ନୂଆଦିଲ୍ଲୀ, ୭ା୯ (ପି.ଟି.)- ବିଶ୍ୱଚମ୍ପିୟନଶିପ୍ ରୌପ୍ୟ ବିଜୟୀ ରେସଲର ଦୀପକ ପୁନିଆ ହସ୍ପିଟାଲରୁ ଛାଡ଼ ପାଇଛନ୍ତି। ତାଙ୍କୁ ହୋମ୍ ଆଇସୋଲେଶନରେ ରହିବା ଲାଗି ପରାମର୍ଶ ଦିଆଯାଇଛି। ପୁନିଆ ନ୍ୟାଶନାଲ କ୍ୟାମ୍ପରେ ଯୋଗ ଦେବାଲାଗି ପହଞ୍ଚତ୍ବା ପରେ ତାଙ୍କର କୋଭିଡ୍-୧୯ ଟେଷ୍ଟ ହୋଇଥିଲା ଏବଂ ପଜିଟିଭ ଆସିଥିଲା। ଅଲିମ୍ପିକ ଯୋଗ୍ୟତା ହାସଲ କରିଥିବା ପୁନିଆ (୮୬କେଜି) ଙ୍କ ବ୍ୟତୀତ ଅନ୍ୟ ଦୁଇ ରେସ୍ଲର ନବୀନ(୬୫କେଜି) ଓ କ୍ରିଷନ (୧୨୫କେଜି)ଙ୍କର ମଧ୍ୟ ପଜିଟିଭ ଆସିଥିଲା। ଏହି ସମସ୍ତ ୩ଜଣ ସୋନେପତସ୍ଥିତ ସାଇ ସେଣ୍ଟରରେ ଆୟୋଜିତ ଜାତୀୟ କ୍ୟାମ୍ପରେ ଯୋଗ ଦେବା ଲାଗି ଆସିଥିଲେ ଏବଂ କ୍ୱାରାଣ୍ଟାଇନ୍ରେ ଥିଲେ। ପଜିଟିଭ୍ ଜଣାପଡ଼ିବା ପରେ ସେମାନଙ୍କୁ ସତର୍କତାମୂଳକ ପଦକ୍ଷେପ ସ୍ବରୂପ ସାଇର ତାଲିକାଭୁକ୍ତ ଏକ ହସ୍ପିଟାଲରେ ଭର୍ତ୍ତି କରାଯିବା ସହ ସେମାନଙ୍କ ଉପରେ ନଜର ରଖା ଯାଇଥିଲା। ପ୍ରୋଟୋକଲ ଅନୁସାରେ କ୍ୟାମ୍ପ ସ୍ଥଳରେ ପହଞ୍ଚତ୍ବା ମାତ୍ରେ କୋଭିଡ୍-୧୯ ଚିହ୍ନଟ ପାଇଁ କୋଚ ଓ ସପୋର୍ଟ ଷ୍ଟାଫ୍ଙ୍କ ସମେତ ସମସ୍ତ ରେସ୍ଲରଙ୍କ ଆରଟି-ପିସିଆର ଟେଷ୍ଟ ବାଧ୍ୟତାମୂଳକ। କ୍ୟାମ୍ପରେ ଯୋଗଦେବା ଲାଗି ସମସ୍ତ ରେସ୍ଲର ସେପ୍ଟେମ୍ବର ୧ରେ ଏକାଠି ହୋଇଥିଲେ। ପୂର୍ବରୁ ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପିୟନ ତଥା ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଥିବା ଏକମାତ୍ର ଭାରତୀୟ ମହିଳା ରେସ୍ଲର ଭିନେଶ ଫୋଗତ୍ଙ୍କର କୋଭିଡ୍ ଟେଷ୍ଟରେ ପଜିଟିଭ୍ ଆସିଥିଲା। ଫଳରେ ସେ ଖେଳରନତ୍ ପୁରସ୍କାର ଗ୍ରହଣ କରିବା ଲାଗି ଗତସପ୍ତାହରେ ଅନୁଷ୍ଠିତ ଜାତୀୟ କ୍ରୀଡ଼ା ପୁରସ୍କାର ଉତ୍ସବରେ ଯୋଗ ଦେଇ ପାରି ନ ଥିଲେ।
