ଦାରିଙ୍ଗବାଡ଼ି,୨୬ା୧୧(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିଠାରେ ଚଳିତ ଶୀତ ମହୋତ୍ସବ ପାଳନ ପାଇଁ ଦ୍ୱିତୀୟଥର ବ୍ଲକ ସଭାଗୃହଠାରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଶୀତ ମହୋତ୍ସବ ପାଳନ କମିଟିର ସମ୍ପାଦକ ତଥା ବିଡିଓ ପ୍ରୀତିରଞ୍ଜନ ରଥଙ୍କ ଅଧ୍ୟକ୍ଷତାରେ ମୁଖ୍ୟ ଅତିଥି ଭାବେ କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ଯୋଗଦେଇ ଶୀତ ମହୋତ୍ସବକୁ ଉତ୍ସବ ମୁଖର କରିବା ପାଇଁ ଆଲୋଚନାରେ ଭାଗ ନେଇଥିଲେ। ବୈଠକରେ ଅନ୍ୟ ଅତିଥିଙ୍କ ମଧ୍ୟରେ ବାଲିଗୁଡ଼ା ଆଇଟିଡିଏର ପ୍ରକଳ୍ପ ପ୍ରଶାସକ କୃପାସିନ୍ଧୁ ବେହେରା, କମିଟିର କୋଷାଧ୍ୟକ୍ଷ ତଥା ତହସିଲଦାର ଧୀରୋଜ ପାତ୍ର, ସିଡିପିଓ ସନ୍ଧ୍ୟାରାଣୀ ପଣ୍ଡା ପ୍ରମୁଖ ମଞ୍ଚାସୀନ ରହିଥିଲେ। ଏହି ବୈଠକରେ ଆଲୋଚନା ମଧ୍ୟରେ ଏହି ମହୋତ୍ସବକୁ ରାଜ୍ୟସ୍ତରୀୟ କରାଯିବା ପାଇଁ ସ୍ଥାନୀୟ ବାସିନ୍ଦା ଦାବି କରିଥିଲେ। ସେହିପରି ଏହି ମହୋତ୍ସବକୁ ଉଦଘାଟନ କରାଯିବା ଦିନ ବା ପ୍ରଥମ ଦିନରେ ରାଜ୍ୟର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ମୁଖ୍ୟ ଅତିଥି ଭାବେ ଯୋଗଦାନ କରିବାକୁ ଏମ୍ପିଙ୍କ ନିକଟରେ ଅଞ୍ଚଳବାସୀ ନିବେଦନ କରିଥିଲେ। ଏନେଇ ଏମ୍ପି ଲୋକଙ୍କ ଦାବି ଯଥାର୍ଥ ବୋଲି କହିବା ସହ ସେ ଗୁରୁବାର ଭୁବନେଶ୍ୱରରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବି ବୋଲି କହିଥିଲେ। ଦାରିଙ୍ଗବାଡ଼ିରେ ଷ୍ଟ୍ରିଟ୍ ଆଲୁଅକୁ ଗୁରୁତ୍ୱ ସହ ଶୌଚାଳୟ ଓ ଆବଶ୍ୟକ ସୁବିଧା ସହ ଶୀତ ମହୋତ୍ସବରେ ବିଭିନ୍ନ ସାଂସ୍କୃତିକ ନୃତ୍ୟ, ସଙ୍ଗୀତ ଦଳକୁ ଆଣିବାକୁ ଗୁରୁତ୍ୱ ଦିଆଯିବ। ଏଥିସହ ଏହି ମହୋତ୍ସବ ପାଇଁ ରାଜ୍ୟରୁ ଅନୁଦାନ ଅଣାଯିବ ବୋଲି କହିଛନ୍ତି। ଦାରିଙ୍ଗବାଡ଼ିକୁ ବିଜ୍ଞାପିତ ଅଞ୍ଚଳ ପରିଷଦ ପାଇଁ ପ୍ରସ୍ତାବ ରହିଛି। ନିଶ୍ଚିତ ଆଗକୁ ଘୋଷଣା ହେଲେ ଦାରିଙ୍ଗବାଡ଼ିର ବିକାଶ ହେବ। ସେହିପରି ଦାରିଙ୍ଗବାଡ଼ିକୁ ୫ କୋଟି ଅନୁଦାନ ଆସିଲେ ଆଗକୁ ଦାରିଙ୍ଗବାଡ଼ିର ଖେଳପଡ଼ିଆ ସହ ଅନ୍ୟ ବିକାଶ ହୋଇପାରିବ ବୋଲି କହିଥିଲେ।
Dharitri – Odisha’s No.1 Odia Daily
