରମ୍ଭ ହେବାକୁ ଯାଉଥିବା ୟୁଏସ୍ ଓପନରେ ତାଙ୍କୁ ଅଂଶଗ୍ରହଣ କରିବାକୁ ସୁଯୋଗ ମିଳୁଛି। ସିନର ଆନାବଲିକ ଷ୍ଟେରଏଡ ସେବନ କରିଥିବା ନେଇ ପ୍ରଥମ ଥର ମାର୍ଚ୍ଚ ମାସରେ ଜଣା ପଡିଥିଲା। ମଙ୍ଗଳବାର ସିନର ଦ୍ୱିତୀୟ ଥର ଡୋପ୍ ଟେଷ୍ଟରେ ଧରା ପଡିବା ପରେ ଅନେକ ଖେଳାଳି ଏହା ଉପରେ ପ୍ରଶ୍ନ ଉଠାଇବା ଆରମ୍ଭ କରିଛନ୍ତି। ଡେନିସ୍ ଶାପୋଭାଲୋଭ ଏକ୍ସରେ ପୋଷ୍ଟ କରିବା ସହ ଭିନ୍ନ ଖେଳାଳିଙ୍କ ପାଇଁ କାହିଁକି ଭିନ୍ନ ନିୟମ ବୋଲି ପ୍ରଶ୍ନ ଉଠାଇଥିଲେ। ପରେ ନିକ୍ କିର୍ଗିଓସ୍, ଲିଆମ ବ୍ରୋଡି ଓ ଜନ୍ ମିଲମ୍ୟାନ୍ ଏହି ଧାରାରେ ସାମିଲ ହୋଇଥିଲେ। କିର୍ଗିଓସ ଲେଖିଥିଲେ ‘ଏହା ଯୋଜନା ବଦ୍ଧ କି ଦୁର୍ଘଟଣା ତାହା ଜଣାନାହିଁ। ମାତ୍ର ଜଣେ ଖେଳାଳି ୨ ଥର ଡୋପ ଟେଷ୍ଟରେ ବିଫଳ ହୋଇଛନ୍ତି ମାନେ ୨ ବର୍ଷ ବାସନ୍ଦ ହେବା ଉଚିତ୍। ପ୍ରଦର୍ଶନ ବୃଦ୍ଧିର ଷ୍ଟେରଏଡ୍ ଶରୀରରେ ମିଳିଥିବା କାରଣରୁ ଏପରି କରାଯିବା ଉଚିତ୍। ଯେଉଁଭଳି ମସାଜ କ୍ରିମ୍ର ବାହାନା ଦିଆଯାଉଛି ତାହା ଗ୍ରହଣୀୟ ନୁହେଁ। ଅନ୍ୟତମ ଖେଳାଳି ଲିଆମ୍ ବ୍ରୋଡି ଏହାକୁ ଅଭାବନୀୟ ବୋଲି କହିଛନ୍ତି। ଅନେକ ଖେଳାଳିଙ୍କୁ ପୂର୍ବରୁ ସମାନ କାରଣ ପାଇଁ ବ୍ୟାନ କରାଯାଇଛି। ସିନର ଡୋପିଂ କରୁଥିଲେ କି ନାହିଁ ତାହା ଭିନ୍ନ ମାମଲା। ମାତ୍ର ବ୍ୟାନ କରାଯିବା ଉଚିତ୍ ଥିଲା ବୋଲି ବ୍ରୋଡି ପୋଷ୍ଟ କରିଛନ୍ତି। ଜନ୍ ମିଲମ୍ୟାନ୍ ମଧ୍ୟ ପୋଷ୍ଟ କରିବା ସହ ସିନରଙ୍କୁ ସମାଲୋଚନା କରିଛନ୍ତି। ମସାଜ କ୍ରିମରେ ଶରୀର ମଧ୍ୟକୁ ୧ ଗ୍ରାମରୁ ଅଧିକ ଷ୍ଟେରଏଡ କିଭଳି ଗଲା ବୋଲି ସେ ପ୍ରଶ୍ନ କରିଛନ୍ତି।
