ନୂଆଦିଲ୍ଲୀ,୨।୯: ଦିଲ୍ଲୀବାସୀଙ୍କ ପାଇଁ ଏକ ବଡ଼ ଖୁସି ଖବର। ସରକାର ଏପରି ଏକ ଯୋଜନାକୁ ମଞ୍ଜୁରୀ ଦେଇଛନ୍ତି, ଯାହା ମାଧ୍ୟମରେ ଏବେ ଛାତ ଉପରେ ସୋଲାର ଲଗାଇବା ସମ୍ପୂର୍ଣ୍ଣ ମାଗଣା ହେବାକୁ ଯାଉଛି। ଦିଲ୍ଲୀ ସରକାର ନିଜର ସୋଲାର ଏନର୍ଜି ପଲିସିରେ ବଡ଼ ଧରଣର ପରିବର୍ତ୍ତନକୁ ମଞ୍ଜୁରୀ ଦେଇଛନ୍ତି, ଯାହା ଅଧୀନରେ ଘରୋଇ ଗ୍ରାହକମାନଙ୍କ ପାଇଁ ସମ୍ପୂର୍ଣ୍ଣ ମାଗଣା ରୁଫଟପ୍ ସୋଲାର ଯୋଜନା (Free Rooftop Solar Scheme) ଆରମ୍ଭ କରାଯାଇଛି।
ଏହି ଯୋଜନାର ଲକ୍ଷ୍ୟ ହେଉଛି ୨୦୨୭ ସୁଦ୍ଧା ରାଜଧାନୀର ୨.୩ ଲକ୍ଷ ଘରେ ରୁଫଟପ୍ ସୋଲାର ସିଷ୍ଟମ ଲଗାଇବା। ସରକାରଙ୍କ ଏହି ନୂତନ ପଦକ୍ଷେପ ଅନୁଯାୟୀ, ଯେଉଁ ଘରୋଇ ଗ୍ରାହକମାନେ ମାସକୁ ୪୦୦ ୟୁନିଟ ପର୍ଯ୍ୟନ୍ତ ବିଦ୍ୟୁତ ବ୍ୟବହାର କରନ୍ତି, ସେମାନେ ମାଗଣାରେ ସୋଲାର ପ୍ୟାନେଲ ଲଗାଇବା ପାଇଁ ଯୋଗ୍ୟ ବିବେଚିତ ହେବେ। ଏଥିପାଇଁ ଆରମ୍ଭର ସମସ୍ତ ଖର୍ଚ୍ଚ ସରକାର ବହନ କରିବେ। ମୁଖ୍ୟମନ୍ତ୍ରୀ ରେଖା ଗୁପ୍ତା ୧ ସେପ୍ଟେମ୍ୱର ୨୦୨୬ରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ବଡ଼ ପରିବର୍ତ୍ତନ ବିଷୟରେ ଘୋଷଣା କରିଛନ୍ତି।
ନୂଆ ନିୟମ ଅନୁସାରେ, ଯେଉଁ ଘରଗୁଡ଼ିକରେ ମାସକୁ ୪୦୦ ୟୁନିଟ ପର୍ଯ୍ୟନ୍ତ ବିଦ୍ୟୁତ୍ ଖର୍ଚ୍ଚ ହୁଏ, ସେମାନଙ୍କୁ ୩ କିଲୋୱାଟ ପର୍ଯ୍ୟନ୍ତ ସୋଲାର ସିଷ୍ଟମ ମାଗଣାରେ ମିଳିପାରିବ; ତେବେ ଏହା ବୈଷୟିକ ଦୃଷ୍ଟିକୋଣରୁ ସମ୍ଭବପର (feasible) ହେବା ଆବଶ୍ୟକ। ଏଥିପାଇଁ ମୋଟ ପ୍ରାୟ ୧.୫୬ ଲକ୍ଷ ଟଙ୍କାର ପାଣ୍ଠି ଯୋଗାଇ ଦିଆଯିବ, ଯେଉଁଥିରେ କେନ୍ଦ୍ର ସରକାରଙ୍କ ୭୮,୦୦୦ ଟଙ୍କାର ସବସିଡି ଏବଂ ଦିଲ୍ଲୀ ସରକାରଙ୍କ ସମାନ ପରିମାଣର କ୍ୟାପିଟାଲ ସବସିଡି ସାମିଲ ରହିଛି। ଅର୍ଥାତ, ଗ୍ରାହକମାନଙ୍କୁ ପ୍ରାରମ୍ଭିକ ନିବେଶ ଉପରେ କୌଣସି ଖର୍ଚ୍ଚ କରିବାକୁ ପଡ଼ିବ ନାହିଁ।
