ନୂଆଦିଲ୍ଲୀ,୨୩।୪: ଏନ୍ସିଇଆର୍ଟି ପୁସ୍ତକର ଦଶମ ଶ୍ରେଣୀ ବିଜ୍ଞାନ ପାଠ୍ୟକ୍ରମରୁ ଡାର୍ଓ୍ବିନ୍ଙ୍କ ଜୈବ ବିବର୍ତ୍ତନ ତତ୍ତ୍ୱକୁ ବାଦ୍ ଦିଆଯାଇଥିବାରୁ ବୈଜ୍ଞାନିକମାନେ ଏହାର ନିନ୍ଦା କରିଛନ୍ତି। ପ୍ରାୟ ୧,୮୦୦ ବୈଜ୍ଞାନିକ, ଶିକ୍ଷାବିତ୍, ବିଜ୍ଞାନ ଶିକ୍ଷକ, ବିଜ୍ଞାନକୁ ଲୋକପ୍ରିୟ କରାଉଥିବା ବ୍ୟକ୍ତି ଓ ବିଭିନ୍ନ ଅନୁଷ୍ଠାନର ବ୍ୟକ୍ତିବିଶେଷ ଏନେଇ ଅସନ୍ତୋଷ ବ୍ୟକ୍ତ କରିବା ସହ ଗମ୍ଭୀର ଚିନ୍ତା ପ୍ରକଟ କରିଛନ୍ତି। ବ୍ରେକ୍ଥ୍ରୁ ସାଇନ୍ସ ସୋସାଇଟି (ବିଏସ୍ଏସ୍) ଅଧୀନରେ ଉପରୋକ୍ତ ବ୍ୟକ୍ତିବିଶେଷ ଏକ ଖୋଲା ଚିଠିରେ ସ୍ବାକ୍ଷର କରି ଡାର୍ଓ୍ବିନ୍ଙ୍କ ତତ୍ତ୍ୱ ପାଠ୍ୟକ୍ରମ ଜାରି ରଖିବା ଲାଗି ସରକାରଙ୍କୁ ନିବେଦନ କରିଛନ୍ତି। ନବମ ଓ ଦଶମ ଶ୍ରେଣୀ ବିଜ୍ଞାନ ପୁସ୍ତକରେ ଡାର୍ଓ୍ବିନ୍ଙ୍କ ଜୈବ ବିବର୍ତ୍ତନ ବିଷୟର ଯଥେଷ୍ଟ ଗୁରୁତ୍ୱ ରହିଥିବା ସେମାନେ ଦର୍ଶାଇଛନ୍ତି।
ମହାମାରୀ ବେଳେ ପାଠପଢ଼ା ବୋଝ କମାଇବା ପାଇଁ ଅନ୍ତରୀଣ ପଦକ୍ଷେପ ସ୍ବରୂପ ଡାର୍ଓ୍ବିନ୍ ତତ୍ତ୍ୱ ପାଠ୍ୟକ୍ରମକୁ ବାଦ୍ ଦିଆଯାଇଥିଲା। ତେବେ ବିଷୟବସ୍ତୁ ସୁବ୍ୟବସ୍ଥୀକରଣ ସ୍ବରୂପ ସ୍ଥାୟୀ ଭାବେ ଉକ୍ତ ବିଷୟକୁ ହଟାଇ ଦିଆଯାଇଥିବା ଏନ୍ସିଇଆର୍ଟି ଦସ୍ତାବିଜ୍ରେ ଉଲ୍ଲେଖ ରହିଛି। ବିଜ୍ଞାନର ଏହି ମୌଳିକ ଗବେଷଣାର ବିଷୟବସ୍ତୁ ପଢ଼ିବାରୁ ପିଲାମାନଙ୍କୁ ବଞ୍ଚତ୍ତ କରାଯିବା ଦ୍ୱାରା ସେମାନଙ୍କ ଚିନ୍ତା କରିବା ପ୍ରକ୍ରିୟା ଗୁରୁତର ବାଧାପ୍ରାପ୍ତ ହେବ ବୋଲି ଦେଶର ବୈଜ୍ଞାନିକ ସମୁଦାୟ ବିଶ୍ୱାସ କରୁଛି।
