ଢେଙ୍କାନାଳ ଅଫିସ, ୨୮ା୧୨ ବନ୍ଦ ହୋଇପଡ଼ିଥିବା ରାସ୍ତାର ଉନ୍ନତୀକରଣ କରିବା ଦାବି କରି ସୋମବାର ଢେଙ୍କାନାଳ ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି ଓଡ଼ାପଡ଼ା ବ୍ଲକ ଡେଙ୍ଗବୋରେଇ ଗ୍ରାମବାସୀ। ଅଭିଯୋଗରୁ ଜଣାପଡ଼ିଛି, ୫୫ନଂ. ଜାତୀୟ ରାଜପଥରୁ ପଞ୍ଚୁପଟି-ଡେଙ୍ଗବୋରେଇ କେନାଲ ହୁଡ଼ା ଦେଇ କାଣ୍ଡବିନ୍ଧାଙ୍କୁ ରାସ୍ତା ସଂଯୋଗୀକରଣ ପାଇଁ ସର୍ଭେ ସରିଥିଲା। ସାମୂହିକ ସ୍ବାର୍ଥ ପାଇଁ କେତେଜଣ ବଦାନ୍ୟ ବ୍ୟକ୍ତି ଜମି ଛାଡ଼ିବାକୁ ରାଜି ହୋଇଥିଲେ। ହେଲେ ଏହି ରାସ୍ତା କାମ ବନ୍ଦ ହୋଇଯାଇଥିଲା। ଗ୍ରାମ୍ୟ ନିର୍ମାଣ ବିଭାଜନ ପକ୍ଷରୁ ଏହି ରାସ୍ତା ନିର୍ମାଣ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି। ଏ ସଂକ୍ରାନ୍ତରେ ସେମାନେ ଜିଲାପାଳ ଏବଂ ବିଭାଗୀୟ ନିର୍ବାହୀଯନ୍ତ୍ରୀଙ୍କୁ ଲିଖିତ ଭାବେ ଜଣାଇଥିବା ଗ୍ରାମ ସଭାପତି ରାଜକିଶୋର ରାଉତ, ଡମ୍ବରୁଧର ପ୍ରଧାନ, ଭରତ ଚନ୍ଦ୍ର ପ୍ରଧାନ ପ୍ରମୁଖ କହିଛନ୍ତି। ଏଥିସହ ଖରାଦିନେ ଅଞ୍ଚଳବାସୀଙ୍କ ଜଳକଷ୍ଟ ଦୂର ପାଇଁ କୂଅ ଖୋଲାଇବାକୁ ଗ୍ରାମବାସୀ ଦାବି କରିଛନ୍ତି।
