ନୂଆଦିଲ୍ଲୀ, ୧୯ା୯ (ପି.ଟି.)- ସ୍ପିନ୍ରେ ବିବିଧତା ପାଇଁ ୟୁଏଇ କଣ୍ଡିଶନରେ ଫାଇଦାରେ ରହିବ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)। ୩ଥର ଚାମ୍ପିୟନ ହୋଇ ସାରିଥିବା ଏହି ଦଳ ଆଇପିଏଲ୍ର ୧୩ତମ ସଂସ୍କରଣ ଜିତିବା ସମ୍ଭାବନା ଅଧିକ ବୋଲି କହିଛନ୍ତି ପୂର୍ବତନ ଅଷ୍ଟ୍ରେଲୀୟ ସ୍ପିଡଷ୍ଟର ବ୍ରେଟ୍ ଲି। ସିଏସ୍କେରେ ସାଣ୍ଟନର ଓ ଜାଡୋଜାଙ୍କ ଭଳି ସ୍ପନିର ଅଛନ୍ତି। ଦଳର ସମସ୍ତ ସ୍ପିନରଙ୍କ ବୋଲିଂ ଶୈଳୀରେ ଭିନ୍ନତା ରହିଛି। ଟୁର୍ନାମେଣ୍ଟର ଅଗ୍ରଗତି କ୍ରମେ ସେମାନେ କଣ୍ଡିଶନରୁ ଫାଇଦା ଉଠାଇବେ। ଚାରିଥର ବିଜେତା ମୁମ୍ବାଇ ଇଣ୍ଡିଆନ୍ସ ଦଳର ପ୍ରମୁଖ ବୋଲର ଲସିଥ ମାଲିଙ୍ଗାଙ୍କ ସହାୟତା ଏଥର ପାଇବ ନାହିଁ। ଶ୍ରୀଲଙ୍କାର ଏହି ଅଭିଜ୍ଞ ସିମ୍ ବୋଲର ବ୍ୟକ୍ତିଗତ କାରଣ ଦର୍ଶାଇ ଟୁର୍ନାମେଣ୍ଟରୁ ଓହରିଯାଇଛନ୍ତି। ହେଲେ ତାଙ୍କର ଅନୁପସ୍ଥିତିକୁ ଯଶପ୍ରୀତ୍ ବୁମ୍ରା ଭରଣା କରିପାରିବେ ବୋଲି ଦୃଢତାର ସହିତ କହିଛନ୍ତି ୪୩ ବର୍ଷୀୟ ଲି’। ବୁମ୍ରାଙ୍କ ବୋଲିଂ ଆକ୍ସନ ଅଜବ ପ୍ରକାର। ସେ ଉଭୟ ଇନ୍ ସୁଇଂ ଓ ଆଉଟ୍ ସୁଇଂ ବୋଲିଂ କରିପାରନ୍ତି। ସେ ନୂଆ ବଲ୍ରେ ଯଦିଓ ଭଲ ବୋଲିଂ କରିଥାନ୍ତି, ମୁଁ କିନ୍ତୁ ପୁରୁଣା ବଲ୍ରେ ତାଙ୍କ ବୋଲିଂକୁ ଉପ ଭୋଗ କରିଥାଏ। ଗତ କିଛି ବର୍ଷ ହେଲା ତାଙ୍କ ପ୍ରଭାବୀ ପ୍ରଦର୍ଶନ ଦେଖିବା ପରେ ମୁଁ ତାଙ୍କର ଜଣେ ପ୍ରଶଂସକ ହୋଇଯାଇଛି ବୋଲି ପୂର୍ବତନ ଅଷ୍ଟ୍ରେଲୀୟ ପେସ୍ ବୋଲର କହିଛନ୍ତି। ବୁମ୍ରା ଘଣ୍ଟା ପ୍ରତି ୧୪୦ କିଲୋମିଟର ସ୍ପିଡ୍ରେ ବୋଲିଂ କରିପାରନ୍ତି। ସେ ବ୍ୟାଟ୍ସମ୍ୟାନଙ୍କ ପାଦକୁ ଲକ୍ଷ୍ୟ କରି ବୋଲିଂ କରିବାର କୌଶଳ ତାଙ୍କୁ ଜଣା। ଏହାଛଡ଼ା ସେ ୟର୍କର ମଧ୍ୟ ପକାଇପାରନ୍ତି। କ୍ୱଚିତ୍ ବୋଲରଙ୍କ ନିକଟରେ ଏହି ପ୍ରତିଭା ଦେଖିବାକୁ ମିଳିଥାଏ। ୭୬ ଟେଷ୍ଟରେ ୩୧୦ ୨୨୧ ଅନ୍ତର୍ଜାତୀୟ ଦିନିକିଆରେ ୩୮୦ ଉଇକେଟ ଅକ୍ତିଆର କରିଥିବା ଲି’ କହିଛନ୍ତି ମୁମ୍ବାଇ ଇଣ୍ଡିଆନ୍ସ ଏଥର ଶ୍ରେଷ୍ଠ ୪ ଦଳରେ ରହିବ। ଏହି ଦଳ ଗତ ୪ ବର୍ଷ ହେଲା ଚାମ୍ପିୟନ ହୋଇଆସୁଛି। ଦଳରେ ବହୁ ଭଲ ଖେଳାଳି ମଧ୍ୟ ଅଛନ୍ତି।
