ଓ୍ବାଶିଂଟନ: ଆମେରିକୀୟ କଣ୍ଟେଣ୍ଟ୍ କ୍ରିଏଟର ମେଗାନ ଡେଲ୍ ରେ ଏବେ ତାଙ୍କ ଅଜବ ପ୍ରେମ ସମ୍ପର୍କକୁ ନେଇ ଚର୍ଚ୍ଚାରେ ଅଛନ୍ତି। ସେ ତାଙ୍କ ବାପାଙ୍କ ବନ୍ଧୁଙ୍କ ସହ ଦୀର୍ଘ ୮ ବର୍ଷ ଧରି ରିଲେଶନ୍ଶିପରେ ଅଛନ୍ତି ବୋଲି ସୋସିଆଲ ମିଡିଆ ପ୍ଲାଟ୍ଫର୍ମ ଟିକ୍ଟକ୍ରେ ସୂଚନା ଦେଇଛନ୍ତି। ବାପାଙ୍କର ବନ୍ଧୁ ହୋଇଥିବାରୁ ସେ ପିଲାଦିନେ ତାଙ୍କ ପାର୍ଟନରଙ୍କୁ ଅଙ୍କଲ ଡାକୁଥିବା ମେଗାନ କହିଛନ୍ତି। ସେ ୧୮ ବର୍ଷ ବୟସର ହୋଇଥିବାବେଳେ ପ୍ରଥମଥର ପାଇଁ ତାଙ୍କ ବୟୋଜ୍ୟେଷ୍ଠ ପାର୍ଟନରଙ୍କ ସହ ଡେଟ୍ କରିଥିଲେ। ଏବେ ତାଙ୍କ ବୟସ ୨୬ ଥିବାବେଳେ ତାଙ୍କ ପାର୍ଟନରଙ୍କ ବୟସ ୫୨ ହୋଇଥିବା ମେଗାନ କହିଛନ୍ତି। ସେ ଟିକ୍ଟକ୍ରେ ନିଜ ପାର୍ଟନରଙ୍କ ସହ ଏକାଠି କିଛି ଭିଡିଓ ମଧ୍ୟ ଶେୟାର କରିଛନ୍ତି। ତେବେ ନିଜଠାରୁ ୨ ଗୁଣା ବୟସରେ ବଡ଼ ବ୍ୟକ୍ତିଙ୍କ ସହ ସମ୍ପର୍କ ସ୍ଥାପନ କରିଥିବାରୁ ଅନେକ ୟୁଜର୍ସ ମେଗାନଙ୍କୁ ସମାଲୋଚନା କରିଛନ୍ତି। ଏନେଇ ମେଗାନ କୁହନ୍ତି, ସେ ସାବାଳିକା ହେବା ପରେ ହିଁ ଏହି ସମ୍ପର୍କ ସ୍ଥାପନ କରିଥିଲେ। ଉଭୟଙ୍କ ସହମତି ଥିବାରୁ ଏପରି ସମ୍ପର୍କରେ କୌଣସି ଅସୁବିଧା ନାହିଁ। ଏହି ସମ୍ପର୍କରେ ବୟସ କେବେ ବି ବାଧକ ସାଜିନାହିଁ ବୋଲି ମେଗାନ କହିଛନ୍ତି। ସେମାନେ ଏକସଙ୍ଗେ ସର୍ବସାଧାରଣ ସ୍ଥାନରେ ବୁଲିବା ସମୟରେ ଲୋକମାନେ ତାଙ୍କୁ ବେଳେବେଳେ ବାପା ଓ ଝିଅ ବୋଲି ଭାବି ନେଇଥାନ୍ତି। କିନ୍ତୁ ଏହା ତାଙ୍କ ପାଇଁ ଗୁରୁତ୍ୱପୂର୍ଣ୍ଣ ହୋଇ ନ ଥିବା ମେଗାନ କହିଛନ୍ତି। ଆଗକୁ ସେ ତାଙ୍କ ବୟୋଜ୍ୟେଷ୍ଠ ପାର୍ଟନରଙ୍କ ସହ ବିବାହ କରିବାକୁ ଯୋଜନା କରୁଛନ୍ତି ବୋଲି ମେଗାନ କହିଛନ୍ତି।
