ଖୋର୍ଦ୍ଧା ଅଫିସ,୯।୮: ପରିବେଶ ସନ୍ତୁଳନ ଲାଗି ଚାରାରୋପଣ ନିମନ୍ତେ ସଚେତନତା ସୃଷ୍ଟି କରାଯାଉଛି। ଏପରି କି ରାସ୍ତା ପାର୍ଶ୍ୱରେ ବନୀକରଣକୁ ଗୁରୁତ୍ୱ ଦିଆଯାଉଛି। ପ୍ରତିବର୍ଷ ବନ ମହୋତ୍ସବ ପାଳନ ସହ ଲୋକଙ୍କୁ ମାଗଣା ଚାରା ବଣ୍ଟନ କରାଯାଉଛି। ଅନ୍ୟପକ୍ଷରେ ରାସ୍ତା ପାର୍ଶ୍ୱରୁ ବଡ ବଡ ଗଛ କାଟି ନିଆଯାଉଥିଲେ ମଧ୍ୟ ବନ ବିଭାଗ ନୀରବ ରହୁଛି। ବାଘମାରୀ-କଣ୍ଟିଲୋ ରାଜ୍ୟ ରାଜପଥ ପାର୍ଶ୍ୱରେ ଲାଗିଥିବା ଗଛ ସବୁ ମୂଳରୁ ୨ଫୁଟ ଲେଖାଏ ଛାଡ଼ି କାଟି ଦିଆଯାଇଛି। ବିଦ୍ୟୁତ ବିଭାଗ ପକ୍ଷରୁ ଗଛ କଟାଯାଇଥିବାବେଳେ ବନ ବିଭାଗ ଚୁପ୍ ବସିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁଯାୟୀ, ରାଜ୍ୟ ଜଙ୍ଗଲ ଉନ୍ନୟନ ନିଗମ ଜରିଆରେ ବାଘମାରୀ-କଣ୍ଟିଲୋ ରାସ୍ତାର ଉଭୟ ପାର୍ଶ୍ୱରେ ଗଛ ଲଗାଯାଇଥିଲା ଏହିସବୁ ଗଛ ଉପର ଦେଇ ୪ଫୁଟ ଉଚ୍ଚରେ ୧୧ କେଭି ବିଦ୍ୟୁତ ତାର ଯାଇଛି। ବନ ବିଭାଗ ବିନା ଅନୁମତିରେ ବାଘମାରୀ ବିଦ୍ୟୁତ ବିଭାଗ ପକ୍ଷରୁ ଏହି ତାର କାଟି ଦିଆଯାଇଛି। ବିଦ୍ୟୁତ ବିଭାଗ ୧୧ କେଭି ସଂସ୍ପର୍ଶରେ ଆସିବାକୁ ଥିବା ଗଛର ଡାଳପତ୍ର ପରିବର୍ତ୍ତେ ଗଛର ମୂଳରୁ ଦୁଇ ଫୁଟ ଛାଡ଼ି ସମ୍ପୂର୍ଣ୍ଣ କାଟି ଦେଇଛି। ଏହାକୁ ସ୍ଥାନୀୟ ଅୟ୍ଚଳବାସୀ ଓ ପରିବେଶପ୍ରେମୀ ବିରୋଧ କରିବା ସହ ଖୋର୍ଦ୍ଧା ବନ ବିଭାଗର ଦୃଷ୍ଟି ଆକର୍ଷଣ କରିଛନ୍ତି। ଅନ୍ୟପକ୍ଷରେ ବନପାଳଙ୍କ କାର୍ଯ୍ୟାଳୟ ସମ୍ମୁଖ ଗଛକୁ କଟାଯାଉଥିଲେ ମଧ୍ୟ କିପରି ବିଭାଗ ପାଖରେ ଖବର ନାହିଁ ତାହା ପ୍ରଶ୍ନବାଚୀ ହୋଇଛି। ସମ୍ପ୍ରତି ବର୍ଷାଦିନେ ୧୧ କେଭି ତାରରେ ଡାଳପତ୍ର ମାଡ଼ି ବିପଦ ସୃଷ୍ଟି କରିବା ଆଶଙ୍କାରେ କାଟି ଦିଆଯାଇଥିବା ସ୍ଥାନୀୟ ବିଦ୍ୟୁତ ବିଭାଗ ପକ୍ଷରୁ କୁହାଯାଇଛି। ଏ ନେଇ ଖୋର୍ଦ୍ଧା ରେଞ୍ଜର ଅସିତ ମିଶ୍ର କହିଛନ୍ତି, ଉକ୍ତ ରାସ୍ତାରେ ବନ ବିଭାଗ ନୁହେଁ ବରଂ ଜଙ୍ଗଲ ଉନ୍ନୟନ ନିଗମ ପକ୍ଷରୁ ଗଛ ଲଗାଯାଇଥିଲା। ତେଣୁ ଗଛ କଟାଯିବା ସମ୍ପର୍କରେ ନିଗମ କର୍ତ୍ତୃପକ୍ଷଙ୍କୁ ଚିଠି ଲେଖି ଜଣାଇ ଦିଆଯାଇଛି।
