ଡେରାଡୁନ,୧୧ ।୭: ଉତ୍ତରାଖଣ୍ଡରେ ୨୦୨୨ରେ ହେବାକୁ ଯାଉଛି ବିଧାନସଭା ନିର୍ବାଚନ । ଏହି ନିର୍ବାଚନରେ ଭାରତୀୟ ଜନତା ପାର୍ଟି(ଭାଜପା) ଓ କଂଗ୍ରେସ ମଧ୍ୟରେ ବଡ ଟକ୍କର ହେବ ବୋଲି ଆଲୋଚନା ହେଉଛି । ହେଲେ ଏମାନଙ୍କ ମଧ୍ୟରେ ତୃତୀୟ ଦଳ ଭାବେ ଟକ୍କର ଦେବାକୁ ଯାଉଛି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଆମ ଆଦମୀ ପାର୍ଟି(ଏଏପି) । ଏଥିପାଇଁ ରବିବାର କେଜରିୱାଲ ଡେରାଡୁନ ଗସ୍ତ କରିଛନ୍ତି । ଏହି ସମୟରେ ସେ ଭୋଟ ହାତେଇବାକୁ ଭୋଟରଙ୍କ ପାଇଁ କିଛି ଲୋଭନୀୟ ଘୋଷଣା କରିଛନ୍ତି । ସେ କହିଛନ୍ତି ଆମ ଆଦମୀ ପାର୍ଟି ସରକାର ଗଠନ କଲେ ୩୦୦ୟୁନିଟ ବିଜୁଳୀ ମାଗଣାରେ ଦେବା ସହ ପୁରୁଣା ବିଲ୍ ସମ୍ପୂର୍ଣ୍ଣ ଭାବେ ଛାଡ କରାଯିବ । ଏହାସହ ଉତ୍ତରାଖଣ୍ଡରେ ୨୪ ଘଣ୍ଟା ବିଜୁଳୀ ଯୋଗାଇ ଦିଆଯିବ । ଏହାସହ ଉତ୍ତରାଖଣ୍ଡ କୃଷକଙ୍କୁ ମାଗଣାରେ ବିଜୁଳୀ ଯୋଗାଇ ଦେବାକୁ କଥା ଦେଇଛନ୍ତି କେଜରିୱାଲ । ଡେରାଡୁନରେ ଆୟୋଜିତ ଏକ ଖବରଦାତା ସମ୍ମିଳନୀରେ ପ୍ରଥମେ ଉତ୍ତରାଖଣ୍ଡବାସୀଙ୍କ ନମସ୍କାର ଜଣାଇ କେଜରିୱାଲ ତାଙ୍କ କଥା ଆରମ୍ଭ କରିଥିଲେ । ସେ କହିଥିଲେ ଏହି ଦେବଭୂମୀରେ ଈଶ୍ୱର ସବୁ ଦେଇଛନ୍ତି ହେଲେ କେତେଜଣ ରାଜନୈତିକ ନେତା ଏହାକୁ ନଷ୍ଟ କରି ଚାଲିଛନ୍ତି ।
