ଥୁଆମୂଳ ରାମପୁର,୪।୭,(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅଞ୍ଚଳରେ ଗତ ତିନି ଦିନ ହେଲା ପାଣିପାଗରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଲଗାତାର ଲାଗି ରହିଥିବା ଝିପିଝିପି ବର୍ଷା ସାଙ୍ଗକୁ ଘନ କୁହୁଡ଼ିର ଆସ୍ତରଣ ସମଗ୍ର ଅଞ୍ଚଳକୁ ଆବୃତ କରି ରଖିଛି। କୁହୁଡ଼ିର ପ୍ରଭାବ ଏତେ ଅଧିକ ରହୁଛି ଯେ ଦିନ ଦ୍ୱିପ୍ରହରରେ ମଧ୍ୟ ରାସ୍ତାଘାଟ ସମ୍ପୂର୍ଣ୍ଣ ଅନ୍ଧକାରମୟ ହୋଇପଡ଼ୁଛି। ଫଳରେ, ମୁଖ୍ୟ ରାସ୍ତାରେ ଯାତାୟାତ କରୁଥିବା ଗାଡ଼ି ଚାଳକମାନେ ହେଡଲାଇଟ ଜଳାଇ ଯିବାଆସିବା କରୁଥିବା ଦେଖିବାକୁ ମିଳୁଛି। ଏହି ଅଦିନିଆ ପାଣିପାଗ ଯୋଗୁ ସ୍ଥାନୀୟ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡ଼ିଛି। ପ୍ରବଳ ବର୍ଷା ଓ କୁହୁଡ଼ି ଯୋଗୁ ଲୋକେ ଘରୁ ବାହାରି ପାରୁନାହାନ୍ତି। କେବଳ ଅତି ଜରୁରୀ କାର୍ଯ୍ୟ ଥିଲେ ହିଁ ଲୋକମାନେ ସ୍ଥାନୀୟ ବ୍ଲକ କାର୍ଯ୍ୟାଳୟ, ବ୍ୟାଙ୍କ କିମ୍ବା ବଜାର ସଉଦା ପାଇଁ ବାହାରକୁ ଆସୁଛନ୍ତି।
ହଠାତ ମାଡ଼ି ଆସୁଥିବା ବର୍ଷାରେ ଭିଜି ଅନେକ ପଥିକ ଓ ସାଧାରଣ ଜନତା ହନ୍ତସନ୍ତ ହେଉଥିବା ବେଳେ, ଅନ୍ୟପଟେ ଏହି ଶୀତଳ ଓ ରୋମାଞ୍ଚକର ପରିବେଶକୁ କିଛି ସ୍ଥାନୀୟ ଯୁବପିଢ଼ି ବେଶ ଉପଭୋଗ କରୁଥିବା ମଧ୍ୟ ନଜରକୁ ଆସିଛି। ଏହି ଅଞ୍ଚଳିରେ କୌଣସି ପାଣିପାଗ କେନ୍ଦ୍ର ନଥିବା ବେଳେ ଇଣ୍ଟରନେଟରୁ ମିଳିଥିବା ସୂଚନା ଅନୁସାରେ, ବାୟୁମଣ୍ଡଳରେ ଆଦ୍ରତା ବୃଦ୍ଧି ଏବଂ ସ୍ଥାନୀୟ ଲଘୁଚାପ ବଳୟ ଯୋଗୁ ଅଞ୍ଚଳରେ ଏଭଳି ସ୍ଥିତି ସୃଷ୍ଟି ହୋଇଛି। ଆଗାମୀ ୨୪ ରୁ ୪୮ ଘଣ୍ଟା ପର୍ଯ୍ୟନ୍ତ ଆକାଶ ମେଘାଚ୍ଛନ୍ନ ରହିବା ସହ ଏହିଭଳି ରହି ରହି ହାଲୁକା ବର୍ଷା ଓ ପାଗ କୁହୁଡ଼ିଆ ରହିବାର ସମ୍ଭାବନା ଅଛି। ପ୍ରଶାସନ ତରଫରୁ କୁହୁଡ଼ି ସମୟରେ ରାସ୍ତାରେ ସତର୍କତାର ସହ ଗାଡ଼ି ଚଳାଇବାକୁ ଏବଂ ବର୍ଷା ସମୟରେ ନିରାପଦ ସ୍ଥାନରେ ଆଶ୍ରୟ ନେବାକୁ ପରାମର୍ଶ ଦିଆଯାଇଛି।