ସୁନ୍ଦରଗଡ଼,୨୪।୪(ଡି.ଏନ.ଏ.): ସୁନ୍ଦରଗଡ଼ ଜିଲାରେ ଏବେ ପୁଣି କାୟା ମେଲାଉଛି କରୋନା। ଶନିବାର ରାତିରେ ସୁନ୍ଦରଗଡ଼ କୋଭିଡ୍ କେୟାର ହସପିଟାଲରେ ଜଣେ କରୋନା ଆକ୍ରାନ୍ତଙ୍କ ମୃତ୍ୟୁ ଘଟିଥିଲା ବେଳେ ଗତ ୫ତାରିଖରେ ରାଉରକେଲାରେ ଜଣଙ୍କର ମୃତ୍ୟୁ ଘଟିଛି। ଜିଲା ସ୍ବାସ୍ଥ୍ୟ ବିଭାଗ ଏନେଇ ସ୍ପଷ୍ଟ କରିଛି। ଜିଲା ସ୍ବାସ୍ଥ୍ୟ ବିଭାଗର ସୂଚନା ମୁତାବକ ଜିଲାରେ ଗତ ମାର୍ଚ୍ଚ ୩୧ରୁ ଚଳିତ ୨୨ଅପ୍ରେଲ ପର୍ଯ୍ୟନ୍ତ ୧୦୪୧୪ ବ୍ୟକ୍ତିଙ୍କ ନମୂନା ପରୀକ୍ଷା କରାଯାଇଛି। ଏଥିରୁ ଆର୍ଟିପିସିଆର ପାଇଁ ୪୪୭୨ ନମୂନା ଏବଂ ଆରଏଟି ସହିତ ୫୯୩୭ ନମୁନା ପରୀକ୍ଷା କରାଯାଇଥିଲା। ସେଥିମଧ୍ୟରୁ ୧୫୨୫ଟି ନମୁନା ପଜିଟିଭ ଚିହ୍ନଟ ହୋଇଛି। ଏହି ସମୟରେ ୫୨୨ ଜଣ ସୁସ୍ଥ ହୋଇ ଡିସଚାର୍ଜ ହୋଇଛନ୍ତି। ରାଉରକେଲା ଆର୍ଜିଏଚ୍ ଏବଂ ସୁନ୍ଦରଗଡ଼ ସରକାରୀ ମେଡ଼ିକାଲ କଲେଜ ଏବଂ କୋଭିଡ କେୟାର ହସ୍ପିଟାଲରେ ଚିକିତ୍ସା ବ୍ୟବସ୍ଥା ହୋଇଛି। ୯୮୫ଟି କେଶ ହୋମ ଆଇସୋଲେସନରେ ରହି ଚିକିତ୍ସିତ ହେଉଛନ୍ତି। ସେମାନଙ୍କ ସ୍ବାସ୍ଥ୍ୟ ସ୍ଥିତିକୁ ନିୟମିତ ନଜର ରଖାଯାଇଛି। ଜନସାଧାରଣ ମାସ୍କ ବ୍ୟବହାର ସହ କୋଭିଡ୍ର ଉପଯୁକ୍ତ ଆଚରଣ ପାଳନ କରିବା ପାଇଁ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଜନସାଧାରଣଙ୍କୁ ନିବେଦନ କରାଯାଇଛି। ଜିଲାରେ ବର୍ତ୍ତମାନ ସୁଦ୍ଧା ଜଣଙ୍କର କୋଭିଡ୍ରେ ମୃତ୍ୟୁ ଘଟିଥିବାବେଳେ ଶନିବାର ରାତିରେ ମୃତ୍ୟୁ ହୋଇଥିବା ବ୍ୟକ୍ତି କୋଭିଡ୍ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ। ହେଲେ ତାଙ୍କର ମଧୁମେହ ଓ ଅନ୍ୟାନ୍ୟ ଜଟିଳତା ଥିବାରୁ ତାଙ୍କର ମୃତ୍ୟୁର କାରଣ ଯାଞ୍ଚ ପରେ ସ୍ପଷ୍ଟ କରାଯିବ ବୋଲି ଜିଲା ସ୍ବାସ୍ଥ୍ୟ ଅଧିକାରୀ ଡା.ସରୋଜ କୁମାର ମିଶ୍ର ପ୍ରକାଶ କରିଛନ୍ତି।