ଏତିକି ହିଁ ନୁହେଁ, ଏହି ଯୋଜନା ଅଧୀନରେ ୫ ବର୍ଷ ପର୍ଯ୍ୟନ୍ତ ମାଗଣା ରକ୍ଷଣାବେକ୍ଷଣ (maintenance) ମଧ୍ୟ ମିଳିବ। ମନୋନୀତ ଭେଣ୍ଡରମାନେ ଆଗାମୀ ୫ ବର୍ଷ ପର୍ଯ୍ୟନ୍ତ ସୋଲାର ସିଷ୍ଟମର ପରିଚାଳନା ଏବଂ ରକ୍ଷଣାବେକ୍ଷଣ ସମ୍ପୂର୍ଣ୍ଣ ମାଗଣାରେ ତଦାରଖ କରିବେ।
ଏହି ଯୋଜନାର ସବୁଠାରୁ ବଡ଼ ବିଶେଷତ୍ୱ ହେଉଛି ଯେ, ସୋଲାର ପ୍ୟାନେଲ ଲଗାଇବା ପରେ ମଧ୍ୟ ପରିବାରଗୁଡ଼ିକୁ ମିଳୁଥିବା ପୂର୍ୱ ବିଦ୍ୟୁତ ସବସିଡିର ସୁବିଧା ବନ୍ଦ ହେବ ନାହିଁ; ବରଂ ସେମାନେ ଏକାସାଙ୍ଗରେ ଉଭୟ ଲାଭ ପାଇପାରିବେ। ସରଳ ଭାଷାରେ କହିଲେ, ଆପଣଙ୍କୁ ସୋଲାରରୁ ମାଗଣା ବିଦ୍ୟୁତ ମିଳିବ ଏବଂ ଯଦି ଆପଣ ସରକାରୀ ଗ୍ରୀଡକୁ ବିଦ୍ୟୁତ୍ ନିଅନ୍ତି, ତେବେ ସେଥିରେ ମିଳୁଥିବା ରିହାତି (ସବସିଡି) ମଧ୍ୟ ପୂର୍ୱପରି ଜାରି ରହିବ।
ଦିଲ୍ଲୀ ସରକାରଙ୍କ ଏହି ନୂତନ ମାଗଣା ରୁଫଟପ୍ ସୋଲାର ଯୋଜନାର ଲାଭ ଉଠାଇବା ପାଇଁ ଆପଣଙ୍କୁ କେନ୍ଦ୍ର ସରକାରଙ୍କ ‘ପିଏମ ସୂର୍ଯ୍ୟ ଘର’ ପୋର୍ଟାଲ ଜରିଆରେ ହିଁ ଅନଲାଇନ ଆବେଦନ କରିବାକୁ ପଡ଼ିବ। ସର୍ୱପ୍ରଥମେ ଆପଣଙ୍କୁ pmsuryaghar.gov.in ୱେବସାଇଟକୁ ଯାଇ ନିଜର ପଞ୍ଜୀକରଣ (Registration) ସମ୍ପୂର୍ଣ୍ଣ କରିବାକୁ ହେବ।
ତା’ପରେ ଲଗଇନ କରିବା ପରେ Rooftop Solar Application ଫର୍ମ ପୂରଣ କରିବାକୁ ପଡ଼ିବ। ଆବେଦନ ମଞ୍ଜୁର ହେବା କ୍ଷଣି ଆପଣଙ୍କ ପଞ୍ଜୀକୃତ ମୋବାଇଲ ନମ୍ୱର ଏବଂ ପୋର୍ଟାଲରେ Feasibility Approval ର ମେସେଜ ଆସିବ, ଯାହା ପରେ ଭେଣ୍ଡର ଚୟନ ଏବଂ ଇନଷ୍ଟଲେସନ (ସ୍ଥାପନ) କାର୍ଯ୍ୟ କରାଯିବ।
