ନୂଆଦିଲ୍ଲୀ,୧୨।୪: କରୋନା ବିରୋଧରେ ଜାରି ରହିଥିବା ଲଢ଼େଇରେ କୋଭିଡ ଭ୍ୟାକ୍ସିନର ବୁଷ୍ଟର ଡୋଜକୁ ନେଇ ରାଜଧାନୀ ଦିଲ୍ଲୀର ସ୍ବାସ୍ଥ୍ୟମନ୍ତ୍ରୀ ଏକ ବଡ଼ ଘୋଷଣା କରିଛନ୍ତି। ଖୁବ୍ଶୀଘ୍ର ଦିଲ୍ଲୀ ସରକାରଙ୍କ ସରକାରୀ ଡାକ୍ତରଖାନାଗୁଡ଼ିକରେ ଲୋକଙ୍କୁ ମାଗଣାରେ ବୁଷ୍ଟର ଡୋଜ ପାଇପାରିବେ ବୋଲି ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ କହିଛନ୍ତି। ଦିଲ୍ଲୀରେ, ଯେଉଁମାନେ କୋଭିଡର ଉଭୟ ଡୋଜ ଏବଂ ଦ୍ୱିତୀୟ ଡୋଜର ୯ମାସ ପୂରିଛି ସେମାନେ ବୁଷ୍ଟର ଡୋଜ୍ ନେଇପାରିବେ। ଏଥିପାଇଁ ଟିକାକରଣ କାର୍ଯ୍ୟକ୍ରମ ଅଧୀନରେ କେନ୍ଦ୍ର ସରକାର ଏକ ନୂତନ ବ୍ୟବସ୍ଥା ଜାରି କରିଛନ୍ତି। ସୂଚନାଯୋଗ୍ୟ, ଦିଲ୍ଲୀରେ ୧୮ ବର୍ଷରୁ ୫୯ ବର୍ଷ ମଧ୍ୟରେ ଥିବା ଲୋକଙ୍କ ପାଇଁ ଏପ୍ରିଲ ୧୦ରୁ ଦିଲ୍ଲୀରେ ବୁଷ୍ଟର ଡୋଜ ଦିଆଯାଉଛି। ଏହି ଡୋଜ୍ ପାଇଁ ଘରୋଇ ଡାକ୍ତରଖାନାରେ ଲୋକଙ୍କୁ ମାତ୍ର ୩୮୬ ଟଙ୍କା ଦେବାକୁ ପଡ଼ୁଛି। କିନ୍ତୁ ସରକାରୀ ଡାକ୍ତରଖାନାଗୁଡ଼ିକରେ ଏହା ମାଗଣା ଉପଲବ୍ଧ ହେବ। ଏହାର ଖର୍ଚ୍ଚ ଦିଲ୍ଲୀସରକାର ବହନ କରିବେ ବୋଲି ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ ଘୋଷଣା କରିଛନ୍ତି। ଅନ୍ୟପଟେ ସତ୍ୟେନ୍ଦ୍ର ଜୈନ କହିଛନ୍ତି, ଆମକୁ କରୋନା ସହ ବଞ୍ଚିବା ଶିଖିବା ଉଚିତ କାରଣ ଆଗାମୀ ୨ରୁ୫ ବର୍ଷ ଯାଏ ଏହା କୁଆଡେ ବି ଯିବ ନାହିଁ। ପ୍ରତିଦିନ ଦେଶରେ ଏକ ନୂତନ ଭାରିଆଣ୍ଟ ଚିହ୍ନଟ ହେଉଛି ବୋଲି ସ୍ବାସ୍ଥ୍ୟମନ୍ତ୍ରୀ କହିଛନ୍ତି।
