କେନ୍ଦୁଝର,୨୬ା୪(ନରେଶ ଚନ୍ଦ୍ର ପଟ୍ଟନାୟକ): ବାଂଶପାଳ ବ୍ଳକ ଉପର କାଦକଳା ଗ୍ରାମରେ ଥିବା ସିରକାଗୁଟ ଲୌହ ଓ ମାଙ୍ଗାନିଜ ଖଣି ରାସ୍ତାରେ ଆନ୍ଦୋଳନ ଯୋଗୁ ପରିବହନ କାର୍ଯ୍ୟ ବନ୍ଦ ରହିଛି । ଏହାକୁ ନେଇ ସ୍ଥାନୀୟ ଲୋକ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ଏବଂ ଜିଲାପାଳଙ୍କୁ ଲିଖିତ ଭାବେ ଜଣାଇ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି।
ଅଭିଯୋଗ ଅନୁଯାୟୀ ଉକ୍ତ ଖଣିରେ ସ୍ଥାନୀୟ ଗ୍ରାମବାସୀଙ୍କ ସମେତ ବ୍ରହ୍ମେଶ୍ୱର ମହାକୁଡଙ୍କ ମା’ ତାରିଣୀ ଟ୍ରନ୍ସପୋର୍ଟ ସଂସ୍ଥା କାମ କରି ଆସୁଥିଲା । ତେବେ ଗତ ରବିବାରଠାରୁ ମା’ତାରିଣୀ ଟ୍ରାନ୍ସପୋର୍ଟ ନାମକ ପରିବହନ ସଂସ୍ଥା ଏକ ଚାଟିଆ ପରିବହନ କାମ କରିବା ଦାବିରେ ଖଣିଠାରୁ ୫ କିଲୋମିଟର ଦୂର ମାଲାଙ୍ଗଟୋଲୀରେ ବାହାର ଲୋକ ଲଗାଇ ରାସ୍ତା ବନ୍ଦ କରି ଆନ୍ଦୋଳନ କରୁଥିବାରୁ ପରିବହନ କାର୍ଯ୍ୟ ବନ୍ଦ ରହିଛି
ଏ ନେଇ ବିପିନ ମୁଣ୍ଡା, କ୍ରିଣ୍ଣା ମୁଣ୍ଡା, କଲୁ ଦେହୁରୀ, ଅଶୋକ କୁମାର ବାରିକ, ଆଦିକାନ୍ତ ଘଣା, କୃଷ୍ଣଚନ୍ଦ୍ର ଘଣା, ହେମନ୍ତ କୁମାର ଘଣା, ପୂର୍ଣ୍ଣ ଚନ୍ଦ୍ର ବାରିକ, ରାକେଶ ଚନ୍ଦ୍ର ଘଣା, ଇନ୍ଦ୍ରମଣି ଘଣା, ସୁଶାନ୍ତ ଘଣା, ରାକେଶ ମୁଣ୍ଡା, ରାଜକିଶୋର ଆପଟ୍ଟ, ଚିତ୍ରସେନ ଘଣା, ବନମାଳୀ ନାଏକ, ବିଘ୍ନେଶ୍ୱର ଘଣା, ବିମ୍ବା ଦେହୁରୀ, ସାନୁ ଦେହୁରୀ, ସଂଜୟ ମୁଣ୍ଡା, ମନମୋହନ ଘଣା ପ୍ରମୁଖ ପ୍ରଭାବିତ ଲୋକ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ, ଜିଲାପାଳ, ଆରକ୍ଷୀ ଅଧିକ୍ଷକଙ୍କ ନିକଟରେ ଅଭିଯୋଗ କରି ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି ।
କିଛି ବାହାର ଲୋକଙ୍କୁ ଲଗାଇ ମା’ ତାରିଣୀ ଟ୍ରାନ୍ସପୋର୍ଟ ଆନ୍ଦୋଳନ କରୁଥିବାରୁ ଖଣିର ପରିବହନ କାର୍ଯ୍ୟ ୬ ଦିନ ସମ୍ପୂର୍ଣ୍ଣ ଠପ ହୋଇଯାଇଛି ବୋଲି ସେମାନେ ଅଭିଯୋଗ କରିଛନ୍ତି । ଜଣେ ଲୋକଙ୍କ ସ୍ବାର୍ଥ ପାଇଁ ଖଣି ବନ୍ଦ ହେଲେ ଉପର କାଦକଳା ତଥା ଆଖପାଖ ଗ୍ରାମର ୩୦୦ ପରିବାରର ଜୀବନଜୀବିକା ଉପରେ ପ୍ରଭାବ ପଡିବ ।
