ନୂଆଦିଲ୍ଲୀ,୧୭ା୧୧(ଏଜେନ୍ସି):ନଭେମ୍ବର ୧୦ ସନ୍ଧ୍ୟାରେ ନୂଆଦିଲ୍ଲୀସ୍ଥିତ ଲାଲ୍କିଲ୍ଲା ନିକଟରେ ଏକ ବଡ଼ଧରଣର ବିସ୍ଫୋରଣରେ ଥରି ଉଠିଥିଲା ଜାତୀୟ ରାଜଧାନୀ। ଚାହୁଁ ଚାହୁଁ ୧୩ ଜଣଙ୍କ ମୃତ୍ୟୁ ଘଟିବା ସହ ଅନେକ ଆହତ ହେବା ପରେ ସାରା ଦେଶ ସ୍ତବ୍ଧ ହୋଇଯାଇଥିଲା। ୨୦୦୮ ସେପ୍ଟେମ୍ବର ୧୩ ସିରିଏଲ୍ ବ୍ଲାଷ୍ଟ ଏବଂ ୨୦୧୧ ସେପ୍ଟେମ୍ବର ୭ ହାଇକୋର୍ଟ ଗେଟ୍ ନମ୍ବର ୩ର ବିସ୍ଫୋରଣ ପରେ କଡ଼ା ସୁରକ୍ଷା ବଳୟରେ ଥିବା ଦିଲ୍ଲୀରେ ଏହା ଥିଲା ଆତଙ୍କବାଦୀଙ୍କ ସବୁଠି ଆକ୍ରମଣ। ତେଣୁ ଏହି ଆତ୍ମଘାତୀ ବିସ୍ଫୋରଣର ତଦନ୍ତ ଏନ୍ଆଇଏକୁ ଦିଆଯାଇଛି। ଦିଲ୍ଲୀ ପୋଲିସ ସମେତ ଅନ୍ୟ କେତେକ ସୁରକ୍ଷା ଏଜେନ୍ସି ମଧ୍ୟ ବିସ୍ଫୋରଣକୁ ନେଇ ଦିଲ୍ଲୀ, ହରିୟାଣା, ଉତ୍ତରପ୍ରଦେଶ ଓ ଜମ୍ମୁ-କଶ୍ମୀରରେ ତନାଘନା ଚଳାଇଛନ୍ତି। ଇତିମଧ୍ୟରେ ଲାଲ୍କିଲ୍ଲା ବିସ୍ଫୋରଣସ୍ଥଳରୁ ମିଳିଥିବା କିଛି ସୁରାକ୍ ସମସ୍ତଙ୍କୁ ଚକିତ କରିଦେଇଛି। ଜମ୍ମୁ-କଶ୍ମୀର ପୁଲ୍ଓ୍ବାମା ନିବାସୀ ୩୫ ବର୍ଷୀୟ ଡାକ୍ତର ଉମର ଉନ୍ ନବୀ ଆତ୍ମଘାତୀ କାଣ୍ଡ ଭିଆଇବା ପୂର୍ବରୁ ନିଜ ହୁଣ୍ଡାଇ ଆଇ୨୦ କାର୍ରେ ବିପୁଳ ବିସ୍ଫୋରକ ନେଇ ଜନଗହଳିପୂର୍ଣ୍ଣ ଲାଲ୍ କିଲ୍ଲା ପରିସରକୁ ଯାଇଥିଲେ। ବିସ୍ଫୋରଣ ପରେ କାର୍ ସହ ସେ ଜଳିଯାଇଥିବାବେଳେ ଅନ୍ୟ ୧୩ ଜଣଙ୍କ ମୃତ୍ୟୁ ଘଟିଥିଲା। ସେହି କାର୍ ଭଗ୍ନାବଶେଷ ନିକଟରୁ ଏବେ ୩ଟି ୯ ଏମ୍ଏମ୍ ଗୁଳି ମିଳିଛି। ସେଥିରୁ ୨ଟି ଜୀବନ୍ତ ଓ ଗୋଟିଏ ବ୍ଲାଙ୍କ୍ କ୍ୟାଟ୍ରିଜ୍। ଏହି ଧରଣର ଗୁଳି କେବଳ ସାମରିକ ବ୍ୟବହାର ପାଇଁ ଉଦ୍ଦିଷ୍ଟ ହୋଇଥିବାରୁ ବିସ୍ଫୋରଣସ୍ଥଳକୁ ତାହା କିପରି ଆସିଲା ସେନେଇ ତମାମ୍ ସୁରକ୍ଷା ଏଜେନ୍ସି ତଦନ୍ତ ଚଳାଇଛନ୍ତି। ପୋଲିସ ସୂତ୍ରରୁ ଜଣାପଡ଼ିଛି ଯେ, ଘଟଣାସ୍ଥଳରେ ସେଦିନ ଉପସ୍ଥିତ ଥିବା ଦିଲ୍ଲୀ ପୋଲିସର ସମସ୍ତ ଅଧିକାରୀ ଓ କର୍ମଚାରୀଙ୍କ କ୍ୟାଟ୍ରିଜ୍ ଯାଞ୍ଚ କରାଯାଇଛି। ସେମାନଙ୍କ ମଧ୍ୟରୁ କାହାର କ୍ୟାଟ୍ରିଜ୍ ଊଣା ହୋଇନାହିଁ। ଯାହାଙ୍କୁ ଯେତିକି ଗୁଳି ଆଲଟ୍ କରାଯାଇଥିଲା ସେମାନଙ୍କ ନିକଟରେ ସେତିକି କ୍ୟାଟ୍ରିଜ୍ ରହିଛି। ଅଲ୍-ଫଲାହ ୟୁନିଭର୍ସିଟିରେ ପଢ଼ାଉଥିବା ଡାକ୍ତର ଉମରଙ୍କ ଗାଡ଼ିରେ ସେହି ଗୁଳି ଥିଲା କି ତାହା ଉପରେ ବର୍ତ୍ତମାନ ତନାଘନା ଚାଲିଥିବା ସୂତ୍ରରୁ ଜଣାପଡ଼ିଛି। ଯଦି ଉମର ନିଜେ କାର୍ରେ ଉକ୍ତ ଗୁଳିକୁ ନେଇ ଯାଇ ନ ଥିଲେ, ତେବେ ଏହି ବିସ୍ଫୋରଣ ପଛରେ ଆଉ କିଏ ଅଛନ୍ତି ତାହା ଅଧିକ ଖୋଳତାଡ଼ କଲେ ପଦାକୁ ଆସିପାରେ। ସୂତ୍ରରୁ ଆହୁରି ସାମ୍ନାକୁ ଆସିଛି ଯେ, ଲାଲ୍କିଲ୍ଲା ବିସ୍ଫୋରଣରେ ଟ୍ରାଇଆସେଟୋନ୍ ଟ୍ରାଇପେରୋକ୍ସାଇଡ୍ (ଟିଏଟିପି) ବ୍ୟବହାର କରାଯାଇଥିଲା। ‘ମଦର ଅଫ୍ ସଟନ୍’ ନାମରେ ପରିଚିତ ଟିଏପିଟି ହେଉଛି ଏକ ଅତ୍ୟନ୍ତ ଭୋଲାଟାଇଲ୍ ବିସ୍ଫୋରକ। ବିନା ଡିଟୋନେଟରରେ ଏହାର ବିସ୍ଫୋରଣ ହୋଇଥାଏ।
ଏଥିପାଇଁ କୌଣସି ଉପକରଣ ଅନାବଶ୍ୟକ। କେବଳ ଉଚ୍ଚ ତାପମାତ୍ରାରେ ଏହା ଫୁଟି ବଡ଼ ବିସ୍ଫୋରଣର ରୂପ ନେଇପାରେ। ୨-୩ କେ.ଜି. ଆମୋନିୟମ୍ ନାଇଟ୍ରେଟ୍, ତୈଳ ଓ ଅନ୍ୟ ରାସାୟନିକ ପଦାର୍ଥ ସହ ଟିଏପିଟି ସଂସ୍ପର୍ଶରେ ଆସିଲେ ତାହା ଏପରି ଭୟାବହ ବିସ୍ଫୋରଣ ଘଟିବ, ଯାହା ସାମରିକ ବ୍ୟବହାର ନିମନ୍ତେ ଉଦ୍ଦିଷ୍ଟ ବିସ୍ଫୋରଣର ସାମର୍ଥ୍ୟ ବହନ କରିଥାଏ। ଜଣେ ବରିଷ୍ଠ ସୁରକ୍ଷା ଅଧିକାରୀଙ୍କ ମତରେ ଟିଏପିଟିର ସେନ୍ସିଟିଭିଟି ଏତେ ଅଧିକ ଯେ, ଏଥିପାଇଁ କୌଣସି ଡିଟୋନେଟର ଦରକାର ପଡ଼ି ନ ଥାଏ। ସମ୍ଭବତଃ ଜମ୍ମୁ-କଶ୍ମୀରର ନୌଗାମ୍ ଥାନାରେ ଶୁକ୍ରବାର ବିଳମ୍ବିତ ରାତିରେ ଘଟିଥିବା ବିସ୍ଫୋରଣ ପଛରେ ମଧ୍ୟ ଏହି କାରଣ କାମ କରିଥାଇପାରେ। ଏଭଳି ସ୍ଥିତିରେ କ୍ରମଶଃ ସାମ୍ନାକୁ ଆସିବାରେ ଲାଗିଥିବା ନୂଆ ନୂଆ ତଥ୍ୟ ସିକ୍ୟୁରିଟି ଏଜେନ୍ସିଗୁଡ଼ିକ ପାଇଁ ବିସ୍ଫୋରଣର ମୂଳ ପର୍ଯ୍ୟନ୍ତ ଯିବାକୁ ବାଟ ଦେଖାଇବା ସହ ଆହ୍ବାନ ମଧ୍ୟ ସୃଷ୍ଟି କରିଛି। ଏଥିରେ ସେନା କିମ୍ବା ପୋଲିସର ସମ୍ପୃକ୍ତି ଜଣାପଡ଼ିଲେ ତଦନ୍ତକୁ ହୁଏତ ବାଟବଣା କରାଯିବା ନେଇ ଅନେକଙ୍କ ମନରେ ସନ୍ଦେହ ଉପୁଜିପାରେ।
Dharitri – Odisha’s No.1 Odia Daily
