ଦେବଗଡ଼,୨୨।୨(ଶଶାଙ୍କ ଶେଖର ଝାଙ୍କର): ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ଦ୍ୱାରା ପରିଚାଳିତ ଚଳିତବର୍ଷର ମାଟ୍ରିକ୍ ପରୀକ୍ଷା ଫେବୃଆରୀ ୨୧ ତାରିଖରୁ ଆରମ୍ଭ ହେବ। ଦେବଗଡ଼ ଜିଲାରେ ଚଳିତବର୍ଷ ୩୩ଟି ସେଣ୍ଟର କରାଯାଇଥିବା ବେଳେ ୮୬ଟି ବିଦ୍ୟାଳୟର ୩୮୦୯ଜଣ ଛାତ୍ରୀଛାତ୍ର ପରୀକ୍ଷା ଦେବେ। ଏ ନେଇ ଗୁରୁବାର ଜିଲା ଶିକ୍ଷା ଅଧିକାରୀ ଗେନ୍ଦ୍ରା କୁଜୁର ଆନୁଷ୍ଠାନିକ ଭାବେ ଗଣାମାଧ୍ୟମକୁ ସୂଚନା ଦେଇଛନ୍ତି। ସୂଚନା ଅନୁଯାୟୀ ପରୀକ୍ଷା ପରିଚାଳନା ପାଇଁ ବାରକୋଟ ବ୍ଲକରେ ୨ଟି, ରିଆମାଳ ବ୍ଲକରେ ୨ଟି ଏବଂ ତିଲେଇବଣି ବ୍ଲକରେ ୨ଟି ନୋଡାଲ ସେଣ୍ଟର କରାଯାଇଥିବା ବେଳେ ବାରକୋଟ ବ୍ଲକର ୧୦ଟି, ରିଆମାଳ ବ୍ଲକର ୧୩ଟି ଏବଂ ତିଲେଇବଣି ବ୍ଲକ ଓ ପୌରାଞ୍ଚଳର ୧୦ଟି ସେଣ୍ଟରରେ ଛାତ୍ରୀଛାତ୍ର ପରୀକ୍ଷା ଦେବେ। ପୋଲିସର ଉପସ୍ଥିତି ଏବଂ ନୋଡାଲ ସେଣ୍ଟର ଦାୟିତ୍ୱରେ ଥିବା ଅଧିକାରୀଙ୍କ ନେତୃତ୍ୱରେ ନୋଡାଲ ସେଣ୍ଟରରୁ ପରୀକ୍ଷା କେନ୍ଦ୍ରକୁ ପ୍ରଶ୍ନପତ୍ର ନିଆଯିବ । ଚଳିତବର୍ଷ ୩୭୮୦ଜଣ ରେଗୁଲାର, ୫ଜଣ ଏକ୍ସରେଗୁଲାର, ଜଣେ ସିସି, ୮ଜଣ ଏସଆଇଓଏସ ଏବଂ ୧୫ଜଣ ପରୀକ୍ଷାର୍ଥୀ ମଧ୍ୟମାରେ ପରୀକ୍ଷା ଦେବେ। ଦେବଗଡ଼ ଟାଉନ ଉଚ୍ଚ ବିଦ୍ୟାଳୟରେ ଏସଆଇଓଏସ ଏବଂ କୁଣ୍ଢେଇଗୋଳା ଉଚ୍ଚ ବିଦ୍ୟାଳୟରେ ମଧ୍ୟମା ସେଣ୍ଟର କରାଯାଇଛି। ପରୀକ୍ଷା ସୁପରିଚାଳନା ପାଇଁ ୩୩ଟି ସେଣ୍ଟର ମଧ୍ୟରୁ ୬ଟି ସେଣ୍ଟରରେ ସିସି କ୍ୟାମେରା ଖଞ୍ଜା ଯାଇଛି। ପ୍ରତି ସେଣ୍ଟରରେ ପୋଲିସ ବ୍ୟବସ୍ଥା ହୋଇଛି। ଏଥିସହ ଜିଲା ପ୍ରଶାସନ ପକ୍ଷରୁ ମୋବାଇଲ ସ୍କ୍ବାର୍ଡ, ଜିଲା ଶିକ୍ଷା ବିଭାଗ ପକ୍ଷରୁ ଫ୍ଲାଇଂ ସ୍କ୍ବ୍ବାର୍ଡ ଏବଂ ବୋର୍ଡ କର୍ତ୍ତୃପକ୍ଷ ସ୍ବତନ୍ତ୍ର ସ୍କ୍ବାର୍ଡ ଟିମ ଗଠନ କରିଥିବା ଜଣାପଡିଛି। ଜିଲାରେ ଅତିରିକ୍ତ ଜିଲାପାଳ ଏବଂ ଅତିରିକ୍ତ ଆରକ୍ଷୀ ଅଧୀକ୍ଷକ ନୋଡାଲ ଅଧିକାରୀ ଦାୟିତ୍ୱରେ ଥିବା ବେଳେ ପ୍ରତି ନୋଡାଲ ସେଣ୍ଟର ପାଇଁ ଓଆରଏସସ୍ତରର ଜଣେ ଅଧିକାରୀ ନିଯୁକ୍ତ ହୋଇଥିବା ଜଣାପଡିଛି।
