ନୂଆଦିଲ୍ଲୀ, ୪ା୯ (ପି.ଟି.): କୋଭିଡ୍-୧୯ ଟେଷ୍ଟରେ ବିଶ୍ୱ ଚାମ୍ପିୟନଶିପ୍ ରୌପ୍ୟ ବିଜେତା ଦୀପକ ପୁନିଆଙ୍କ ସମେତ ୩ ଜଣ ସିନିୟର ପୁରୁଷ ରେସ୍ଲରଙ୍କ ଫଳାଫଳ ପଜିଟିଭ୍ ଆସିଥିବା ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଗୁରୁବାର କହିଛି। ଅଲିମ୍ପିକ ପାଇଁ ଯୋଗ୍ୟତା ଅର୍ଜନ କରିଥିବା ପୁନିଆ (୮୬କେଜି)ଙ୍କ ବ୍ୟତୀତ ଅନ୍ୟ ଯେଉଁ ଦୁଇ ଜଣଙ୍କର ପଜିଟିଭ୍ ଆସିଛି ସେମାନେ ହେଲେ ନବୀନ ଏବଂ କ୍ରିଷନ (୧୨୫କେଜି)। ସୋନେପତ୍ସ୍ଥିତ ସାଇ ସେଣ୍ଟରରେ ଆୟୋଜିତ ଜାତୀୟ କ୍ୟାମ୍ପ ଆରମ୍ଭ ପୂର୍ବରୁ ରେସଲରମାନେ କ୍ୱାରାଣ୍ଟାଇନ୍ରେ ରହିଥିଲେ। ସତର୍କତାମୂଳକ ପଦକ୍ଷେପ ସ୍ବରୂପ ଏହି ରେସ୍ଲରମାନଙ୍କୁ ସାଇର ତାଲିକାଭୁକ୍ତ ଏକ ହସ୍ପିଟାଲରେ ଭର୍ତ୍ତି କରାଯାଇଛି। ପ୍ରୋଟୋକଲ ଅନୁସାରେ କ୍ୟାମ୍ପରେ ରିପୋର୍ଟ କରିବାପରେ କୋଭିଡ୍-୧୯ ଚିହ୍ନଟ ପାଇଁ କୋଚ୍ ଓ ସପୋର୍ଟ ଷ୍ଟାଫ୍ଙ୍କ ସହିତ ସମସ୍ତ ରେସ୍ଲରଙ୍କର ଆରଟି-ପିସିଆର୍ ଟେଷ୍ଟ ବାଧ୍ୟତାମୂଳକ। ରେସ୍ଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ଆସିଷ୍ଟାଣ୍ଟ ସେକ୍ରେଟାରୀ ବିନୋଦ ତୋମାର କହିଛନ୍ତି ୩ଜଣ କରୋନା ପିଜିଟିଭ ବାହାରିଥିଲେ ମଧ୍ୟ କ୍ୟାମ୍ପ୍ ଅନୁଷ୍ଠିତ ହେବ। ଦୁଇ ଦିନ ପରେ ଏହି ରେସଲରମାନଙ୍କର ପୁଣି ଟେଷ୍ଟ ହେବ। ରେସଲରମାନେ ୧୪ ଦିନ କ୍ୱାରାଣ୍ଟାଇନ୍ ପିରିୟଡ ଶେଷ କରିବା ପରେ ଟ୍ରେନିଂ ଆରମ୍ଭ ହେବ ବୋଲି ତୋମାର କହିଛନ୍ତି। କ୍ୟାମ୍ପରେ ଯୋଗ ଦେବା ଲାଗି ରେସ୍ଲରମାନେ ସେପ୍ଟେମ୍ବର ୧ରେ ଏକତ୍ରିତ ହୋଇଛନ୍ତି। ପୂର୍ବରୁ ଏସୀୟ ଓ ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପିୟନ ତଥା ଏକମାତ୍ର ମହିଳା ରେସ୍ଲର ଭାବେ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଥିବା ଭିନେଶ ଫୋଗତ୍ଙ୍କର କରୋନା ପଜିଟିଭ୍ ହୋଇଥିଲା। ଫଳରେ ସେ ଗତ ସପ୍ତାହରେ ଅନୁଷ୍ଠିତ ଜାତୀୟ କ୍ରୀଡ଼ା ଉତ୍ସବରେ ଖେଳରତ୍ନ ପୁରସ୍କାର ଗ୍ରହଣ କରିବା ଲାଗି ଉପସ୍ଥିତ ହୋଇପାରି ନ ଥିଲେ। ଭିନେଶ ୫୩ କେଜି କାଟେଗୋରିରେ ଭାଗ ନେଇଥାନ୍ତି। ପ୍ରତିଷେଧକମୂଳକ ବ୍ୟବସ୍ଥା ସ୍ବରୂପ ସେ ପୂର୍ବ ଭଳି ଆଇସୋଲେଶନରେ ରହିବେ।
