ବରଗଡ଼,୧୧।୨(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ନିଶା କାରବାର ସାଧାରଣରେ ପରିଣତ ହୋଇଯାଇଛି। ଜିଲାର ଗ୍ରାମାଞ୍ଚଳଠାରୁ ଆରମ୍ଭ କରି ସହରାଞ୍ଚଳ ଯାଏ ଗଳିକନ୍ଦିରେ ଅବାଧରେ ଏହି କାରବାର ଚାଲିଛି। କଫ୍ ସିରପ୍, ଦେଶୀ ଓ ବିଦେଶୀ ମଦ, ରନ୍ଧାମଦ ଭଳି ନିଶା କାରବାର ଯୋଗୁ ମାରପିଟ୍, ଲୁଟ୍ପାଟ୍ଠାରୁ ଆରମ୍ଭ କରି ହତ୍ୟାକାଣ୍ଡ ଭଳି ଅପରାଧ ଘଟି ଚାଲିଛି। ଏହାସତ୍ତ୍ୱେ ଜିଲାରେ ଚାଲିଥିବା ନିଶା କାରବାର ବେଲଗାମ ହୋଇ ପଡ଼ିଛି। ପୋଲିସ ଏବଂ ଅବକାରୀ କାଁ ଭଁ ଧରପଗଡ଼ କରୁଥିବାବେଳେ ତାହା ଧର୍ମକୁ ଆଖିଠାର ଭଳି ହୋଇଛି। ପୋଲିସ, ଅବକାରୀଙ୍କୁ ଚ୍ୟାଲେଞ୍ଜ କରି ଜିଲାରେ ନିଶା କାରବାର ବଢ଼ି ଚାଲିଛି ଏବଂ ଦିନକୁ ଦିନ ନିଶା ଜନିତ ଅପରାଧ ମଧ୍ୟ ବୃଦ୍ଧି ପାଉଛି।
ଜିଲାରେ ୩୯ଟିଦେଶୀ ମଦଭାଟି, ଦେଶୀ ଭାଟିର ୮୪ବ୍ରାଞ୍ଚ, ୨୩ଟି ଠିପିବନ୍ଦ ବିଦେଶୀ ମଦ ଦୋକାନ ଏବଂ ୭ଟି ବାର୍ ରହିଛି। ଏସବୁ ଲାଇସେନ୍ସପ୍ରାପ୍ତ ହେଉଥିବାବେଳେ ମଦବିକ୍ରି ବାବଦକୁ ରାଜକୋଷକୁ ମଧ୍ୟ ଏହି ଜିଲାରୁ ସର୍ବାଧିକ ରାଜସ୍ବ ଯାଉଛି। ଅନ୍ୟପଟେ ଏହି ଲାଇସେନ୍ସପ୍ରାପ୍ତ ଦେଶୀ, ବିଦେଶୀ ମଦ ଦୋକାନଠାରୁ ଚୋରା ମଦ ଏବଂ କଫ୍ ସିରପ୍ କାରବାର ଢ଼େର୍ ଗୁଣରେ ଟପି ଯାଇଛି। ଜିଲାର ଉଭୟ ଗ୍ରାମାଞ୍ଚଳ, ସହରାଞ୍ଚଳର ଛକସ୍ଥାନ ଗୁଡ଼ିକରେ ବିଭିନ୍ନ ଦୋକାନ, ହୋଟେଲ, ଠେଲା ଦୋକାନ ଆଳରେ ଏହିସବୁ ନିଶା ସାମଗ୍ରୀ ଅବାଧରେ ବିକ୍ରି ହେଉଥିବା ଅଭିଯୋଗ ହେଉଛି।
ସେହିପରି ବିଭିନ୍ନ ଗ୍ରାମରେ ବେଆଇନଭାବେ ଦେଶୀମଦ ଦୋକାନ ଖୋଲା ଯାଇଛି ଏବଂ ସେଠାରେ ଅବାଧରେ ମଦ ବିକ୍ରି ଚାଲିଛି। ଏଥିପ୍ରତି ପୋଲିସ, ଅବକାରୀ ତ ଦୂରର କଥା, ସ୍ଥାନୀୟ ଜନ ପ୍ରତିନିଧିମାନେ ମଧ୍ୟ ହାତ ବାନ୍ଧି ବସିଛନ୍ତି। ଅନ୍ୟପଟେ ମଦ ଜନିତ ଅପରାଧ ବଢ଼ି ଚାଲିଥିବା ଯୋଗୁ ମହିଳାମାନେ ମଦ ବିରୋଧି ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହେଉଛନ୍ତି। ଏହା ସହିତ ଗ୍ରାମକୁ ନିଶାମୁକ୍ତ କରିବା ଦାବିରେ ପ୍ରଶାସନକୁ ମଧ୍ୟ ଫେରାଦ ହେଉଛନ୍ତି। ଏହାସତ୍ତ୍ୱେ କିଛି ସୁଫଳ ମିଳୁ ନାହିଁ। ଅପରପକ୍ଷେ ମଦ ଜନିତ ହିଂସା ବଢ଼ି ଚାଲୁଥିବା ପରିଲକ୍ଷିତ ହୋଇଛି।
