ଭୁବନେଶ୍ୱର,୬।୪ (ବ୍ୟୁରୋ): ବାରମ୍ବାର ସଚେତନତା ସତ୍ତ୍ୱେ ସାଇବର ଠକଙ୍କ ଜାଲରେ ପଡ଼ୁଛନ୍ତି ଲୋକେ। ଫଳରେ ଲକ୍ଷ ଲକ୍ଷ ଟଙ୍କା ଆଖି ପିଛୁଳାକେ ହରାଇ ବସୁଛନ୍ତି। ଗତ ଜାନୁୟାରୀରେ ରାଜଧାନୀରୁ ସାଇବର ଠକ ୧ କୋଟି ୩୧ ଲକ୍ଷ ୨୫ ହଜାର ୩୦ ଟଙ୍କା ଠକି ନେଇଥିବାବେଳେ ଫେବୃୟାରୀରେ ୧ କୋଟି ୩୯ ଲକ୍ଷ ୬୦ ହଜାର ୪୭୯ ଟଙ୍କା ଠକେଇ ହୋଇଥିଲା। ଫେବୃୟାରୀରେ ଏହି ପରିମାଣ ବୃଦ୍ଧି ପାଇଥିବାବେଳେ ମାର୍ଚ୍ଚରେ କମିଛି। ଭୁବନେଶ୍ୱର ସାଇବର କ୍ରାଇମ ହେଲ୍ପ ଡେସ୍କ ପକ୍ଷରୁ ମଙ୍ଗଳବାର ମିଳିଥିବା ରିପୋର୍ଟ ଅନୁଯାୟୀ, ମାର୍ଚ୍ଚରେ ସାଇବର ଠକ ୯୧ ଲକ୍ଷ ୫୬ ହଜାର ୫୩ ଟଙ୍କା ଲୁଟି ନେଇଛନ୍ତି। ହେଲ୍ପ ଡେସ୍କ ଓ ଅର୍ଥନୈତିକ ଅପରାଧ ଥାନାର ମିଳିତ ଉଦ୍ୟମରେ ମାର୍ଚ୍ଚରେ ଠକେଇ ଟଙ୍କାରୁ ମାତ୍ର ୧୦ ଲକ୍ଷ ୫୭ ହଜାର ୬୬୧ ଟଙ୍କା ଫେରିଛି। ସେହିପରି ମାର୍ଚ୍ଚରେ ହେଲ୍ପ ଡେସ୍କକୁ ସାରା ଓଡ଼ିଶାରୁ ୪୧୨ଟି କଲ ଆସିଛି। ସେଥିମଧ୍ୟରୁ ଭୁବନେଶ୍ୱରରୁ ୨୬୭ କଲ ଆସିଥିବା ବେଳେ ଅନ୍ୟ ଜିଲାରୁ ୩୬ଟି ଅଭିଯୋଗ ଆସିଛି। କେବଳ ଭୁବନେଶ୍ୱରରୁ ୟୁପିଆଇ ଠକେଇ ସମ୍ପର୍କିତ ୧୧୦, କ୍ରେଡିଟ ଓ ଡେବିଟ କାର୍ଡ ଦ୍ୱାରା ୮୦ ଏବଂ ଅନ୍ୟ ୭୭ଟି ଅନ୍ଲାଇନ ଠକେଇ ଅଭିଯୋଗ ମିଳିଛି। ଭୁବନେଶ୍ୱର ସହରାଞ୍ଚଳ ଜିଲାରେ ଗତ ମାର୍ଚ୍ଚରେ ୭ଟି ମକଦ୍ଦମା ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନାରେ ପଞ୍ଜୀକୃତ ହୋଇଥିବା ବେଳେ ହେଲ୍ପ ଡେସ୍କ ଏବଂ ଥାନାର ନିଜସ୍ବ ଉଦ୍ୟମ କ୍ରମେ ୧୫ଟି ସାଇବର ସେଫ୍ ଟିକେଟ ଜେନେରେଟ କରାଯାଇଥିଲା। ଅଭିଯୋଗକାରୀମାନଙ୍କୁ ୧୦ ଲକ୍ଷ ୫୭ ହଜାର ୬୬୧ ଟଙ୍କା ଫେରସ୍ତ କରାଯାଇଥିବା ବେଳେ ୪୦ ହଜାର ଟଙ୍କା ବ୍ଲକ କରାଯାଇପାରିଛି। ମାର୍ଚ୍ଚରେ ଅନ୍ଲାଇନ ଠକାମିର ଶିକାର ହୋଇଥିବା ୨୫ଜଣ ଅଭିଯୋଗକାରୀଙ୍କର ସମ୍ପୂର୍ଣ୍ଣ କିମ୍ବା ଆଂଶିକ ଅର୍ଥରାଶି ଫେରସ୍ତ କରାଯାଇପାରିଛି। ଏହି କ୍ରମରେ ମାର୍ଚ୍ଚରେ ପର୍ଯ୍ୟାୟ କ୍ରମେ ଅଭିଯୋଗକାରୀମାନଙ୍କର ୧,୩୯,୯୦୦ ଟଙ୍କା, ୧,୩୪, ୯୯୯ ଟଙ୍କା ଏବଂ ୧,୫୧୧୭ ଟଙ୍କା ସାଇବର କ୍ରାଇମ ଓ ଅର୍ଥନୈତିକ ଅପରାଧ ହେଲ୍ପ ଡେସ୍କର ମିଳିତ ଉଦ୍ୟମରେ ଫେରସ୍ତ କରାଯାଇପାରିଛି।
