ଭୁବନେଶ୍ୱର,୩୦ା୪(ବ୍ୟୁରୋ): କରୋନା(କୋଭିଡ-୧୯) ଭୂତାଣୁ ସଂକ୍ରମଣ ରାଜ୍ୟ ସରକାରଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ଏହାକୁ ରୋକିବା ସରକାରଙ୍କ ପକ୍ଷେ ବେଳକୁ ବେଳ ମୁସ୍କିଲ ହୋଇପଡୁଛି। ସରକାର ଯେତେ ଯାହା ପଦକ୍ଷେପ ନେଲେ ବି ଏହି ରୋଗ ନିୟନ୍ତ୍ରଣକୁ ଆସୁ ନାହିଁ। ଦିନକୁ ଦିନ ଏହା ବଢି ବଢି ଚାଲିଛି। ମାର୍ଚ୍ଚ ୩୧ ତାରିଖରେ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୪ ଥିଲା। ମାସକ ପରେ ଏହି ସଂଖ୍ୟା ୧୪୨ରେ ପହଞ୍ଚିଛି। ଅର୍ଥାତ ୧ ମାସ ମଧ୍ୟରେ ୧୩୮ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଯଦିଓ ଦେଶ କିମ୍ବା ଅନ୍ୟ ରାଜ୍ୟ ତୁଳନାରେ ଏହା କମ୍ ତେବେ ଓଡ଼ିଶା ଭଳି ରାଜ୍ୟ ପାଇଁ ଏହା ଗମ୍ଭୀର ସ୍ଥିତି ସୃଷ୍ଟି କରିବାକୁ ଯାଉଛି। ଲକ୍ଡାଉନ ଉଠିବା ପରେ ଅନ୍ୟ ରାଜ୍ୟରୁ ଲୋକମାନେ ଓଡିଶାକୁ ଫେରିବେ। ଏହି ମହାମାରୀ ରୋଗ ଆହୁରି ଅଧିକ ସଂକ୍ରମଣ ହେବା ଆଶଙ୍କାକୁ ଏଡାଯାଇ ନ ପାରେ । ମାସକ ପୂର୍ବରୁ କରୋନା ଭୂତାଣୁ ସଂକ୍ରମଣ ଖୋର୍ଦ୍ଧା ଜିଲାର ଭୁବନେଶ୍ୱରରୁ ୩ ଜଣ ଓ ଭଦ୍ରକ ସହରର ଜଣଙ୍କୁ ମିଶାଇ ୪ ଜଣ ଥିଲା। ଗତ ମାସକ ମଧ୍ୟରେ ଏହି ମହାମାରୀ ୧୪ଟି ଜିଲାରେ ପାଦ ଥାପି ସାରିଲାଣି। ସେଗୁଡ଼ିକ ହେଲା ଖୋର୍ଦ୍ଧା, ଭଦ୍ରକ ସମେତ ବାଲେଶ୍ୱର, ଯାଜପୁୁର, କେନ୍ଦ୍ରାପଡ଼ା, ସୁନ୍ଦରଗଡ, କଳାହାଣ୍ଡି, କଟକ, ପୁରୀ, ଢେଙ୍କାନାଳ, କୋରାପୁଟ, କେନ୍ଦୁଝର, ଦେବଗଡ ଏବଂ ଝାରସୁଗୁଡା। ଗତ ସପ୍ତାହରେ କୋରାପୁୁଟ, କେନ୍ଦୁଝର, ଝାରସୁଗୁଡା ଓ ଦେବଗଡକୁ ଗ୍ରୀନ ଜୋନରେ ରଖାଯାଇଥିଲା। ଏବେ ଏହି ସବୁ ଜିଲା ରେଡ ଜୋନରେ ଯୋଡି ହୋଇଯାଇଛି।ରାଜ୍ୟ ବାହାରୁ ଆସୁଥିବା ଲୋକମାନଙ୍କର ଯଦି ଠିକ୍ ଭାବେ ସ୍ବାସ୍ଥ୍ୟ ପରୀକ୍ଷା କରାଯାଇ ପାରିବ ତେବେ ସଂକ୍ରମଣ ଆଶଙ୍କାକୁ ବହୁ ମାତ୍ରାରେ ରୋକାଯାଇ ପାରିବ ବୋଲି ସ୍ବାସ୍ଥ୍ୟ ବିଶାରଦ ମତ ଦେଉଛନ୍ତି।
