ନୂଆଦିଲ୍ଲୀ,୨୨।୧ : ଲୋକସଭା ନିର୍ବାଚନ ୨୦୨୪ରେ ଅନୁଷ୍ଠିତ ହେବ। ବିରୋଧୀ ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱ ସରକାରଙ୍କୁ କ୍ଷମତାଚ୍ୟୁତ କରିବାକୁ ଚାହୁଁଛନ୍ତି। ଏଭଳି ପରିସ୍ଥିତିରେ ପୁଣି ଥରେ ବିରୋଧୀ ଏକତାର ସ୍ଲୋଗାନ ଉଠିବା ଆରମ୍ଭ ହୋଇଛି। ନିକଟରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାଓ(କେସିଆର)ଙ୍କ ମେଗା ରାଲିରେ ଏହାର ଝଲକ ଦେଖିବାକୁ ମିଳିଥିଲା।
ଏହି ସମାବେଶରେ ସମାଜବାଦୀ ପାର୍ଟିର ଅଧ୍ୟକ୍ଷ ଅଖିଳେଶ ଯାଦବଙ୍କଠାରୁ ପଞ୍ଜାବର ମୁଖ୍ୟମନ୍ତ୍ରୀ ଭାଗବନ୍ତ ମନ ପ୍ରମୁଖ ଅଂଶଗ୍ରହଣ କରିଥିଲେ। ଏହି ରାଲି ମାଧ୍ୟମରେ ଦେଶକୁ ବିରୋଧୀ ଏକତା ଏବଂ ଭାଜପାକୁ ଏକ ବଡ଼ ବାର୍ତ୍ତା ଦେବାକୁ ଚେଷ୍ଟା କରାଯାଇଥିଲା। ତେବେ ନିର୍ବାଚନ ପୂର୍ବରୁ ଦେଶର ସର୍ବ ପୁରାତନ ଦଳ କଂଗ୍ରେସର ଆଭିମୁଖ୍ୟ ବିରୋଧୀ ଏକତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
କଂଗ୍ରେସ ‘ଏକଲା ଚଲୋ ରେ’ ରାସ୍ତାରେ ଯାଉଥିବା ବିରୋଧୀ ଏକତା କହିଛି। ଫଳରେ ନିର୍ବାଚନ ପୂର୍ବରୁ ବିରୋଧୀ ଏକତାରେ ଫାଟ ସୃଷ୍ଟି ହୋଇଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। କେସିଆରଙ୍କ ରାଲିରେ ଯୋଗ ଦେଇଥିବା ଟିଏମସି ନେତା କୁନାଲ ଘୋଷ ୨୦୨୪ ନିର୍ବାଚନ ପୂର୍ବରୁ କଂଗ୍ରେସକୁ ଏକୁଟିଆ ଯାଉଥିବାର ଅଭିଯୋଗ କରିଥିଲେ। ସେ କହିଥିଲେ, ଟିଏମସି ମୁଖ୍ୟ ମମତା ବାନାର୍ଜୀ ବିରୋଧୀ ଦଳ ମଧ୍ୟରେ ଏକ ସମନ୍ବୟ ୍ଏବଂ ଅନ୍ୟ ରାଜ୍ୟରେ ମିଳିତ କାର୍ଯ୍ୟକ୍ରମ ଆରମ୍ଭ କରିଥିଲେ। ତେବେ କଂଗ୍ରେସ ଦଳ ଏହାର ଜବାବ ଦେଇନାହିଁ। ଏହି ପ୍ରସଙ୍ଗରେ କଂଗ୍ରେସ ଦଳ ଏକାକୀ ଆଗକୁ ବଢ଼ିବାକୁ ଚେଷ୍ଟା କରୁଛି । ଏହି ମର୍ମରେ କଂଗ୍ରେସ ଭାରତ ଯୋଡ଼ୋ ଯାତ୍ରାର ଦ୍ୱିତୀୟ ପର୍ଯ୍ୟାୟ ଘୋଷଣା କରିଛି। ଏହାକୁ ହାଥ ସେ ହାଥ ଯୋଡୋ ଅଭିଯାନ କୁହାଯାଉଛି। ଏହାର ଲୋଗୋ ମଧ୍ୟ ଉନ୍ମୋଚିତ ହୋଇଛି ବୋଲି ସେ କହିଥିଲେ।
