ଭୁବନେଶ୍ୱର,୨।୫(ବ୍ୟୁରୋ): ଫେକ୍ ସିମକାର୍ଡ ବ୍ୟବହାର କରି କେତେକ ସାଇବର ରାଜନେତାମାନଙ୍କ ନାଁରେ ଟଙ୍କା ମାଗୁଛନ୍ତି। ଏହି ଠକାମିରୁ ବାଦ୍ ପଡିନି ଲୋକସଭା ବାଚସ୍ପତି ଓମ ବିର୍ଲାଙ୍କ ନାଁ। କ୍ରାଇମବ୍ରାଞ୍ଚ ପକ୍ଷରୁ ଦିଆଯାଇଥିବା ଏହି ନମ୍ବର- ୯୪୩୯୦ ୭୩୮୭୦ ଯାହାକୁ ଲୋକସଭା ବାଚସ୍ପତି ଓମ ବିର୍ଲାଙ୍କ ନମ୍ବର କହି ସାଇବର ଠକ ଟଙ୍କା ମାଗୁଥିଲେ । ହ୍ବାଟସ ଆପ୍ ନମ୍ବରରେ ଡିପି ରଖି ଟଙ୍କା ମାଗୁଥିଲେ। ଏହି ନମ୍ବର ଦ୍ୱାରା ବିଭିନ୍ନ ଲୋକଙ୍କୁ ହ୍ବାଟସ ଆପ ଓ ଫୋନ କଲ ଜରିଆରେ ଠକେଇ କରିବାକୁ ଉଦ୍ୟମ ହୋଇଛି। ଅଭିଯୋଗ ପରେ କ୍ରାଇମବ୍ରାଞ୍ଚ ତଦନ୍ତ କରିଥିଲା । ଫୋନ ନମ୍ବର ଢେଙ୍କାନାଳ ଜିଲାର ତାଲବାରକୋଟରୁ ବ୍ୟବହାର ହୋଇଥିବା ଜାଣିବାକୁ ମିଳିଥିଲା। ତିନିଟି ଭିନ୍ନ ଭିନ୍ନ ଫୋନ୍ରେ ଏହି ନମ୍ବରକୁ ବ୍ୟବହାର କରାଯାଇଥିଲା।
ମାମଲାରେ ମୁଖ୍ୟ ଅଭିଯୁକ୍ତ ସମେତ ତିନି ଜଣଙ୍କୁ ଗିରଫ କରାଯାଇଛି। କ୍ରାଇମବ୍ରାଞ୍ଚ ହାତରେ ବିଭିନ୍ନ କମ୍ପାନୀର ୧୪ ହଜାରରୁ ଅଧିକ ସିମ କାର୍ଡ ମଧ୍ୟ ଜବତ ହୋଇଛି। ମାତ୍ର ୪୦୦ ଟଙ୍କାରେ ବିନା ପ୍ରମାଣପତ୍ରରେ ଏହି ସିମ୍ କାର୍ଡ ଗୁଡ଼ିକ ବିକ୍ରି ହେଉଥିଲା। ସାଇବର କ୍ରାଇମ ସମେତ ବିଭିନ୍ନ ଅପରାଧିକ କାର୍ଯ୍ୟକଳାପରେ ଏସବୁ ବ୍ୟବହାର କରାଯାଉଥିଲା।
