ନୂଆଦିଲ୍ଲୀ,୬।୧୧: ଜଣେ ୧୭ ବର୍ଷୀୟା ନାବାଳିକା ବଳାତ୍କାର ପୀଡ଼ିତାଙ୍କୁ ଗର୍ଭପାତ କରିବାକୁ ଅନୁମତି ଦେଇଛନ୍ତି ଦିଲ୍ଲୀ ହାଇକୋର୍ଟ। ଆଇନଗତ ଗର୍ଭପାତ ପାଇଁ କୋର୍ଟର ଦ୍ୱାରସ୍ଥ ହୋଇଥିଲେ ପୀଡ଼ିତା। ଆବେଦନରେ ପୀଡ଼ିତା ଦର୍ଶାଇଥିଲେ ଯେ, ସେ ଜଣେ ନାବାଳିକା। ଛୋଟ ବୟସରେ ପ୍ରସବ ଜନିତ ଯନ୍ତ୍ରଣା ଏବଂ ଛୁଆର ଯତ୍ନ ନେଇପାରିବେ ନାହିଁ।
ଗତ ୨୮ ତାରିଖରେ ଆବେଦନକାରୀଙ୍କ ସ୍ବାସ୍ଥ୍ୟ ପରୀକ୍ଷା କରିବା ଲାଗି ଏମ୍ସକୁ ଏକ କମିଟି ଗଠନ କରିବାକୁ ନିର୍ଦ୍ଦେଶ ଦେଇଥିଲେ କୋର୍ଟ। ଉକ୍ତ କମିଟି ଯାଞ୍ଚ ପରେ ମେଡିକାର ରିପୋର୍ଟରେ ଦର୍ଶାଇଛି ଯେ, ବର୍ତ୍ତମାନ ଗର୍ଭପାତ କରାଗଲେ ପୀଡ଼ିତାଙ୍କ କୌଣସି ଅସୁବିଧା ହେବ ନାହିଁ।
”ମେଡିକାଲ ବୋର୍ଡର ରିପୋର୍ଟକୁ ଆଧାର କରି ତୁରନ୍ତ ପୀଡ଼ିତାଙ୍କ ଗର୍ଭପାତ କରାଯାଉ। ଗର୍ଭପାତର ଡିଏନ୍ଏ ନମୁନା ସଂରକ୍ଷିତ ରଖାଯାଇ ଫରେନ୍ସିକ ଲ୍ୟାବରେ ପରୀକ୍ଷା କରାଯିବ“ ବୋଲି ଜଷ୍ଟିସ ମୁକ୍ତା ଗୁପ୍ତା ଗତ ୨୯ ତାରିଖରେ କହିଥିଲେ।
ଘଟଣା ଅନୁଯାୟୀ, ମେ ୨୩ ତାରିଖରେ କାହାକୁ କିଛି ନ କହି ପୀଡ଼ିତା ଘରୁ ଚାଲି ଯାଇଥିଲେ। ତାଙ୍କ ମୋବାଇଲ ଫୋନ ସୁଇଚ୍ ଅଫ୍ ଅବସ୍ଥାରେ ମିଳିଥିଲା। ସେ ୩ ଦିନ ପରେ ଘରକୁ ଫେରି ଆସିଥିଲେ। ପ୍ରଥମେ ବଳାତ୍କାର ସମ୍ପର୍କରେ କାହାକୁ କିଛି ଜଣାଇ ନ ଥିଲେ। କିନ୍ତୁ ପୀଡ଼ିତା ଗର୍ଭବତୀ ଜଣାପଡ଼ିବା ପରେ ଗର୍ଭପାତ ପାଇଁ କୋର୍ଟରେ ଆବେଦନ କରିଥିଲେ ପୀଡ଼ିତାଙ୍କ ମା। ପରେ ମାଜିଷ୍ଟ୍ରେଟଙ୍କ ଆଗରେ ଯୌନ ନିର୍ଯାତନାର ସମ୍ମୁଖୀନ ହେବାକୁ ପଡ଼ିଥିବା ପୀଡ଼ିତା ବୟାନ ଦେଇଥିଲେ।
