ପରଜଙ୍ଗ, ୩।୭(ଡି.ଏନ୍.ଏ.): ଜମିବାଡ଼ି ବିବାଦକୁ କେନ୍ଦ୍ର କରି ଢେଙ୍କାନାଳ ଜିଲା କାମାକ୍ଷାନଗର ଥାନା ଜୟପୁରାକାଟେଣୀ ଗ୍ରାମରେ ଶୁକ୍ରବାର ୨ ପରିବାର ମଧ୍ୟରେ ରକ୍ତାକ୍ତ ସଂଘର୍ଷ ଘଟି ବୈକୁଣ୍ଠ ସାହୁ (୬୫) ନାମକ ଜଣେ ବୃଦ୍ଧଙ୍କ ମୃତ୍ୟୁ ଘଟିଥିଲା। ଏଥିରେ ମୃତକଙ୍କ ପୁଅ ପିଣ୍ଟୁ ସାହୁ ଏବଂ ଅପର ଗୋଷ୍ଠୀର ୨ଜଣ ଗୁରୁତର ହୋଇଛନ୍ତି। ବୈକୁଣ୍ଠ ବିଲରେ କାମ କରୁଥିବାବେଳେ ସଂଘବଦ୍ଧ ଭାବେ ଆକ୍ରମଣ କରି ତାଙ୍କୁ ହତ୍ୟା କରାଯାଇଥିଲା। ଏଥିରେ ଗ୍ରାମର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ତଥା ପ୍ରତିପକ୍ଷ ଗୋଷ୍ଠୀର ଅଜୟ ସାହୁ, ତାଙ୍କ ସମ୍ପର୍କୀୟ ସଞ୍ଜୟ ସାହୁ, ନନ୍ଦିନୀ ସାହୁ, ଚିଣ୍ଟୁ ସାହୁ ଏବଂ ସୁରେନ୍ଦ୍ର ସାହୁଙ୍କ ସମ୍ପୃକ୍ତି ରହିଥିବା ମୃତକଙ୍କ ପୁଅ ଆଦିତ୍ୟ ପ୍ରସାଦ ସାହୁ ଥାନାରେ ଏତଲା ଦେଇଛନ୍ତି। ଅଭିଯୁକ୍ତମାନେ ତାଙ୍କ ପରିବାର ନିପାତ କରିଦେବାକୁ ଧମକ ଦେଇଛନ୍ତି। ତେଣୁ ପୋଲିସ ପକ୍ଷରୁ ଆବଶ୍ୟକ ସୁରକ୍ଷା ଯୋଗାଇଦେବାକୁ ସେ ଦାବି କରିଛନ୍ତି। ଅଭିଯୋଗ ଆଧାରରେ ପୋଲିସ ୩ଜଣଙ୍କୁ ଅଟକ ରଖି ପଚରାଉଚରା କରୁଛି।
ଅନ୍ୟପଟେ ହତ୍ୟାକାଣ୍ଡ ମାମଲାରେ ଶିକ୍ଷକ ଅଜୟଙ୍କ ସମ୍ପୃକ୍ତି ଅଭିଯୋଗ ଆସିବା ପରେ ତାଙ୍କୁ ଅନ୍ୟତ୍ର ବଦଳି କରିବାକୁ ଗ୍ରାମବାସୀ ଏବଂ ଅଭିଭାବକ ଦାବି କରିଛନ୍ତି। ଏହା ନ ହେଲେ ସେମାନେ ପିଲାମାନଙ୍କୁ ସ୍କୁଲଛାଡ଼ିବେ ନାହିଁ ଏବଂ ଫାଟକରେ ତାଲା ପକାଇ ପ୍ରତିବାଦ କରିବେ ବୋଲି ଚେତାବନୀ ଦେଇଛନ୍ତି। ଏ ସଂକ୍ରାନ୍ତରେ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ଜରିଆରେ ବିଇଓଙ୍କୁ ଦାବିପତ୍ର ପ୍ରଦାନ କରାଯାଇଛି। ଏ ସଂକ୍ରାନ୍ତରେ ଅଭିଯୁକ୍ତ ଶିକ୍ଷକ ଅଜୟଙ୍କ ପ୍ରତିକ୍ରିୟା ନେବାକୁ ତାଙ୍କ ମୋବାଇଲ (ନଂ. ୯୧୭୮୯୨୨୯୦୬ /୮୨୪୯୨୨୯୩୯୧)ରେ ଯୋଗାଯୋଗ କରାଯାଇଥିଲା। ତେବେ ଗୋଟିଏ ନମ୍ବରରେ ଇନ୍କମିଂ କଲ୍ ସୁବିଧା ଉପଲବ୍ଧ ନ ଥିବାବେଳେ ଅନ୍ୟଟି ବନ୍ଦ ଥିଲା। ଅନ୍ୟପଟେ ବିଦ୍ୟାଳୟ ରେଜିଷ୍ଟର ଯାଞ୍ଚ ବେଳେ ସେ ଜୁନ୍ ୩୦ରୁ ୨ ତାରିଖ ଯାଏ ସ୍ବାସ୍ଥ୍ୟଗତ କାରଣରୁ ଛୁଟିରେ ଥିବା ଜଣାପଡ଼ିଛି। ଏ ସଂକ୍ରାନ୍ତରେ ପରଜଙ୍ଗ ବିଇଓ ହରିହର ଦେହୁରୀଙ୍କୁ ଯୋଗାଯୋଗ କରିବାରେ ସେ କହିଛନ୍ତି, ଯଦି ଅଭିଯୋଗରେ ସତ୍ୟତା ଥିବ ତେବେ ସମ୍ପୃକ୍ତ ଶିକ୍ଷକଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।