ଦାରିଙ୍ଗବାଡି, ୧୭।୯ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବନାଞ୍ଚଳ ସିମନବାଡି ସେକ୍ସନର ଡିପୁମାହାଠାରେ ଜଙ୍ଗଲ ସୃଷ୍ଟି କରାଯିବ। ଉଜୁଡିଯାଇଥିବା ଜଙ୍ଗଲକୁ ପୁନଃରୁଦ୍ଧାର ପାଇଁ ନିଆଯାଇଛି ପଦକ୍ଷେପ। ବନାଞ୍ଚଳ ଅଧିକାରୀ ମାଧବ ଚନ୍ଦ୍ର ବେହେରାଙ୍କ ତତ୍ତ୍ୱାବଧାନରେ ବନପାଳ ବନିତା ପ୍ରଧାନଙ୍କ ନେତୃତ୍ୱରେ ମୁଖ୍ୟ ଅତିଥିଭାବେ ବ୍ଲକ ଚେୟାରମେନ ସୁଶାନ୍ତ କୁମାର ପ୍ରଧାନ, ଡିଏସ୍ପି କନକ ମାଝୀ, ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟ, ଶ୍ରନିକେତା ସରପଞ୍ଚ ଗଙ୍ଗାଧର ପ୍ରଧାନ ପ୍ରମୁଖ ଅତିଥିଭାବେ ଯୋଗଦେଇ ବୃକ୍ଷରୋପଣ କରିଥିଲେ। ଉଜୁଡିଯାଇଥିବା ୨୫ ହେକ୍ଟର ଜମିରେ ବୃକ୍ଷରୋପଣ କରାଯାଉଛି ବୋଲି ବନପାଳ ବନିତା ପ୍ରଧାନ କହିଛନ୍ତି। ବିଭିନ୍ନ ପ୍ରକାର ଫଳ ଗଛ ତଥା ଆମ୍ବ, ପଣସ, ଲିଚୁ, ଜାମୁ, ଲେମ୍ବୁ ସମେତ ଔଷଧୀୟ ବୃକ୍ଷ ରୋପଣ କରାଯାଇଛି, ଯାହାକି ଅଞ୍ଚଳର ଲୋକଙ୍କୁ ରୋଜଗାର ମଧ୍ୟ ଦେବ ବୋଲି କୁହାଯାଇଛ। ଆଜି ଏକ ପେଡ ମା’କେ ନାମ ପାଳନ କରାଯାଉଥିବା ବେଳେ ବନ ବିଭାଗର ଏଭଳି ଜଙ୍ଗଲକୁ ପୁନଃରୁଦ୍ଧାର କରାଯାଉଥିବା ଜାଣି ଗ୍ରାମବାସୀ ବନ ବିଭାଗକୁ ସାଧୁବାଦ ଜଣାଇଛନ୍ତି।
