ନାଉଗଁା,୧୧ା୧(ସ୍ବ.ପ୍ର): ନାଉଗଁା ବ୍ଲକ ଅନ୍ତର୍ଗତ କୋକିଡିହ-ତେଲସରା ୧୨ କିମି ରାସ୍ତାର ସମ୍ପ୍ରସାରଣ କାର୍ଯ୍ୟ ଆରମ୍ଭ ହୋଇଛି। ଏହି ରାସ୍ତା ପୂର୍ତ୍ତ ବିଭାଗ ଅଧୀନରେ ରହିଛି। ପୂର୍ବରୁ ଏହି ରାସ୍ତାର ଚଉଡା ୩.୭୫ ମିଟର ଥିବାବେଳ ଏବେ ସମ୍ପ୍ରସାରଣ ପରେ ୫.୭୫ ମିଟର କରାଯିବ। ଏହି ରାସ୍ତାକୁ ସମ୍ପ୍ରସାରଣ କରିବା ପାଇଁ ଉଭୟ ପାର୍ଶ୍ୱକୁ ସଫା କରାଯିବା ସହ ଏଠାରେ ଥିବା ବହୁ ମୂଲ୍ୟବାନ ଗଛ କଟା ଯାଉଛି। ମାତ୍ର ଏ ସମ୍ପର୍କରେ ରାଜସ୍ବ ଓ ବନ ବିଭାଗ ଅଧିକାରୀ କିଛି ଜାଣି ନଥିବା କହିଛନ୍ତି। ଫଳରେ ସରକାରୀ ନିୟମ ଉଲ୍ଲଂଘନ ହେଉଛି। ଅପରପକ୍ଷେ କଟାଯାଉଥିବା ବଡ଼ବଡ ଗଛଗୁଡ଼ିକର ଗଣ୍ଡିକୁ ଦୁର୍ବୃତ୍ତମାନେ ନେଇଯାଉଛନ୍ତି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ମାତ୍ର ପ୍ରଶାସନ ପକ୍ଷରୁ ଏନେଇ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଫଳରେ ରାଜ୍ୟ ସରକାର ବହୁ ଟଙ୍କାର ରାଜସ୍ବ ହରାଉଛନ୍ତି।
ସମ୍ପ୍ରସାରଣ ସମୟରେ କଟାଯାଉଥିବା ଗଛ ସମ୍ପର୍କରେ ୨ ଜାନୁୟାରୀ ୨୦୨୩ରେ ଜିଲାପାଳଙ୍କ ମିଳିତ ଜନଶୁଣାଣି ଶିବିରରେ ପ୍ରଦୀପ୍ତ ସ୍ବାଇଁ ଅଭିଯୋଗ କରିଥିଲେ। ଏହାସତ୍ତ୍ୱେ ଏପର୍ଯ୍ୟନ୍ତ କୌଣସି କାର୍ଯାନୁଷ୍ଠାନ ନିଆଯାଇ ନାହିଁ। ପରିବେଶକୁ ସ୍ବଚ୍ଛ ରଖିବା ସହ ଖରାଦିନେ ରାସ୍ତାକୁ ଛାଇ ପ୍ରଦାନ କରିବା ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ରାସ୍ତା ପାର୍ଶ୍ୱରେ ଇଉକାଲିପଟାସ, ଆକାଶିଆ, ଶିଶୁ, ଶାଗୁଆନ ଆଦି ମୂଲ୍ୟବାନ ଗଛ ଲଗାଯାଇଥିଲା। ନିୟମାନୁସାରେ ଗଛ କାଟିବା ପୂର୍ବରୁ ରାସ୍ତାଟି ଯେଉଁ ବିଭାଗ ଅଧୀନରେ ରହିଛି, ଉକ୍ତ ବିଭାଗର ପ୍ରଶାସନିକ ଅଧିକାରୀ ରାଜସ୍ବ ବିଭାଗକୁ ଅବଗତ କରାଇବେ। ରାଜସ୍ବ ବିଭାଗ ଏ ସଂକ୍ରାନ୍ତରେ ନିକଟସ୍ଥ ବନ ବିଭାଗକୁ ଅବଗତ କରାଇବ। ଗଛ କଟାଯିବା ପରେ ୩ଟି ଯାକ ବିଭାଗଙ୍କ ଉପସ୍ଥିତିରେ ନିଲାମ କରାଯିବ। କିନ୍ତୁ ରାସ୍ତା ପାର୍ଶ୍ୱରୁ ଗଛ କଟା ସରିଥିଲେ ମଧ୍ୟ ଏପର୍ଯ୍ୟନ୍ତ ରାଜସ୍ବ ବିଭାଗ କିମ୍ବା ବନ ବିଭାଗକୁ ଅବଗତ କରାଯାଇନାହିଁ। ଏ ସମ୍ପର୍କରେ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ଅଭିଷେକ ସେଠୀଙ୍କୁ ପଚାରିବାରେ, ଅଭିଯୋଗ ପାଇବା ପରେ ବିଭାଗ ପକ୍ଷରୁ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ଖୁବଶୀଘ୍ର ଏ ବିଷୟରେ ତହସିଲକୁ ଅବଗତ କରାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ଏପ୍ରସଙ୍ଗରେ କୁଜଙ୍ଗ ବନାଞ୍ଚଳ ଅଧିକାରୀ ରଞ୍ଜନ ମିଶ୍ର କହିଛନ୍ତି, ଗଛ କଟାଯିବା ସମ୍ପର୍କରେ ପୂର୍ତ୍ତ ବିଭାଗ ପକ୍ଷରୁ କୌଣସି ଚିଠି ଆସିନାହିଁ।
