ନୂଆଦିଲ୍ଲୀ,୨୧।୪: ରାଜଧାନୀ ଦିଲ୍ଲୀର ସାକେତ କୋର୍ଟରେ ଗୁଳି ଚାଳନା ପରେ ଜଣେ ମହିଳା ଆହତ ହାଇଛନ୍ତି। ଏବେ ଏହି ଘଟଣାକୁ ନେଇ ଦିଲ୍ଲୀର ଆମ ଆଦମି ପାର୍ଟି(ଏଏପି) ସରକାର ଉପରାଜ୍ୟପାଳ ଭିକେ ସାକ୍ସେନାଙ୍କୁ ଟାର୍ଗେଟ କରିଛନ୍ତି। ଏହି ଘଟଣାକୁ ନେଇ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ କହିଛନ୍ତି, ଦିଲ୍ଲୀରେ ଆଇନ ଶୃଙ୍ଖଳା ପରିସ୍ଥିତି ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି। ଅନ୍ୟ କଥାରେ ମୁଣ୍ଡ ପୁରାଇବା ଓ ହୀନ ରାଜନୀତି କରିବା ବଦଳରେ ସମସ୍ତଙ୍କୁ ନିଜ ନିଜ କାମ ଉପରେ ଧ୍ୟାନ ଦେବା ଭଲ। ଯଦି ସମ୍ଭାଳି ନ ପାରୁଛନ୍ତି ତେବେ ଇସ୍ତଫା ଦେଇ ଦିଅନ୍ତୁ। ଅନ୍ୟ କେହି କରିଦେବେ। ଲୋକଙ୍କ ସୁରକ୍ଷାକୁ ରାମ ଭରସାରେ ଛାଡିଦେବା ଠିକ ନୁହେଁ।
ଅନ୍ୟପଟେ ସାକେତ କୋର୍ଟ ଗୁଳିକାଣ୍ଡ ଘଟଣାକୁ ନେଇ ସ୍ବାସ୍ଥ୍ୟମନ୍ତ୍ରୀ ସୌରଭ ଭରଦ୍ୱାଜ କହିଛନ୍ତି, ଉପରାଜ୍ୟପାଳ ଆସିବା ପରେ ଦିଲ୍ଲୀର ଆଇନ ଶୃଙ୍ଖଳା ପରିସ୍ଥିତି ବେଳକୁ ବେଳ ବିଗିଡିବାରେ ଲାଗିଛି। କୋର୍ଟରେ ଗୁଳି ଫୁଟୁଛି। ପୋଲିସ ୩୬୫ କୋଟି ଭ୍ରଷ୍ଟାଚାରରେ ବୁଡି ଯାଇଛି। ସୂଚନାଯୋଗ୍ୟ, ଶୁକ୍ରବାର ସକାଳେ ଜଣେ ବ୍ୟକ୍ତି ଓକିଲ ପୋଷାକରେ ଆସି ସାକ୍ଷୀ ଦେବାକୁ ଆସିଥିବା ଜଣେ ମହିଳାଙ୍କୁ ଗୁଳି କରିଥିଲେ। ଏହାପରେ ଦିଲ୍ଲୀର ରାଜନୀତି ହୋଇଛି ସରଗରମ।