ଗତ କିଛିଦିନ ତଳେ ଜିଲାର ଭେଡ଼େନ ଥାନା ଅନ୍ତର୍ଗତ ଗୁଦରାମୁଣ୍ଡାରେ ମଦଭାଟି ଠିକାକୁ କେନ୍ଦ୍ର କରି ଏକ ହତ୍ୟାକାଣ୍ଡ ଘଟିଥିଲା। ସମ୍ପୃକ୍ତ ମଦଭାଟି ଲାଇସେନ୍ସପ୍ରାପ୍ତ ନଥିଲା ଏବଂ ୨ଗୋଷ୍ଠୀ ମଧ୍ୟରେ ତାକୁ ନେଇ ବିବାଦ ଉପୁଜିଥିଲା। ସେହିପରି ଗତ ଧନୁଯାତ୍ରା ମହୋତ୍ସବ ଚାଲିଥିବାବେଳେ ବରଗଡ଼ ସହରରେ ଶାଳକ ନିଜ ଭିଣୋଇଙ୍କୁ ହତ୍ୟା କରିବା ଚର୍ଚ୍ଚାର ବିଷୟ ହୋଇଥିଲା। ଏହା କେବଳ ଗୋଟିଏ ଲେଖାଏ ଦୃଷ୍ଟାନ୍ତ ମାତ୍ର। ନିଶା କାରବାର ଯୋଗୁ ଦିନ ଦ୍ୱିପ୍ରହରରେ ଲୁଟ୍ପାଟ୍ଠାରୁ ହତ୍ୟା ଉଦ୍ୟମ, ହତ୍ୟାକାଣ୍ଡ ଭଳି ଅପରାଧ ଘଟୁଛି। ଏହାକୁ ନେଇ ସ୍ଥାନୀୟ ଲୋକେ ନିଜକୁ ସୁରକ୍ଷିତ ମଣୁ ନାହାନ୍ତି।
ତେବେ ପୋଲିସ ଏବଂ ଅବକାରୀ ବିଭିନ୍ନ ସମୟରେ ଚଢ଼ାଉ କରି କଫ ସିରପ, ଚୋରାମଦ, ଗଞ୍ଜେଇ ଜବତ କରୁଛନ୍ତି। କିନ୍ତୁ ତାହା ଜବତ ହେବାର ଅଳ୍ପଦିନ ପରେ ନିଶା ବେପାରୀମାନେ ପୁଣି ସକ୍ରିୟ ହୋଇ ପଡୁଛନ୍ତି। ବରଗଡ଼ ପୋଲିସ ବିଗତ ଦିନରେ ଚଢ଼ାଉ କରି ବିପୁଳ ପରିମାଣରେ କଫ ସିରପ, ଗଞ୍ଜେଇ ଜବତ କରିଥିଲା। ପୋଲିସର ସେହି କାର୍ଯାନୁଷ୍ଠାନ ପରେ ନିଶା ବେପାରୀଙ୍କ ମଧ୍ୟରେ ନୀରବତା ଦେଖାଯାଇଥିଲା। କିନ୍ତୁ ଏବେ ପୁଣି ଜିଲାରେ ନିଶା ବେପାରୀମାନେ ଅବାଧରେ କଫ ସିରପ୍ କାରବାର ଚଲାଇ ଥିବାବେଳେ ଚୋରାମଦ କାରବାର ଗଳିକନ୍ଦିରେ ଚାଲୁଥିବା ଅଭିଯୋଗ ହୋଇଛି। ଏ ସମ୍ପର୍କରେ ଅବକାରୀ ଅଧୀକ୍ଷକ ସୁବନ କୁମାର ନାଏକଙ୍କୁ ପଚାରିବାରୁ ନିଶା କାରବାର ଉପରେ ପ୍ରତ୍ୟେକ ଦିନ ଚଢ଼ାଉ ହେଉଛି। ଜିଲାରେ ରହିଥିବା ୬ଅବକାରୀ ଷ୍ଟେଶନ, ଗୋଟିଏ ମୋବାଇଲ ଟିମ୍ ଏବଂ ପଦ୍ମପୁର, ବରଗଡ଼ ରେଞ୍ଜର କର୍ମଚାରୀମାନେ ଏହି ଚଢ଼ାଉ କରୁଛନ୍ତି। ମାସକରେ ପ୍ରାୟ ୩୦୦ ମାମଲା ସେ ନେଇ ରୁଜୁ ହେଉଛି ଏବଂ କୋଟିଏରୁ ଊର୍ଦ୍ଧ୍ୱ ଟଙ୍କାର ନିଶା ସାମଗ୍ରୀ ଜବତ ହୋଇ ତାକୁ ନଷ୍ଟ କରାଯାଉଛି ବୋଲି ସେ କହିଥିଲେ।
