ଭୁବନେଶ୍ୱର,୨୪।୧୦: ଭାରତୀୟ ପାଣିପାଗ ବିଭାଗ ଅନୁମାନ କରିଛି ଯେ ସମ୍ଭାବ୍ୟ ବାତ୍ୟା ୨୭ ସକାଳେ ବଙ୍ଗୋପସାଗରରେ ସୃଷ୍ଟି ହୋଇପାରେ । ବଙ୍ଗୋପସାଗରରେ ଆସୁଛି ବାତ୍ୟା । ୨୭ ସକାଳେ ବାତ୍ୟାର ରୂପ ନେବ ଲଘୁଚାପ । ସ୍ପଷ୍ଟ କଲା ଭାରତୀୟ ପାଣିପାଗ ବିଭାଗ । ଆନ୍ଧ୍ର ଉପକୂଳ ଅତିକ୍ରମ କରିବା ସମ୍ଭାବନା । ୭୦ରୁ ୭୫ କିମି ରହିପାରେ ପବନର ବେଗ । ପଶ୍ଚିମ ଓ ଆଭ୍ୟନ୍ତରୀଣ ଓଡ଼ିଶାକୁ ବିପଦ ।
୨୬ରେ ଅବପାତ ପରେ ଗଭୀର ଅବପାତ ସମ୍ଭାବନା ରହିଛି। ଗଭୀର ଅବପାତ ପରେ ବାତ୍ୟା ସମ୍ଭାବନା । ତୀବ୍ର ଅବପାତ କିମ୍ବା ଛୋଟ ଧରଣର ବାତ୍ୟା ସମ୍ଭାବନା । କେନ୍ଦ୍ରୀୟ କିମ୍ବା ଉତ୍ତର ଆନ୍ଧ୍ର ଦେଇ ସ୍ଥଳଭାଗ ଛୁଇଁବ । ବାତ୍ୟାର ରୂପ ନେବା ପରେ ଓଡ଼ିଶାରେ ବଡ଼ ପ୍ରଭାବ । ଉପକୂଳ ଓ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ଆଶଙ୍କା ରହିଛି । ୮୦ କିଲୋମିଟର ବେଗରେ ପବନ ବହିପାରେ। କେନ୍ଦ୍ରାପଡ଼ା, ଜଗତସିଂହପୁର ଓ କଟକରେ ଭୟଙ୍କର ବର୍ଷା ଆଶଙ୍କା ରହିଛି । ନୟାଗଡ଼, ଖୋର୍ଦ୍ଧା ଓ ପୁରୀକୁ ମଧ୍ୟ ଆଲର୍ଟ କରାଗଲା । ଗଞ୍ଜାମ, ଗଜପତି ଓ ରାୟଗଡ଼ାରେ ବି ପ୍ରଶାସନକୁ ସଜାଗ କରାଗଲା ।
ତେବେ କାହିଁକି ବାତ୍ୟାର ନାମ ‘ମୋନ୍ଥା’(Montha) ରଖାଯାଇଛି। ଏହାର ଅର୍ଥ କଣ, କେଉଁଠାରୁ ଆସିଲା ରିପୋର୍ଟ ଅନୁସାରେ, ଥାଇଲାଣ୍ଡ ଏହାର ନାମକରଣ କରିଛି ‘ମୋନ୍ଥା’। ଥାଇଲାଣ୍ଡ ଦ୍ୱାରା ପ୍ରସ୍ତାବିତ MONTHA ନାମର ଅର୍ଥ ଥାଇ ଭାଷାରେ “ସୁଗନ୍ଧିତ ଫୁଲ” କିମ୍ୱା “ସୁନ୍ଦର ଫୁଲ” । ଝଡ଼ର ସହଜ ଚିହ୍ନଟକୁ ସୁଗମ କରିବା ଓ ପାଣିପାଗ ସମ୍ବନ୍ଧୀୟ ବିପଦ ବିଷୟରେ ଜନସାଧାରଣଙ୍କ ସଚେତନତାକୁ ବଢାଇବା ଲକ୍ଷ୍ୟରେ ଟ୍ରପିକାଲ ସାଇକ୍ଲୋନନ ପାଇଁ ଏକ ଆନ୍ତର୍ଜାତୀୟ ନାମକରଣ ବ୍ୟବସ୍ଥାର ଏକ ଅଂଶ ଭାବରେ ଥାଇଲାଣ୍ଡ ଏହା ପ୍ରସ୍ତାବ ଦେଇଥିଲା।
ବିଶ୍ୱ ପାଣିପାଗ ବିଭାଗ (WMO) ସମଗ୍ର ବିଶ୍ୱରେ ସାଇକ୍ଲୋନ୍ ନାମ ସ୍ଥିର କରିଥାଏ। WMOର ଏକ ଆନ୍ତର୍ଜାତୀୟ କମିଟି ସାଇକ୍ଲୋନ୍ର ନାମ ପରିଚାଳନା ଓ ଅପଡେଟ୍ କରେ। ଭାରତ ସମେତ ୧୩ଟି ଦେଶ ଏସିଆ ପ୍ରଶାନ୍ତ ମହାସାଗରରେ ଘୂର୍ଣ୍ଣିବଳୟର ନାମ ସ୍ଥିର କରନ୍ତି। ଭାରତ ବ୍ୟତୀତ ଏହି ଦେଶଗୁଡ଼ିକରେ ଇରାନ, ମାଲଦ୍ୱୀପ, ଥାଇଲ୍ୟାଣ୍ଡ, ସଂଯୁକ୍ତ ଆରବ ଏମିରେଟ୍ସ, ମିଆଁମାର, ଓମାନ, ପାକିସ୍ଥାନ, କାତାର, ସାଉଦି ଆରବ, ଶ୍ରୀଲଙ୍କା ଓ ୟେମେନ ଅନ୍ତର୍ଭୁକ୍ତ।
