ବଲାଙ୍ଗୀର,୨୪।୮(ସୁନିଲ କୁମାର ମହାନ୍ତି): ବଲାଙ୍ଗିର ଜିଲା କଣ୍ଟାବାଞ୍ଜି ସରକାରୀ ହସ୍ପିଟାଲରୁ ଆସିଛି ଅଭାବନୀୟ ଚିତ୍ର। କଣ୍ଟାବାଞ୍ଜି ସରକାରୀ ହସ୍ପିଟାଲରେ ଚିକିତ୍ସିତ ହେଉଥିବା ଖଇରପଦର ଗାଁର ୧୨ ବର୍ଷୀୟା ସୂର୍ଯ୍ୟକାନ୍ତି ଛୁରାଙ୍କ ମୃତ୍ୟୁ ପରେ ପରିବାର ଲୋକେ ବାଇକରେ ମୃତଦେହ ନେବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଝାଡ଼ାବାନ୍ତି ହେବାରୁ ରବିବାର ସୂର୍ଯ୍ୟକାନ୍ତିଙ୍କୁ କଣ୍ଟାବାଞ୍ଜି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ସୋମବାର ତାଙ୍କର ମୃତ୍ୟୁ ହୋଇଥିଲା।
ମୃତ୍ୟୁ ପରେ ପରିବାର ଲୋକେ ମୃତଦେହକୁ ନିଜ ଗାଁ ଖଇରପଦରକୁ ବାଇକ ଯୋଗେ ନେଇଯାଇଥିଲେ। ମୃତ ଦେହକୁ ବାଇକ ନେଉଥିବା ସମୟର ଭିଡିଓ ସୋସିଆଲ ମିଡିଆରେ ପ୍ରସାରିତ ହେବାପରେ ଘଟଣାଟି ଚର୍ଚ୍ଚାକୁ ଆସିଛି।
ତେବେ ଘଟଣା ସମ୍ପର୍କରେ ପରିବାର ଲୋକଙ୍କୁ ପଚାରିବାରୁ ସେମାନେ ମୃତଦେହ ନେବା ପାଇଁ ହସ୍ପିଟାଲ କର୍ତ୍ତୃପକ୍ଷଙ୍କୁ କୌଣସି ଶବବାହକ ଗାଡ଼ି ଯୋଗାଇଦେବାକୁ କହି ନ ଥିବା ସୂଚନା ମିଳିଛି। ପରିବାର ଲୋକେ କାହାକୁ କିଛି ନ କହି ନିଜେ ବାଇକରେ ମୃତଦେହ ନେଇଯାଇଥିବା କହିଛନ୍ତି।
ଅନ୍ୟପଟେ ଘଟଣାକୁ ନେଇ ସୋସିଆଲ ମିଡିଆରେ ବିଭିନ୍ନ ଚର୍ଚ୍ଚା ହେଉଥିବାବେଳେ ଗରିବ ପରିବାରବର୍ଗଙ୍କ ମୃତ ବ୍ୟକ୍ତିଙ୍କ ପାଇଁ ହସ୍ପିଟାଲ କର୍ତ୍ତୃପକ୍ଷଙ୍କ ପକ୍ଷରୁ ଗାଡ଼ି ଖଣ୍ଡେ ବ୍ୟବସ୍ଥା କରି ନ ପାରିବା ଏବେ ଆଲୋଚନାର ବିଷୟ ହୋଇଛି l