ପାତ୍ରପୁର,୯ା୮(ଡି.ଏନ୍.ଏ.)- ଗଞ୍ଜାମ ଜିଲା ପାତ୍ରପୁର ବ୍ଲକ ଭୀମପୁର ଗ୍ରାମର ଜଣେ ଦାଦନ ଶ୍ରମିକଙ୍କ ମୁମ୍ବାଇରେ ମୃତ୍ୟୁ ଘଟିଛି। ସେ ହେଲେ ଲୋକନାଥ ସାହୁ (୫୫)। ଲୋକନାଥ ମୁମ୍ବାଇରେ ପରିବାର ସହ ରହୁଥିଲେ। ଗତ ୬ ତାରିଖରେ ଅସୁସ୍ଥତା ଯୋଗୁ ତାଙ୍କର ମୃତ୍ୟୁ ହୋଇଥିଲା। ମୃତ୍ୟୁ ପରେ ସ୍ବାବ୍ ପରୀକ୍ଷା କରାଯାଇଥିବା ବେଳେ ୭ ତାରିଖରେ ରିପୋର୍ଟ ନେଗେଟିଭ ଆସିଥିଲା। ସେଠାରେ ମୃତଦେହ ସଂସ୍କାର କରି ସ୍ତ୍ରୀ, ପୁଅ, ଭାଇ ପ୍ରମୁଖ ୭ରୁ ଊର୍ଦ୍ଧ୍ୱ ବ୍ୟକ୍ତି ଶନିବାର ଟ୍ରେନ୍ ଯୋଗେ ଗାଁକୁ ଆସିଛନ୍ତି। କ୍ୱାରାଣ୍ଟାଇନ୍ ସେଣ୍ଟରରେ ନ ରହି ସମସ୍ତେ ଘରେ ଅଛନ୍ତି। ଲୋକନାଥଙ୍କ ମୃତ୍ୟୁ ଖବର ପାଇ ବନ୍ଧୁ ପରିଜନ ମଧ୍ୟ ଘରକୁ ଆସୁଛନ୍ତି। କରୋନା ହଟ୍ସ୍ପଟ୍ ମୁମ୍ବାଇରୁ ପରିବାର ଲୋକେ ଆସିଥିବାରୁ ଗ୍ରାମବାସୀ ଭୟଭୀତ ହୋଇପଡିଛନ୍ତି।
ତେବେ ଏ ନେଇ ସରପଞ୍ଚ କିମ୍ବା ଅନ୍ୟ କେହି ଅବଗତ କରାଇ ନାହାନ୍ତି ବୋଲି ବିଡିଓ ପ୍ରକାଶ ଚନ୍ଦ୍ର ଦାସ କହିଛନ୍ତି। ଏବେ ଖବର ପାଇଲୁ, ତୁରନ୍ତ ସେମାନଙ୍କ ସ୍ବାବ୍ ପରୀକ୍ଷା କରାଯିବ ବୋଲି ସେ ସୂଚନା ଦେଇଛନ୍ତି।
