ଚଣ୍ଡିଖୋଲ,୧ା୧୨ଡି.ଏନ.ଏ.): ଜାରକା ଗ୍ରାମ୍ୟ ଉନ୍ନୟନ ବିଭାଗ ଚଣ୍ଡିଖୋଲ ଉପଖଣ୍ଡ ଅଧୀନ ବାଉଜଙ୍ଗ-ଧାଉଡ଼ିଆପଦା ରାସ୍ତାର ଚାରିନଙ୍ଗଳଠାରେ ବିରୂପା ନଦୀ ଉପରେ ସେତୁ ନିର୍ମାଣ ହୋଇଛି। ଏହି ସେତୁ ନିର୍ମାଣ କାମ ୨ବର୍ଷ ହେବ ଶେଷ ହୋଇଛି। ହେଲେ ଉଭୟ ପାର୍ଶ୍ୱରେ ଅପ୍ରୋଚ୍ ରୋଡ ନିର୍ମାଣ କାମ ଶେଷ ହୋଇ ନ ଥିବାରୁ ସେତୁ ଦେଇ ଯାତାୟାତ ବନ୍ଦ ରହିଛି। ଏବେ ଆପ୍ରୋଚ ରୋଡ ନିର୍ମାଣ କାର୍ଯ୍ୟ ଚାଲୁଛି। ତେବେ ନିର୍ମାଣ କାମ ଚାଲୁ ଥିବା ବେଳେ ଅପ୍ରୋଚ ରୋଡ ପାଇଁ ନିର୍ମାଣ ହୋଇଥିବା ୱାଲରେ ଫାଟ ସୃଷ୍ଟି ହୋଇଛି, ଯାହାକୁ ନେଇ ଅପ୍ରୋଚ ରୋଡର ସ୍ଥାୟୀତ୍ୱ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ା ଏହି କାର୍ଯ୍ୟ ନିମ୍ନମାନର ହେଉଥିବା ନେଇ ଚାରିନଙ୍ଗଳ ଗ୍ରାମବାସୀ ଅଭିଯୋଗ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ଅପ୍ରୋଚ ରୋଡ କାମ କରୁଥିବା ଠିକା ସଂସ୍ଥା ନିମ୍ନମାନର କାର୍ଯ୍ୟ କରୁଥିବା ଯୋଗୁ ଓ୍ବାଲ୍ରେ ଫାଟ ସୃଷ୍ଟି ହୋଇଛି। ଉଭୟ ପାର୍ଶ୍ୱରେ ହେଉଥିବା ଅପ୍ରୋଚ ରୋଡର ମାଟି ଓ ମୋରମ ଦବାଇବା ପାଇଁ ଠିକା ସଂସ୍ଥା ଭାଇବ୍ରେଟର ବ୍ୟବହାର କରୁ ନାହିଁ। ଯଦି ଭାଇବ୍ରେଟର ବ୍ୟବହାର କରେ ତେବେ ୱାଲ୍ଟି ଭୁଶୁଡ଼ି ପଡିବାର ସମ୍ଭାବନା ରହିଛି।
ସୂଚନାଯୋଗ୍ୟ, ବିରୂପା ନଦୀର ଚାରିନଙ୍ଗଳଠାରେ ବ୍ରିଜ କାମ ଶେଷ ପରେ ମଧ୍ୟ ବ୍ରିଜର ଉଭୟ ପାର୍ଶ୍ୱରେ ବେସରକାରୀ ଜମି ରହିଥିବା ହେତୁ ଅପ୍ରୋଚ ରୋଡ ନିର୍ମାଣ ହୋଇପାରି ନ ଥିଲା ା ବେସରକାରୀ ଜମି ଅଧିଗ୍ରହଣ ହୋଇ ନ ଥିବାରୁ କାମରେ ବିଳମ୍ବ ହୋଇଥଲା। ପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଜମି ଅଧିଗ୍ରହଣ କରାଗଲା ପରେ ଅପ୍ରୋଚ ରୋଡ ନିର୍ମାଣ ଆରମ୍ଭ ହୋଇଥିଲା। ଏବେ ନିର୍ମାଣ କାର୍ଯ୍ୟ ଚାଲୁଥିବା ବେଳେ ୱାଲ୍ରେ ଫାଟ ସୃଷ୍ଟି ହୋଇଛି। ଏ ନେଇ ଗ୍ରାମ୍ୟ ଉନ୍ନୟନ ବିଭାଗ ଅଧୀକ୍ଷଣ ଯନ୍ତ୍ରୀ ପ୍ରଦ୍ୟୁମ୍ନ କୁମାର ସେଠୀଙ୍କୁ ପଚାରିବାରୁ ସେ କୁହନ୍ତି ୱାଲ୍ରେ ଫାଟ ସୃଷ୍ଟି ହେବା ନେଇ ଖବର ପାଇଛି। ତୁରନ୍ତ ମୁଁ ଘଟଣାସ୍ଥଳ ପରିଦର୍ଶନ କରିବି। ଏହାପରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ।
