ବରେଲୀ,୧୯।୮: ଉତ୍ତରପ୍ରଦେଶର ବରେଲୀ ଜିଲାରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି, ଯେଉଁଠାରେ ପାରିବାରିକ ବିବାଦକୁ କେନ୍ଦ୍ର କରି ଜଣେ ଯୁବକ ଫେସବୁକ୍ରେ ଲାଇଭ୍ ଆସି ଆତ୍ମହତ୍ୟା କରିଛନ୍ତି। ମୃତକ ଜଣକ ହେଲେ ୨୬ ବର୍ଷୀୟ ସନୀ କୁମାର ଓରଫ୍ ରାହୁଲ।
ସୂଚନା ଅନୁଯାୟୀ, ସନୀ ନିଜ ପତ୍ନୀ କାଜଲ ଏବଂ ତିନୋଟି ସାନ ପିଲାଙ୍କ ସହ ଉତ୍ତରାଖଣ୍ଡର ହଲ୍ଦୱାନୀରେ ରହୁଥିଲେ। କିଛି ଦିନ ପୂର୍ବରୁ ସ୍ୱାମୀ-ସ୍ତ୍ରୀଙ୍କ ମଧ୍ୟରେ କୌଣସି କଥାକୁ ନେଇ କଳହ ହୋଇଥିଲା, ଯାହାପରେ ପତ୍ନୀ ନିଜ ପିଲାମାନଙ୍କୁ ଧରି ବରେଲୀସ୍ଥିତ ବାପଘରକୁ ଚାଲିଆସିଥିଲେ। ରବିବାର ଦିନ ସନୀ ମଧ୍ୟ ହଲ୍ଦୱାନୀରୁ ବରେଲୀ ପହଞ୍ଚିଥିଲେ।
ବରେଲୀ ଆସିବା ପରେ ଫୋନ୍ରେ ପତ୍ନୀଙ୍କ ସହ ପୁନର୍ବାର ତାଙ୍କର କଥା କଟାକଟି ହୋଇଥିଲା। ପରିବାର ଲୋକଙ୍କ କହିବା ଅନୁଯାୟୀ, କଥାବାର୍ତ୍ତା ସମୟରେ ହଠାତ୍ ସନୀ ଫେସବୁକ୍ରେ ଲାଇଭ୍ ଭିଡିଓ କରି ଜୀବନ ହାରିଦେବାକୁ କଥା କହିଥିଲେ। ଲାଇଭ୍ ଭିଡିଓ ସମୟରେ ତାଙ୍କ ପତ୍ନୀ କାଜଲ ତାଙ୍କୁ କ୍ରମାଗତ ଭାବେ ଫୋନ୍ କରୁଥିଲେ ମଧ୍ୟ ସନୀ ଫୋନ୍ ଉଠାଇ ନ ଥିଲେ ଏବଂ ଶେଷରେ ଘର ଭିତରେ ବେକରେ ଫାଶୀ ଲଗାଇ ଆତ୍ମହତ୍ୟା କରିଥିଲେ।
ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଏହି ମାମଲାର ଅଧିକ ତଦନ୍ତ ଜାରି ରଖିଛି।