ପାଟଣା, ୨।୮ (ବୀର କିଶୋର ଦାଶ)
କେନ୍ଦୁଝର ଜିଲା ପାଟଣା ରେଞ୍ଜ ପାଟଣା ସେକ୍ସନ ତଣ୍ଡ ବିଟ୍ରେ ଏକ ଗୋଠଛଡ଼ା ଦନ୍ତା ହାତୀ ରବିବାର ରାତିରେ ଘଟଗଁା ରେଞ୍ଜ୍ରୁ ଆସି ଉତ୍ପାତ ଆରମ୍ଭ କରିଛି। ଦୁଇଦିନରେ ଏହି ଦନ୍ତା ୫ ଘର ଭାଙ୍ଗି ସାରିଲାଣି। ରବିବାର ବିଳମ୍ବିତ ରାତିରେ ହାତୀ ତଣ୍ଡ ଗ୍ରାମର ଶୈଳେନ୍ଦ୍ରୀ ନାଏକ, ବନ ମୁଣ୍ଡା, ସମରା ମୁଣ୍ଡାଙ୍କ ଘର ଭାଙ୍ଗିଥିବା ବେଳେ କେତେଜଣଙ୍କ ଘରେ ପଶି ଧାନ ଚାଉଳ ଖାଇଦେଇଛି। ସେହିପରି ସୋମବାର ରାତିରେ ଦନ୍ତା ଘାଟ ବାଲିଯୋଡ଼ିର ଅର୍ଜୁନ ମୁଣ୍ଡାଙ୍କ ଖପର ଘର ଓ ତଣ୍ଡ ଗ୍ରାମର କୃଷ୍ଣଚନ୍ଦ୍ର ନାଏକ ଘର କାନ୍ଥ ଭାଙ୍ଗି ଦେଇଛି। କ୍ଷୟକ୍ଷତି ଆକଳନ କରି ଖୁବ୍ଶୀଘ୍ର କ୍ଷତିଗ୍ରସ୍ତଙ୍କୁ ସରକାରୀ ସହାୟତା ଯୋଗାଇ ଦିଆଯିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଅନ୍ୟପକ୍ଷେ ବନ କର୍ମଚାରୀ କେହି ପହଞ୍ଚତ୍ ନ ଥିବାରୁ କ୍ଷତିଗ୍ରସ୍ତମାନେ ଅସନ୍ତୋଷ ପ୍ରକାଶ କରିଛନ୍ତି।
ପ୍ରତିବର୍ଷ ହାତୀ ଚଳପ୍ରଚଳ ଅଞ୍ଚଳରେ ଏଲିଫ୍ୟାଣ୍ଟ କରିଡର ପାଇଁ ସୋଲାର ଫିନିସିଙ୍ଗ ନିମନ୍ତେ ରାଜକୋଷରୁ ଖର୍ଚ୍ଚ ହେଉଥିବା ହାତୀ ଆଳରେ ଡୁମୁରିଆ ଅଞ୍ଚଳର ଡୁମୁରିଆ, ତଣ୍ଡ, ବାଲିଯୋଡି, ବଣମହୁଲଡିହା, ସଡଙ୍ଗବାହାଳି, ଜାମୁଳେଇବେଡା, କାଳିଘାଇ ଆଦି ଗ୍ରାମରେ ଦୁଇଦିନ ଧରି ଅଘୋଷିତ ଭାବେ ରାତିରେ ବିଦ୍ୟୁତ୍ କାଟ୍ ଯୋଗୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଦନ୍ତାଟି ରାତିରେ ଜନବସତିକୁ ଆସି ଉତ୍ପାତ କରି ପୁଣି ଅଟେଇ ସଂରକ୍ଷିତ ଜଙ୍ଗଲକୁ ଚାଲି ଯାଉଥିବା ଦେଖିବାକୁ ମିଳୁଛି।
