ନୂଆଦିଲ୍ଲୀ,୩।୯ : ଇଣ୍ଡିଆ ମେଣ୍ଟର ଦୁଇ ଦଳ କଂଗ୍ରେସ ଏବଂ କମ୍ୟୁନିଷ୍ଟ ପାର୍ଟି ଅଫ ଇଣ୍ଡିଆ (ମାର୍କ୍ସବାଦୀ) (ସିପିଏମ) ଆସନ୍ତା ୨୦୨୪ ରେ ହେବାକୁ ଥିବା ଲୋକସଭା ନିର୍ବାଚନରେ ଏକାଠି ପ୍ରତିଦ୍ୱନ୍ଦ୍ୱିତା କରିବାକୁ ଏକ ସଂକଳ୍ପ ପାରିତ କରିଛନ୍ତି। ଭାଜପା ବିରୋଧରେ ଏକଜୁଟ ହେବା ଏବଂ ଲଢ଼ିବା ପାଇଁ , ଇଣ୍ଡିଆ ମେଣ୍ଟ ଗଠନ କରାଯାଇଛି। ଏହି ଦୁଇ ଦଳ କେରଳର ପୁଥୁପାଲ୍ଲି ବିଧାନସଭା ଆସନରେ ଅନୁଷ୍ଠିତ ହେବାକୁ ଥିବା ଉପ-ନିର୍ବାଚନରେ ମୁହାଁମୁହିଁ ହୋଇଛନ୍ତି। ଭେଟେରାନ କଂଗ୍ରେସ ନେତା ଓମେନ ଚାଣ୍ଡି ଗତ ୫୩ ବର୍ଷ ଧରି ଲଗାତାର ୧୨ ଥର ପୁଥୁପାଲ୍ଲି ନିର୍ବାଚନମଣ୍ଡଳୀରେ ରହିଥିଲେ। ବର୍ତ୍ତମାନ ଚଳିତ ବର୍ଷ ଜୁଲାଇରେ ଚାଣ୍ଡିଙ୍କ ଦେହାନ୍ତ ପରେ ୫ ସେପ୍ଟେମ୍ବରରେ ସେହି ଆସନରେ ଉପ-ନିର୍ବାଚନ ହେବାକୁ ଯାଉଛି।
ମୁମ୍ବାଇ ଶିଖର ସମ୍ମିଳନୀରେ ଇଣ୍ଡିଆ ମେଣ୍ଟରେ ଏକତା ଦେଖାଇବା ସତ୍ତ୍ୱେ ପୁଥୁପାଲ୍ଲି ଉପ-ନିର୍ବାଚନରେ କଂଗ୍ରେସ ଏବଂ ସିପିଏମ ପରସ୍ପର ବିରୋଧରେ ଲଢ଼ିବାକୁ ଯାଉଛନ୍ତି। କଂଗ୍ରେସ ଚାଣ୍ଡିଙ୍କ ପୁଅ, ଯୁବ କଂଗ୍ରେସ ନେତା ଚାଣ୍ଡି ଓମେନଙ୍କୁ ଏହାର ପ୍ରାର୍ଥୀ ଭାବେ ନାମିତ କରିଥିବାବେଳେ ସିପିଆଇଏମ ଦଳର ଯୁବ ୱିଙ୍ଗ, ଡେମୋକ୍ରାଟିକ ୟୁଥ ଫେଡେରେଶନ ଅଫ ଇଣ୍ଡିଆର କେନ୍ଦ୍ରୀୟ କମିଟି ସଦସ୍ୟ ଜ୍ୟାକ ଥୋମାସଙ୍କୁ ପ୍ରାର୍ଥୀ କରିଛି। ସିପିଏମ ରାଜ୍ୟ ସଚିବ ଏମ.ଭି ଗୋବିନ୍ଦନ ପ୍ରକାଶ କରିଛନ୍ତି ୟୁନାଇଟେଡ ଡେମୋକ୍ରାଟିକ ଫ୍ରଣ୍ଟ ଏକ ସହଜ ବିଜୟ ହାସଲ କରିବାରେ ଆତ୍ମବିଶ୍ୱାସ ହରାଇଛି। ଗୋବିନ୍ଦନ କହିଛନ୍ତି ପୁଥୁପାଲ୍ଲି ନିର୍ବାଚନମଣ୍ଡଳୀରେ ବାମପନ୍ଥୀ ଡେମୋକ୍ରାଟିକ ଫ୍ରଣ୍ଟର ପରିବର୍ତ୍ତନ ଆଣି କଂଗ୍ରେସର ପ୍ରାଧାନ୍ୟକୁ ସମାପ୍ତ କରିବାର ସୁଯୋଗ ରହିଛି। ତେବେ ଏହା ଦ୍ୱାରା ଇଣ୍ଡିଆ ମେଣ୍ଟରେ ଫାଟ ସୃଷ୍ଟି ହୋଇଥିବା ଚର୍ଚ୍ଚା ହେଉଛି।
ଗୋବିନ୍ଦନ ସର୍ଭେ ଫଳାଫଳକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ କହି ଖାରଜ କରିଛନ୍ତି। କଂଗ୍ରେସ ଭାବପ୍ରବଣ ଆବେଦନ ଉପରେ ପ୍ରଚାର କରିଥିଲାବେଳେ ଏଲଡିଏଫ ବିକାଶ ପାଇଁ ପ୍ରଚାର କରିଥିଲା। ଏହା ଆମ ସୁବିଧା ପାଇଁ କାମ କଲା ଆମର ସଫଳତା ନିଶ୍ଚିତ କରିବାକୁ ଲୋକମାନେ ଆମକୁ ଭୋଟ ଦେବେ। ସିଏମ ପିନାରାଇ ବିଜୟନ ନିଜେ ସିପିଏମ ପ୍ରାର୍ଥୀ ଜ୍ୟାକ ସି ଥୋମାସଙ୍କ ପାଇଁ ପ୍ରଚାର କରୁଛନ୍ତି ଯାହା ଏକ ସମ୍ମାନଜନକ ଲଢ଼େଇ ଭାବରେ ବିବେଚନା କରାଯାଉଛି।
