କୋରାପୁଟ,୨୪ା୩(ଅମିତାଭ ବେହେରା): କୋରାପୁଟ ଜିଲା କୁନ୍ଦୁରା ବ୍ଲକ ଭୁସଙ୍ଗଗୁଡ଼ା ପଞ୍ଚାୟତ ନଇକେରା ନଦୀଘାଟରୁ ବାଲି ଉଠାଣ ପାଇଁ ଖଣି ବିଭାଗ ପକ୍ଷରୁ ଟେଣ୍ଡର ନ କରିବାକୁ ଗ୍ରାମବାସୀ ମଙ୍ଗଳବାର ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ଉକ୍ତ ନଦୀଘାଟରୁ ବଡ ଗାଡ଼ିରେ ବାଲି ପରିବହନ କରାଯାଇ ରାସ୍ତାଗୁଡ଼ିକ ଖରାପ ହୋଇଯାଇଛି। ଏହାଦ୍ୱାରା ଯାତାୟାତରେ କଷ୍ଟ ହେଉଥିବା କୁହାଯାଇଛି। ପୂର୍ବ ଟେଣ୍ଡର ଅବଧି ଶେଷ ହୋଇଥିବା ବେଳେ ଆଉ ଟେଣ୍ଡର ନ କରିବାକୁ ଗ୍ରାମବାସୀ ଦାବି କରିଛନ୍ତି। ଏ ନେଇ ସରପଞ୍ଚ ଡମ୍ବରୁଧର ପୂଜାରୀଙ୍କ ନେତୃତ୍ୱରେ ଗ୍ରାମବାସୀ କୋରାପୁଟ ଅତିରିକ୍ତ ଜିଲାପାଳ ତପନ କୁମାର ନାୟକଙ୍କୁ ଦାବିପତ୍ର ପ୍ରଦାନ କରିଛନ୍ତି। ବାଲିଘାଟ ଯୋଗୁ ରାସ୍ତାରେ ଛୋଟ ବଡ଼ ଦୁର୍ଘଟଣା ଘଟୁଥିବାରୁ ଏହାକୁ ବନ୍ଦ କରାଯାଉ ଓ ରାସ୍ତା ମରାମତି କରାଯାଉ ବୋଲି କୁହାଯାଇଛି। ଏହି ସମୟରେ ଭକ୍ତରାମ ଭତ୍ରା, ଧନସିଂ ଭତ୍ରା, ଜଳେନ୍ଦ୍ର ଭତ୍ରା ଓ୨୦ରୁ ଊର୍ଦ୍ଧ୍ୱ ଗ୍ରାମବାସୀ ଉପସ୍ଥିତ ଥିଲେ।