ପରିବହନ ବନ୍ଦ ଯୋଗୁୁ ସରକାରଙ୍କ ରାଜସ୍ବ ହାନୀ ହେବା ସହିତ ସ୍ଥାନୀୟ ଲୋକ କର୍ମସଂସ୍ଥାନ ନ ପାଇ ହଇରାଣ ହେଉଛନ୍ତି । ଗତ ୨୧ ତାରିଖରୁ ବ୍ରହ୍ମେଶ୍ୱର ମହାକୁଡ ଓ ତାଙ୍କର କିଛି ସହଯୋଗୀ ପୀଢପୋଖରୀ ଓ ସମରସୁଆଁ ଗ୍ରାମର କିଛି ଲୋକଙ୍କୁ ନିୟୋଜିତ କରି ରାସ୍ତା ଅବରୋଧ କରିଛନ୍ତି । ଖଣିରେ ୧୦୦ ପ୍ରତିଶତ ପରିବହନ କାର୍ଯ୍ୟ କରିବା ଜିଦ୍ରେ ସେମାନେ ଅଟଳ ରହିଛନ୍ତି ।
ରାସ୍ତା ଅବରୋଧ ଯୋଗୁ ସାଧାରଣ ଲୋକଙ୍କ ଯାତାୟତରେ ମଧ୍ୟ ସମସ୍ୟା ଉପୁଜିବା ସହ ଆମ୍ଭୁଲାନ୍ସ ଯାଇ ପାରୁନାହିଁ । ଖଣି କାର୍ଯ୍ୟ ଏବଂ ପରିବହନରେ କୌଣସି ଅସୁବିଧା ନ ହେବା ପାଇଁ ବେଆଇନ ଭାବେ ରାସ୍ତା ଅବରୋଧ କରିଥିବା ଲୋକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି । ଏ ନେଇ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଖଣି ପରିବହନ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି ।
ସିରକାଗୁଟ ଲୌହ ଓ ମାଙ୍ଗାନିଜ ଖଣି ଉପରେ କଦମଡିହି, ଲାଲ ପାଣି, ମାଲୁଙ୍ଗିସାହି, ତଳ କାଦକଳା ଏବଂ ଉପର କାଦକଳା ଗ୍ରାମର ବହୁ ଲୋକ ଖଣିରେ କାମ କରି ପରିବାର ପ୍ରତିପୋଷଣ କରୁଛନ୍ତି । ସେହିପରି ଖଣି କମ୍ପାନୀ ପକ୍ଷରୁ ପ୍ରଭାବିତ ଲୋକଙ୍କ ସ୍ବାସ୍ଥ୍ୟ, ଶିକ୍ଷା, ଗମନାଗମନ ପାଇଁ ସିଏସ୍ଆରରେ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି ବୋଲି ଗ୍ରାମବାସୀମାନେ କହିଛନ୍ତି ।
ଏନେଇ ଅକ୍ଷୟ ମହାକୁଡ଼ କହିଛନ୍ତି ଯେ ରାସ୍ତା ଅବରୋଧ କିମ୍ବା ଖଣି ପରିବହନରେ ତାଙ୍କର କୌଣସି ସମ୍ପର୍କ ନାହିଁ। ଗ୍ରାମବାସୀମାନେ ଆନ୍ଦୋଳନ କରିଛନ୍ତି। ଅନ୍ୟ ପକ୍ଷରେ ଏନେଇ ଖଣିର ସାଧାରଣ ପରିଚାଳକ ଦୀପକ ଦାଶ କହିଛନ୍ତି ଯେ, ପରିବହନ ବନ୍ଦ ଯୋଗୁ କମ୍ପାନୀର କ୍ଷତି ହେଉଛି। ଏନେଇ ପ୍ରଶାସନ ତଥା ସ୍ଥାନୀୟ ପୋଲିସ ଜଣାଇଥିବା ସେ କହିଛନ୍ତି।