ବିଶ୍ୱ ମାନ୍ୟତାର ଏକ ନମ୍ବର ଟେନିସ ଖେଳାଳି ଜାନିକ ସିନର ଷ୍ଟେରଏଡ ପାଇଁ ଦୁଇଥର ଡୋପ୍ ଟେଷ୍ଟରେ ଧରାପଡ଼ିଥିଲେ ହେ ଏକ ସ୍ବାଧୀନ ଟ୍ରିବ୍ୟୁନାଲ ଏହି ମାମଲାର ବିଚାର କରି ମଙ୍ଗଳବାର ତାଙ୍କୁ ଦୋଷମୁକ୍ତ କରିଥିଲା। ମାର୍ଚ୍ଚରେ ଇଣ୍ଡିଆନ ଓ୍ବେଲ୍ସ ହାର୍ଡକୋର୍ଟ ଇଭେଣ୍ଟ ବେଳେ ସିନରଙ୍କ ଡୋପ୍ ଟେଷ୍ଟ ହୋଇଥିଲା। ତାଙ୍କଠାରୁ ସଂଗ୍ରହ କରାଯାଇଥିବା ସମ୍ପଲରୁ ନିଷିଦ୍ଧ ଆନାବୋଲି ଷ୍ଟେରଏଡ୍ର ମାତ୍ରା ଠାବ କରାଯାଇଥିଲା। ଏହି ଡ୍ରଗ୍ ପାଇଁ ସାନ ଡିଏଗୋ ପାଡ୍ରେସ ବେସ୍ବଲ ଷ୍ଟାର ଫର୍ନାଣ୍ଡୋ ଟାଟିସ ଜୁନିୟର ମେଜର ବେସ୍ବଲ ଲିଗ୍ ଦ୍ୱାରା ସସ୍ପେଣ୍ଡ ହୋଇଥିଲେ। ପୁଣି ୮ଦିନ ପରେ ପ୍ରତିଯୋଗିତା ବାହାରେ ସିନରଙ୍କ ଡୋପ୍ ଟେଷ୍ଟ ହୋଇଥିଲା। ଏହିଥିରେ ପଜିଟିଭ ଆସିବାରୁ ତାଙ୍କୁ ତୁରନ୍ତ ସାମୟିକ ସସ୍ପେଣ୍ଡ କରାଯାଇଥିଲା। କିନ୍ତୁ ସେ ଏହି ଦଣ୍ଡ ବିରୋଧରେ ଅପିଲ କରି ସଫଳ ହୋଇଥିଲେ। ଟୁର୍ରେ ଖେଳ ଜାରି ରଖିବା ଲାଗି ତାଙ୍କୁ ଅନୁମତି ମିଳିଥିଲା। ସିନର ଯୁକ୍ତି ଦର୍ଶାଇଥିଲେ ତାଙ୍କ ଶରରରେ ଏକ ଛୋଟ କ୍ଷତର ଚିକିତ୍ସା ପାଇଁ ତାଙ୍କର ଜଣେ ସପୋର୍ଟ ଟିମ୍ ଷ୍ଟାଫ୍ କ୍ଲୋଷ୍ଟେବଲ ଉପାଦାନ ଥିବା ଏକ ସ୍ପ୍ରେ ବ୍ୟବହାର କରିଥିଲେ। ଏହାଛଡ଼ା ସେ ସିନରଙ୍କ କ୍ଷତ ସ୍ଥାନରେ ମାଲିସ କରିଥିଲେ। ସିନରଙ୍କ ସଫେଇକୁ ଟ୍ରିବ୍ୟୁନାଲ ଗ୍ରହଣ କରିଥିଲା ଓ ସେ ଉଦ୍ଦେଶ୍ୟମୂଳକ ଭାବେ ନିୟମ ଉଲ୍ଲଂଘନ କରି ନାହାନ୍ତି ବୋଲି ଆଇଟିଏ ପକ୍ଷରୁ କୁହାଯାଇଛି।
