ଭୁବନେଶ୍ୱର,୧୪ା୧୦(ବ୍ୟୁରୋ): ରାଜ୍ୟ ମହିଳା କମିଶନଙ୍କ ନିକଟରେ ବ୍ରହ୍ମପୁରର କେ. ଦୀପିକା ଗୁରୁବାର ହାଜର ହୋଇଛନ୍ତି। ନିଜକୁ ସ୍ତ୍ରୀ ଓ ତାଙ୍କ ସନ୍ତାନକୁ ପରିଚୟ ମାନ୍ୟତା ଦାବିରେ ଦୀର୍ଘ ୭୨ଦିନ ଧରି ସେ ଶ୍ୱଶୁର ଘର ଆଗରେ ଧାରଣାରେ ବସିଥିଲେ। ହେଲେ କୌଣସି ସମାଧାନ ବାହାରି ପାରିନାହିଁ। ତେଣୁ ସମସ୍ୟାର ସମାଧାନ ଲାଗି ଦୀପିକା ସାମାଜିକ କର୍ମୀ ପ୍ରମିଳା ତ୍ରିପାଠୀଙ୍କୁ ଧରି ମହିଳା କମିଶନଙ୍କ ନିକଟରେ ଆଗୁଆ ହାଜର ହୋଇ ନ୍ୟାୟ ପାଇଁ ଗୁହାରି ଜଣାଇଛନ୍ତି। ତେବେ ଶୁକ୍ରବାର ତାଙ୍କ ମାମଲାର ଶୁଣାଣି ହେବ ବୋଲି ସୂଚନା ମିଳିଛି। ଏନେଇ ଦୀପିକା ଗଣମାଧ୍ୟମ ଆଗରେ କହିଛନ୍ତି, ଶାଶୁ ଶ୍ୱଶୁରଙ୍କୁ ମୁଁ ବାଧ୍ୟ କରୁନି ଯେ ମୋତେ ଘରକୁ ନିଅନ୍ତୁ। ମୁଁ କେବଳ ମୋ ସ୍ବାମୀ’ଙ୍କୁ ମୋ’ ଅଧିକାର ମାଗୁଛି। ହେଲେ ଦିନେଶକୁ ମୋ’ ସହ ମିଶାଇବାକୁ ଶାଶୁଘର ଲୋକେ ଦେଲେନାହିଁ। ନ୍ୟାୟ ପାଇବା ପାଇଁ ତାଙ୍କ ଘର ଦୁଆରେ ଧାରଣା ଦେଇଛି। ତଥାପି ସେମାନେ ମୋତେ ହଇରାଣ ହରକତ କରୁଛନ୍ତି ବୋଲି ଦୀପିକା ଅଭିଯୋଗ କରିଛନ୍ତି। ଅପରପକ୍ଷରେ ପ୍ରମିଳା କହିଛନ୍ତି ମହିଳା କମିଶନଙ୍କ ଉପରେ ବିଶ୍ୱାସ ରହିଛି। ତେବେ ଦିନେଶ ଆସିଲେ ଯାହା ସମାଧାନ ହୋଇପାରିବ।
ସୂଚନାଯୋଗ୍ୟ, ବ୍ରହ୍ମପୁର ବଡ଼ବଜାର ଦେଶୀ ବେହେରା ସାହିର କେ. ଦୀପିକା ଏବଂ କେ. ଦିନେଶଙ୍କ ମଧ୍ୟରେ ସୃଷ୍ଟି ହୋଇଥିବା ପ୍ରେମ ସମ୍ପର୍କ ପରେ ଧୋକା ପାଲଟିଥିଲା। ଦୁହିଁଙ୍କ ସମସ୍ୟା ନେଇ ହାଇକୋର୍ଟରେ ମାମଲା ବିଚାରାଧୀନ ଥିବାବେଳେ ଦିନେଶ ଅନ୍ୟ ଜଣେ ଯୁବତୀଙ୍କୁ ବିବାହ କରୁଥିବା ଦୀପିକା ଖବର ପାଇଥିଲେ। ତେଣୁ ସ୍ତ୍ରୀର ମାନ୍ୟତା ଓ ନିଜ ୧୯ ମାସ ଛୁଆର ପରିଚୟ ଦାବିରେ ସେ ଦିନେଶଙ୍କ ଘର ଆଗରେ ଧାରଣାରେ ବସି ରହିବା ସହ ନ୍ୟାୟ ପାଇଁ ମହିଳା କମିଶନଙ୍କ ଦ୍ୱାରସ୍ଥ ହୋଇଥିଲେ। ଏନେଇ କମିଶନଙ୍କ ପକ୍ଷରୁ ଉଭୟ ଦୀପିକା ଓ ଦିନେଶଙ୍କ ପରିବାରଙ୍କୁ ନୋଟିସ କରାଯାଇଥିଲା। ନୋଟିସ ପାଇ ସେପ୍ଟେମ୍ବର ୧୯ରେ ଦୀପିକା ପରିବାରବର୍ଗଙ୍କ ସହ ସ୍ବେଚ୍ଛାସେବୀ ପ୍ରମିଳା ତ୍ରିପାଠୀଙ୍କୁ ଧରି ମହିଳା କମିଶନରଙ୍କ ପାଖରେ ହାଜର ହୋଇଥିଲେ ମଧ୍ୟ ଦିନେଶ ଆସି ନ ଥିଲେ। ଫଳରେ ଉଭୟଙ୍କ ମଧ୍ୟରେ ହୋଇଥିବା ବିବାଦର ସମାଧାନ ହୋଇପାରି ନ ଥିଲା। ତେଣୁ ଥାନା ମାଧ୍ୟମରେ ଦିନେଶଙ୍କ ପାଖକୁ ପୁଣି ଥରେ ନୋଟିସ କରାଯିବା ସହ ବ୍ରହ୍ମପୁର ଏସ୍ପିଙ୍କ ଜରିଆରେ ମଧ୍ୟ ହାଜର ହେବା ପାଇଁ ନୋଟିସ ଜାରି କରାଯାଇ ଅକ୍ଡୋବର ୧୪ରେ ପରବର୍ତ୍ତୀ ଶୁଣାଣି ହେବ ବୋଲି କୁହାଯାଇଥିଲା।
