ନୂଆଦିଲ୍ଲୀ,୧୦।୪ : ଶିଶୁଙ୍କୁ ନ୍ୟାୟ ମିଳିବାରେ ବିଳମ୍ବ ହେବାରେ ଲାଗିଛି। ଦେଶର ସବୁଠାରୁ ଜନବହୁଳ ରାଜ୍ୟ ଉତ୍ତରପ୍ରଦେଶରେ ସର୍ବାଧିକ ୬୭,୨୦୦ ଶିଶୁଙ୍କ ବିରୋଧରେ ଜଘନ୍ୟ ଅପରାଧ ମାମଲା ବିଚାରାଧୀନ ଅଛି। ଯୌନ ଅପରାଧରୁ ଶିଶୁମାନଙ୍କୁ ସୁରକ୍ଷା ଦେବା (ପୋକ୍ସୋ) ଅଧିନିୟମ ଅନୁଯାୟୀ ରାଜ୍ୟରେ ବିଚାରାଧୀନ ମାମଲା ପ୍ରାୟ ୨୮ ପ୍ରତିଶତ ଅଟେ। ତେବେ କୋର୍ଟର କାର୍ଯ୍ୟକଳାପରେ ପୀଡିତ ଶିଶୁଙ୍କ ନିର୍ଯାତନାକୁ ଏଡାଇବା ପାଇଁ ଫାଷ୍ଟ ଟ୍ରାକ କୋର୍ଟରେ ଶୀଘ୍ର ମାମଲା ସମାପ୍ତ କରିବାକୁ ଏକ ବ୍ୟବସ୍ଥା ରହିଛି।
ଏକ ରିପୋର୍ଟ ଅନୁଯାୟୀ ପ୍ରତ୍ୟେକ ଜିଲାରେ ଅତି କମରେ ଗୋଟିଏ ଫାଷ୍ଟ ଟ୍ରାକ କୋର୍ଟ ଅଛି। କିନ୍ତୁ ୨୦୧୬ ମସିହାରୁ ବିଚାରାଧୀନ ମାମଲାରେ ୧୭୦ ପ୍ରତିଶତ ବୃଦ୍ଧି ଘଟିଛି। ୨୦୧୬ମସିହାରେ, ୯୦,୨୦୫ ବିଚାରାଧୀନ ମାମଲା ଥିଲା । ୨୦୨୩ ମସିହା ଜାନୁଆରୀରେ ଏହା ୨ ଲକ୍ଷ ୪୩ ହଜାର ୨୩୭କୁ ବୃଦ୍ଧି ପାଇଛି। ମହାରାଷ୍ଟ୍ରରେ ଏଭଳି ୩୩ ହଜାର ବିଚାରାଧୀନ ମାମଲା ରହିଛି। ଏହା ପଛକୁ ତାଲିକାରେ ତୃତୀୟ ସ୍ଥାନରେଥିବା ପଶ୍ଚିମବଙ୍ଗରେ ୨୨,୧୦୦ ବିଚାରାଧୀନ ମାମଲା ରହିଛି।
ବିହାରରେ ୧୬ ହଜାର, ଓଡିଶାରେ ୧୨ ହଜାର ଏବଂ ତେଲେଙ୍ଗାନା ଓ ମଧ୍ୟପ୍ରଦେଶରେ ୧୦ ହଜାର ଲେଖାଏଁ ବିଚାରାଧୀନ ମାମଲା ରହିଛି।
ଜାତୀୟ ରାଜଧାନୀ ଦିଲ୍ଲୀରେ ପୋକ୍ସୋ ର ୯,୧୦୮ ବିଚାରାଧୀନ ମାମଲା ଅଛି । ରାଜସ୍ଥାନରେ ୮,୯୨୧ ବିଚାରାଧୀନ ମାମଲା, ଆସାମରେ ୬,୮୭୫, ହରିୟାଣାରେ ୪,୬୮୮ ଏବଂ ଝ ାଡଖଣ୍ଡରେ ୪,୪୦୮ମାମଲା ରହିଛି। ନିକଟରେ ଶେଷ ହୋଇଥିବା ବଜେଟ ଅଧିବେଶନରେ ଏକ ପ୍ରଶ୍ନର ଉତ୍ତରରେ କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁ ସଂସଦକୁ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ମହିଳା ଏବଂ ଶିଶୁଙ୍କ ପ୍ରତି ଯୌନ ଅପରାଧ ସହ ଜଡିତ ମାମଲାଗୁଡ଼ିକର ଶୀଘ୍ର ସମାଧାନ କରିବାକୁ ନିଶ୍ଚିତ ଏବଂ ଯାଞ୍ଚ ପରୀକ୍ଷା ପାଇଁ ଦୁଇ ମାସର ସମୟ ସୀମା ଧାର୍ଯ୍ୟ କରାଯାଇଛି।
ପୋକ୍ସୋ ଏବଂ ବଳାତ୍କାର ମାମଲାଗୁଡ଼ିକର ସମାଧାନ ପାଇଁ କେନ୍ଦ୍ରୀୟ ପାଣ୍ଠି ସହିତ ୭୬୪ ସ୍ବତନ୍ତ୍ର ଏପଟିସି(ଫାଷ୍ଟ ଟ୍ରାକ କୋର୍ଟ) ଗଠନ କରାଯାଇଛି। ୪୧୧ ଟି ସ୍ବତନ୍ତ୍ର ଏଫଟିସି ମାମଲା ପାଇଁ କାର୍ଯ୍ୟ କରୁଛି। ଏହି ଅଦାଲତଗୁଡ଼ିକ ଗୋଟିଏ ବର୍ଷରେ ୧.୪ ଲକ୍ଷ ମାମଲାର ସମାଧାନ କରୁଛନ୍ତି।
